১০. কপ্পৰুক্খিযত্থেৰঅপদানং

১০৮. ‘‘সিদ্ধত্থস্স ভগৱতো, থূপসেট্ঠস্স সম্মুখা;

ৱিচিত্তদুস্সে লগেত্ৱা [লগ্গেত্ৱা (সী. স্যা.)], কপ্পৰুক্খং ঠপেসহং.

১০৯. ‘‘যং যং যোনুপপজ্জামি, দেৱত্তং অথ মানুসং;

সোভযন্তো মম দ্ৱাৰং, কপ্পৰুক্খো পতিট্ঠতি.

১১০. ‘‘অহঞ্চ পৰিসা চেৱ, যে কেচি মম ৱস্সিতা [নিস্সিতা (সী.)];

তম্হা দুস্সং গহেত্ৱান, নিৱাসেম মযং সদা [তদা (স্যা.)].

১১১. ‘‘চতুন্নৱুতিতো কপ্পে, যং ৰুক্খং ঠপযিং অহং;

দুগ্গতিং নাভিজানামি, কপ্পৰুক্খস্সিদং ফলং.

১১২. ‘‘ইতো চ সত্তমে কপ্পে, সুচেড়া অট্ঠ খত্তিযা;

সত্তৰতনসম্পন্না, চক্কৱত্তী মহব্বলা.

১১৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কপ্পৰুক্খিযো থেৰো ইমা গাথাযো অভাসিত্থাতি.

কপ্পৰুক্খিযত্থেৰস্সাপদানং দসমং.

কুণ্ডধানৱগ্গো চতুত্থো.