৫. উপসীৱত্থেৰঅপদানং

১০০. ‘‘হিমৱন্তস্সাৱিদূৰে, অনোমো নাম পব্বতো;

অস্সমো সুকতো ময্হং, পণ্ণসালা সুমাপিতা.

১০১. ‘‘নদী চ সন্দতী তত্থ, সুপতিত্থা মনোৰমা;

অনূপতিত্থে জাযন্তি, পদুমুপ্পলকা বহূ.

১০২. ‘‘পাঠীনা পাৱুসা মচ্ছা, বলজা মুঞ্জৰোহিতা;

মচ্ছকচ্ছপসঞ্ছন্না [মচ্ছকচ্ছপসম্পন্না (?)], নদিকা সন্দতে তদা.

১০৩. ‘‘তিমিৰা পুপ্ফিতা তত্থ, অসোকা খুদ্দমালকা;

পুন্নাগা গিৰিপুন্নাগা, সম্পৱন্তি মমস্সমং.

১০৪. ‘‘কুটজা পুপ্ফিতা তত্থ, তিণসূলৱনানি চ;

সালা চ সড়লা তত্থ, চম্পকা পুপ্ফিতা বহূ.

১০৫. ‘‘অজ্জুনা অতিমুত্তা চ, মহানামা চ পুপ্ফিতা;

অসনা মধুগন্ধী চ, পুপ্ফিতা তে মমস্সমে.

১০৬. ‘‘উদ্দালকা পাটলিকা, যূথিকা চ পিযঙ্গুকা;

বিম্বিজালকসঞ্ছন্না, সমন্তা অড্ঢযোজনং.

১০৭. ‘‘মাতগ্গাৰা [মাতঙ্গৱা (সী.), মাতকৰা (স্যা.), মাতঙ্গা ৱা (পী.)] সত্তলিযো, পাটলী সিন্দুৱাৰকা;

অঙ্কোলকা বহূ তত্থ, তালকুট্ঠি [তালকূটা (সী. স্যা.), তালকুট্ঠা (পী.)] চ পুপ্ফিতা;

সেলেয্যকা বহূ তত্থ, পুপ্ফিতা মম অস্সমে.

১০৮. ‘‘এতেসু পুপ্ফজাতেসু [পুপ্ফমানেসু (সী. পী.)], সোভন্তি পাদপা বহূ;

সমন্তা তেন গন্ধেন, ৱাযতে মম অস্সমো.

১০৯. ‘‘হৰীতকা আমলকা, অম্বজম্বুৱিভীতকা [ৱিভিটকা (সী.)];

কোলা ভল্লাতকা বিল্লা, ফাৰুসকফলানি চ.

১১০. ‘‘তিন্দুকা চ পিযালা চ, মধুকা কাসুমাৰযো;

লবুজা পনসা তত্থ, কদলী বদৰীফলা [মন্দৰিফলা (ক.), চন্দৰীফলা (স্যা. পী.)].

১১১. ‘‘অম্বাটকা বহূ তত্থ, ৱল্লিকাৰফলানি চ;

বীজপূৰসপাৰিযো [চিৰসংৰসপাকা চ (স্যা.), ৱিটপা চ সপাকা চ (পী), ৱিদপৰপদাদযো (ক.)], ফলিতা মম অস্সমে.

১১২. ‘‘আড়কা ইসিমুগ্গা চ, ততো মোদফলা বহূ;

অৱটা পক্কভৰিতা [সক্কৰাৰিতা (ক.)], পিলক্খুদুম্বৰানি চ.

১১৩. ‘‘পিপ্ফিলী মৰীচা তত্থ, নিগ্ৰোধা চ কপিত্থনা;

উদুম্বৰকা বহৱো, কণ্ডুপণ্ণা চ হৰিযো [কণ্ডপক্কা চ পাৰিযো (সী. স্যা. পী.)].

১১৪. ‘‘এতে চঞ্ঞে চ বহৱো, ফলিতা অস্সমে মম;

পুপ্ফৰুক্খাপি বহৱো, পুপ্ফিতা মম অস্সমে.

১১৫. ‘‘আলুৱা চ কড়ম্বা চ, বিড়ালী তক্কলানি চ;

আলকা তালকা চেৱ, ৱিজ্জন্তি অস্সমে মম.

১১৬. ‘‘অস্সমস্সাৱিদূৰে মে, মহাজাতস্সৰো অহু;

অচ্ছোদকো সীতজলো, সুপতিত্থো মনোৰমো.

১১৭. ‘‘পদুমুপ্পলা বহূ তত্থ, পুণ্ডৰীকসমাযুতা;

মন্দালকেহি সঞ্ছন্না, নানাগন্ধসমেৰিতা.

১১৮. ‘‘গব্ভং গণ্হন্তি পদুমা, অঞ্ঞে পুপ্ফন্তি কেসৰী;

ওপুপ্ফপত্তা তিট্ঠন্তি, পদুমাকণ্ণিকা বহূ.

