৪. ধোতকত্থেৰঅপদানং

৭২. ‘‘গঙ্গা ভাগীৰথী নাম, হিমৱন্তা পভাৱিতা [হিমৱন্তপ্পভাৱিতা (সী.)];

হংসৱতিযা দ্ৱাৰেন, অনুসন্দতি তাৱদে.

৭৩. ‘‘সোভিতো নাম আৰামো, গঙ্গাকূলে সুমাপিতো;

তত্থ পদুমুত্তৰো বুদ্ধো, ৱসতে লোকনাযকো.

৭৪. ‘‘তিদসেহি যথা ইন্দো, মনুজেহি পুৰক্খতো;

নিসীদি তত্থ ভগৱা, অসম্ভীতোৱ কেসৰী.

৭৫. ‘‘নগৰে হংসৱতিযা, ৱসামি [অহোসিং (স্যা.)] ব্ৰাহ্মণো অহং;

ছড়ঙ্গো নাম নামেন, এৱংনামো মহামুনি.

৭৬. ‘‘অট্ঠাৰস সিস্সসতা, পৰিৱাৰেন্তি মং তদা;

তেহি সিস্সেহি সমিতো, গঙ্গাতীৰং উপাগমিং.

৭৭. ‘‘তত্থদ্দসাসিং সমণে, নিক্কুহে ধোতপাপকে;

ভাগীৰথিং তৰন্তেহং [তৰন্তোহং (স্যা. পী.)], এৱং চিন্তেসি তাৱদে.

৭৮. ‘‘সাযং পাতং [সাযপাতং (পী.)] তৰন্তামে, বুদ্ধপুত্তা মহাযসা;

ৱিহেসযন্তি অত্তানং, তেসং অত্তা ৱিহঞ্ঞতি.

৭৯. ‘‘সদেৱকস্স লোকস্স, বুদ্ধো অগ্গো পৱুচ্চতি;

নত্থি মে দক্খিণে কাৰং, গতিমগ্গৱিসোধনং.

৮০. ‘‘যংনূন বুদ্ধসেট্ঠস্স, সেতুং গঙ্গায কাৰযে;

কাৰাপেত্ৱা ইমং কম্মং [সেতুং (স্যা.)], সন্তৰামি ইমং ভৱং.

৮১. ‘‘সতসহস্সং দত্ৱান, সেতুং কাৰাপযিং অহং;

সদ্দহন্তো কতং কাৰং, ৱিপুলং মে ভৱিস্সতি.

৮২. ‘‘কাৰাপেত্ৱান তং সেতুং, উপেসিং লোকনাযকং;

সিৰসি অঞ্জলিং কত্ৱা, ইমং ৱচনমব্ৰৱিং.

৮৩. ‘‘‘সতসহস্সস্স ৱযং [ৱযং সতসহস্সংৱ (ক.)], দত্ৱা [কত্ৱা (সী. পী.)] কাৰাপিতো মযা;

তৱত্থায মহাসেতু, পটিগ্গণ্হ মহামুনে.

৮৪. ‘‘‘পদুমুত্তৰো লোকৱিদূ, আহুতীনং পটিগ্গহো;

ভিক্খুসঙ্ঘে নিসীদিত্ৱা, ইমা গাথা অভাসথ.

৮৫. ‘‘‘যো মে সেতুং অকাৰেসি, পসন্নো সেহি পাণিভি;

তমহং কিত্তযিস্সামি, সুণাথ মম ভাসতো.

(সেতুদানআনিসংসো)

৮৬. ‘‘‘দৰিতো পব্বততো ৱা, ৰুক্খতো পতিতোপিযং;

চুতোপি লচ্ছতী ঠানং, সেতুদানস্সিদং ফলং.

৮৭. ‘‘‘ৱিৰূড়্হমূলসন্তানং, নিগ্ৰোধমিৱ মালুতো;

অমিত্তা নপ্পসহন্তি, সেতুদানস্সিদং ফলং.

৮৮. ‘‘‘নাস্স চোৰা পসহন্তি, নাতিমঞ্ঞন্তি খত্তিযা;

সব্বে তৰিস্সতামিত্তে, সেতুদানস্সিদং ফলং.

৮৯. ‘‘‘অব্ভোকাসগতং সন্তং, কঠিনাতপতাপিতং;

পুঞ্ঞকম্মেন সংযুত্তং, ন ভৱিস্সতি ৱেদনা [তাৱদে (ক.)].

৯০. ‘‘‘দেৱলোকে মনুস্সে ৱা, হত্থিযানং সুনিম্মিতং;

তস্স সঙ্কপ্পমঞ্ঞায, নিব্বত্তিস্সতি তাৱদে.

৯১. ‘‘‘সহস্সস্সা ৱাতজৱা, সিন্ধৱা সীঘৱাহনা;

সাযং পাতং উপেস্সন্তি, সেতুদানস্সিদং ফলং.

৯২. ‘‘‘আগন্ত্ৱান মনুস্সত্তং, সুখিতোযং ভৱিস্সতি;

ৱেহাসং [ইহাপি (সী. স্যা. পী.)] মনুজস্সেৱ, হত্থিযানং ভৱিস্সতি.

৯৩. ‘‘‘কপ্পসতসহস্সম্হি, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

৯৪. ‘‘‘তস্স ধম্মেসু দাযাদো, ওৰসো ধম্মনিম্মিতো;

সব্বাসৱে পৰিঞ্ঞায, নিব্বাযিস্সতিনাসৱো’.

৯৫. ‘‘অহো মে সুকতং কম্মং, জলজুত্তমনামকে;

তত্থ কাৰং কৰিত্ৱান, পত্তোহং আসৱক্খযং.

৯৬. ‘‘পধানং পহিতত্তোম্হি, উপসন্তো নিৰূপধি;

নাগোৱ বন্ধনং ছেত্ৱা, ৱিহৰামি অনাসৱো.

৯৭. ‘‘কিলেসা ঝাপিতা ময্হং…পে… ৱিহৰামি অনাসৱো.

৯৮. ‘‘স্ৱাগতং ৱত মে আসি…পে… কতং বুদ্ধস্স সাসনং.

৯৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ধোতকো থেৰো ইমা গাথাযো অভাসিত্থাতি.

ধোতকত্থেৰস্সাপদানং চতুত্থং.