৯. ধম্মচক্কিকত্থেৰঅপদানং

১০২. ‘‘সিদ্ধত্থস্স ভগৱতো, সীহাসনস্স সম্মুখা;

ধম্মচক্কং মে ঠপিতং, সুকতং ৱিঞ্ঞুৱণ্ণিতং.

১০৩. ‘‘চাৰুৱণ্ণোৱ সোভামি, সযোগ্গবলৱাহনো;

পৰিৱাৰেন্তি মং নিচ্চং, অনুযন্তা বহুজ্জনা.

১০৪. ‘‘সট্ঠিতূৰিযসহস্সেহি, পৰিচাৰেমহং সদা;

পৰিৱাৰেন সোভামি, পুঞ্ঞকম্মস্সিদং ফলং.

১০৫. ‘‘চতুন্নৱুতিতো কপ্পে, যং চক্কং ঠপযিং অহং;

দুগ্গতিং নাভিজানামি, ধম্মচক্কস্সিদং ফলং.

১০৬. ‘‘ইতো একাদসে কপ্পে, অট্ঠাসিংসু জনাধিপা;

সহস্সৰাজনামেন, চক্কৱত্তী মহব্বলা.

১০৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ধম্মচক্কিকো থেৰো ইমা গাথাযো অভাসিত্থাতি.

ধম্মচক্কিকত্থেৰস্সাপদানং নৱমং.