২. লবুজদাযকত্থেৰঅপদানং

৭. ‘‘নগৰে বন্ধুমতিযা, আসিং আৰামিকো তদা;

অদ্দসং ৱিৰজং বুদ্ধং, গচ্ছন্তং অনিলঞ্জসে.

৮. ‘‘লবুজস্স ফলং গয্হ, বুদ্ধসেট্ঠস্সদাসহং;

আকাসে ঠিতকো সন্তো, পটিগণ্হি মহাযসো.

৯. ‘‘ৱিত্তিসঞ্জননং ময্হং, দিট্ঠধম্মসুখাৱহং;

ফলং বুদ্ধস্স দত্ৱান, ৱিপ্পসন্নেন চেতসা.

১০. ‘‘অধিগচ্ছিং তদা পীতিং, ৱিপুলঞ্চ সুখুত্তমং;

উপ্পজ্জতেৱ ৰতনং, নিব্বত্তস্স তহিং তহিং.

১১. ‘‘একনৱুতিতো কপ্পে, যং ফলমদদিং তদা;

দুগ্গতিং নাভিজানামি, ফলদানস্সিদং ফলং.

১২. ‘‘কিলেসা ঝাপিতা ময্হং…পে… ৱিহৰামি অনাসৱো.

১৩. ‘‘স্ৱাগতং ৱত মে আসি…পে… কতং বুদ্ধস্স সাসনং.

১৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা লবুজদাযকো থেৰো ইমা গাথাযো অভাসিত্থাতি.

লবুজদাযকত্থেৰস্সাপদানং দুতিযং.