১১৯. ‘‘মধু ভিসম্হা সৱতি, খীৰং সপ্পি মুলাড়িভি;

সমন্তা তেন গন্ধেন, নানাগন্ধসমেৰিতা.

১২০. ‘‘কুমুদা অম্বগন্ধি চ, নযিতা দিস্সৰে বহূ;

জাতস্সৰস্সানুকূলং, কেতকা পুপ্ফিতা বহূ.

১২১. ‘‘সুফুল্লা বন্ধুজীৱা চ, সেতৱাৰী সুগন্ধিকা;

কুম্ভিলা সুসুমাৰা চ, গহকা তত্থ জাযৰে.

১২২. ‘‘উগ্গাহকা অজগৰা, তত্থ জাতস্সৰে বহূ;

পাঠীনা পাৱুসা মচ্ছা, বলজা মুঞ্জৰোহিতা.

১২৩. ‘‘মচ্ছকচ্ছপসঞ্ছন্না, অথো পপটকাহি [পম্পটকেহি (সী.), সপটকেহি (স্যা.), পপ্পটকেহি (পী)] চ;

পাৰেৱতা ৰৱিহংসা, কুকুত্থা [কুক্কুত্থা (স্যা. ক.), কুত্থকা (পী.)] চ নদীচৰা.

১২৪. ‘‘দিন্দিভা [টিট্টিভা (পী.)] চক্কৱাকা চ, পম্পকা জীৱজীৱকা;

কলন্দকা উক্কুসা চ, সেনকা উদ্ধৰা বহূ.

১২৫. ‘‘কোট্ঠকা সুকপোতা চ, তুলিযা চমৰা বহূ;

কাৰেনিযো [কাসেনিযা (স্যা.)] চ তিলকা [কিলকা (ক.)], উপজীৱন্তি তং সৰং.

১২৬. ‘‘সীহা ব্যগ্ঘা চ দীপী চ, অচ্ছকোকতৰচ্ছকা;

ৱানৰা কিন্নৰা চেৱ, দিস্সন্তি মম অস্সমে.

১২৭. ‘‘তানি গন্ধানি ঘাযন্তো, ভক্খযন্তো ফলানহং;

গন্ধোদকং পিৱন্তো চ, ৱসামি মম অস্সমে.

১২৮. ‘‘এণীমিগা ৱৰাহা চ, পসদা খুদ্দৰূপকা;

অগ্গিকা জোতিকা চেৱ, ৱসন্তি মম অস্সমে.

১২৯. ‘‘হংসা কোঞ্চা মযূৰা চ, সালিকাপি চ কোকিলা;

মজ্জাৰিকা [মঞ্জৰিকা (সী. স্যা. পী.)] বহূ তত্থ, কোসিকা পোট্ঠসীসকা.

১৩০. ‘‘পিসাচা দানৱা চেৱ, কুম্ভণ্ডা ৰক্খসা বহূ;

গৰুড়া পন্নগা চেৱ, ৱসন্তি মম অস্সমে.

১৩১. ‘‘মহানুভাৱা ইসযো, সন্তচিত্তা সমাহিতা;

কমণ্ডলুধৰা সব্বে, অজিনুত্তৰৱাসনা;

জটাভাৰভৰিতাৱ [তে জটাভাৰভৰিতা (সী. পী.), জটাভাৰভৰিতা চ (স্যা.)], ৱসন্তি মম অস্সমে.

১৩২. ‘‘যুগমত্তঞ্চ পেক্খন্তা, নিপকা সন্তৱুত্তিনো;

লাভালাভেন সন্তুট্ঠা, ৱসন্তি মম অস্সমে.

১৩৩. ‘‘ৱাকচীৰং ধুনন্তা তে, ফোটেন্তাজিনচম্মকং;

সবলেহি উপত্থদ্ধা, গচ্ছন্তি অম্বৰে তদা.

১৩৪. ‘‘ন তে দকং আহৰন্তি, কট্ঠং ৱা অগ্গিদাৰুকং;

সযঞ্চ উপসম্পন্না, পাটিহীৰস্সিদং ফলং.

১৩৫. ‘‘লোহদোণিং গহেত্ৱান, ৱনমজ্ঝে ৱসন্তি তে;

কুঞ্জৰাৱ মহানাগা, অসম্ভীতাৱ কেসৰী.

১৩৬. ‘‘অঞ্ঞে গচ্ছন্তি গোযানং, অঞ্ঞে পুব্বৱিদেহকং [পুব্বৱিদেহনং (স্যা. পী. ক.)];

অঞ্ঞে চ উত্তৰকুৰুং, সকং বলমৱস্সিতা [বলমপস্সিতা (স্যা. পী. ক.)].

১৩৭. ‘‘ততো পিণ্ডং আহৰিত্ৱা, পৰিভুঞ্জন্তি একতো;

সব্বেসং পক্কমন্তানং, উগ্গতেজান তাদিনং.

১৩৮. ‘‘অজিনচম্মসদ্দেন, ৱনং সদ্দাযতে তদা;

এদিসা তে মহাৱীৰ, সিস্সা উগ্গতপা মম.

১৩৯. ‘‘পৰিৱুতো অহং তেহি, ৱসামি মম অস্সমে;

তোসিতা সককম্মেন, ৱিনীতাপি সমাগতা.

১৪০. ‘‘আৰাধযিংসু মং এতে, সককম্মাভিলাসিনো;

সীলৱন্তো চ নিপকা, অপ্পমঞ্ঞাসু কোৱিদা.

১৪১. ‘‘পদুমুত্তৰো লোকৱিদূ, আহুতীনং পটিগ্গহো;

সমযং সংৱিদিত্ৱান, উপগচ্ছি ৱিনাযকো.

১৪২. ‘‘উপগন্ত্ৱান সম্বুদ্ধো, আতাপী নিপকো মুনি;

পত্তং পগ্গয্হ সম্বুদ্ধো, ভিক্খায মমুপাগমি.

১৪৩. ‘‘উপাগতং মহাৱীৰং, জলজুত্তমনাযকং;

তিণসন্থৰং [তিণত্থৰং (স্যা.), তিণত্থতং (ক.)] পঞ্ঞাপেত্ৱা, সালপুপ্ফেহি ওকিৰিং.

১৪৪. ‘‘নিসাদেত্ৱান [নিসীদেত্ৱান (সী.), নিসীদিত্ৱান (স্যা. পী.)] সম্বুদ্ধং, হট্ঠো সংৱিগ্গমানসো;

খিপ্পং পব্বতমাৰুয্হ, অগড়ুং [অগৰুং (সী.)] অগ্গহিং অহং.

১৪৫. ‘‘কুম্ভমত্তং গহেত্ৱান, পনসং দেৱগন্ধিকং;

খন্ধে আৰোপযিত্ৱান, উপগচ্ছিং ৱিনাযকং.

১৪৬. ‘‘ফলং বুদ্ধস্স দত্ৱান, অগড়ুং অনুলিম্পহং;

পসন্নচিত্তো সুমনো, বুদ্ধসেট্ঠং অৱন্দিহং.

১৪৭. ‘‘পদুমুত্তৰো লোকৱিদূ, আহুতীনং পটিগ্গহো;

ইসিমজ্ঝে নিসীদিত্ৱা, ইমা গাথা অভাসথ.

১৪৮. ‘‘‘যো মে ফলঞ্চ অগড়ুং, আসনঞ্চ অদাসি মে;

তমহং কিত্তযিস্সামি, সুণাথ মম ভাসতো.

১৪৯. ‘‘‘গামে ৱা যদি ৱাৰঞ্ঞে, পব্ভাৰেসু গুহাসু ৱা;

ইমস্স চিত্তমঞ্ঞায, নিব্বত্তিস্সতি ভোজনং.

১৫০. ‘‘‘দেৱলোকে মনুস্সে ৱা, উপপন্নো অযং নৰো;

ভোজনেহি চ ৱত্থেহি, পৰিসং তপ্পযিস্সতি.

১৫১. ‘‘‘উপপজ্জতি যং যোনিং, দেৱত্তং অথ মানুসং;

অক্খোভভোগো হুত্ৱান, সংসৰিস্সতিযং নৰো.

১৫২. ‘‘‘তিংসকপ্পসহস্সানি, দেৱলোকে ৰমিস্সতি;

সহস্সক্খত্তুং ৰাজা চ, চক্কৱত্তী ভৱিস্সতি.

১৫৩. ‘‘‘একসত্ততিক্খত্তুঞ্চ, দেৱৰজ্জং কৰিস্সতি;

পদেসৰজ্জং ৱিপুলং, গণনাতো অসঙ্খিযং.

১৫৪. ‘‘‘কপ্পসতসহস্সম্হি, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

১৫৫. ‘‘‘তস্স ধম্মেসু দাযাদো, ওৰসো ধম্মনিম্মিতো [(উপসীৱো নাম নামেন, হেস্সতি সত্থু সাৱকো) (স্যা.)];

সব্বাসৱে পৰিঞ্ঞায, ৱিহৰিস্সতিনাসৱো’.

১৫৬. ‘‘সুলদ্ধলাভো লদ্ধো মে, যোহং অদ্দক্খিং নাযকং;

তিস্সো ৱিজ্জা অনুপ্পত্তা, কতং বুদ্ধস্স সাসনং.

১৫৭. ‘‘গামে ৱা যদি ৱাৰঞ্ঞে, পব্ভাৰেসু গুহাসু ৱা;

মম সঙ্কপ্পমঞ্ঞায, ভোজনং হোতি মে সদা.

১৫৮. ‘‘কিলেসা ঝাপিতা ময্হং…পে… ৱিহৰামি অনাসৱো.

১৫৯. ‘‘স্ৱাগতং ৱত মে আসি…পে… কতং বুদ্ধস্স সাসনং.

১৬০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উপসীৱো [উপসিৱো (ক.)] থেৰো ইমা গাথাযো অভাসিত্থাতি.

উপসীৱত্থেৰস্সাপদানং পঞ্চমং.