৩৯. অৱটফলৱগ্গো

১. অৱটফলদাযকত্থেৰঅপদানং

১. ‘‘সতৰংসি নাম ভগৱা, সযম্ভূ অপৰাজিতো;

ৱিৱেককামো সম্বুদ্ধো, গোচৰাযাভিনিক্খমি.

২. ‘‘ফলহত্থো অহং দিস্ৱা, উপগচ্ছিং নৰাসভং;

পসন্নচিত্তো সুমনো, অৱটং [অৱণ্টং (সী.), অম্বটং (স্যা.)] অদদিং ফলং.

৩. ‘‘চতুন্নৱুতিতো কপ্পে, যং ফলমদদিং অহং;

দুগ্গতিং নাভিজানামি, ফলদানস্সিদং ফলং.

৪. ‘‘কিলেসা ঝাপিতা ময্হং, ভৱা সব্বে সমূহতা;

নাগোৱ বন্ধনং ছেত্ৱা, ৱিহৰামি অনাসৱো.

৫. ‘‘স্ৱাগতং ৱত মে আসি, মম বুদ্ধস্স সন্তিকে;

তিস্সো ৱিজ্জা অনুপ্পত্তা, কতং বুদ্ধস্স সাসনং.

৬. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা অৱটফলদাযকো থেৰো ইমা গাথাযো অভাসিত্থাতি.

অৱটফলদাযকত্থেৰস্সাপদানং পঠমং.

২. লবুজদাযকত্থেৰঅপদানং

৭. ‘‘নগৰে বন্ধুমতিযা, আসিং আৰামিকো তদা;

অদ্দসং ৱিৰজং বুদ্ধং, গচ্ছন্তং অনিলঞ্জসে.

৮. ‘‘লবুজস্স ফলং গয্হ, বুদ্ধসেট্ঠস্সদাসহং;

আকাসে ঠিতকো সন্তো, পটিগণ্হি মহাযসো.

৯. ‘‘ৱিত্তিসঞ্জননং ময্হং, দিট্ঠধম্মসুখাৱহং;

ফলং বুদ্ধস্স দত্ৱান, ৱিপ্পসন্নেন চেতসা.

১০. ‘‘অধিগচ্ছিং তদা পীতিং, ৱিপুলঞ্চ সুখুত্তমং;

উপ্পজ্জতেৱ ৰতনং, নিব্বত্তস্স তহিং তহিং.

১১. ‘‘একনৱুতিতো কপ্পে, যং ফলমদদিং তদা;

দুগ্গতিং নাভিজানামি, ফলদানস্সিদং ফলং.

১২. ‘‘কিলেসা ঝাপিতা ময্হং…পে… ৱিহৰামি অনাসৱো.

১৩. ‘‘স্ৱাগতং ৱত মে আসি…পে… কতং বুদ্ধস্স সাসনং.

১৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা লবুজদাযকো থেৰো ইমা গাথাযো অভাসিত্থাতি.

লবুজদাযকত্থেৰস্সাপদানং দুতিযং.

৩. উদুম্বৰফলদাযকত্থেৰঅপদানং

১৫. ‘‘ৱিনতানদিযা তীৰে, ৱিহাসি পুৰিসুত্তমো;

অদ্দসং ৱিৰজং বুদ্ধং, একগ্গং সুসমাহিতং.

১৬. ‘‘তস্মিং পসন্নমানসো, কিলেসমলধোৱনে;

উদুম্বৰফলং গয্হ, বুদ্ধসেট্ঠস্সদাসহং.

১৭. ‘‘একনৱুতিতো কপ্পে, যং ফলমদদিং তদা;

দুগ্গতিং নাভিজানামি, ফলদানস্সিদং ফলং.

১৮. ‘‘কিলেসা ঝাপিতা ময্হং…পে… ৱিহৰামি অনাসৱো.

১৯. ‘‘স্ৱাগতং ৱত মে আসি…পে… কতং বুদ্ধস্স সাসনং.

২০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উদুম্বৰফলদাযকো থেৰো ইমা গাথাযো অভাসিত্থাতি.

উদুম্বৰফলদাযকত্থেৰস্সাপদানং ততিযং.

৪. পিলক্খফলদাযকত্থেৰঅপদানং

২১. ‘‘ৱনন্তৰে বুদ্ধং দিস্ৱা, অত্থদস্সিং মহাযসং;

পসন্নচিত্তো সুমনো, পিলক্খস্সাদদিং ফলং [পিলক্খস্স ফলং অদং (সী.), পিলক্খুস্স ফলং অদং (স্যা.)].

২২. ‘‘অট্ঠাৰসে কপ্পসতে, যং ফলমদদিং তদা;

দুগ্গতিং নাভিজানামি, ফলদানস্সিদং ফলং.

২৩. ‘‘কিলেসা ঝাপিতা ময্হং…পে… ৱিহৰামি অনাসৱো.

২৪. ‘‘স্ৱাগতং ৱত মে আসি…পে… কতং বুদ্ধস্স সাসনং.

২৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পিলক্খফলদাযকো থেৰো ইমা গাথাযো অভাসিত্থাতি.

পিলক্খফলদাযকত্থেৰস্সাপদানং চতুত্থং.

৫. ফাৰুসফলদাযকত্থেৰঅপদানং

২৬. ‘‘সুৱণ্ণৱণ্ণং সম্বুদ্ধং, আহুতীনং পটিগ্গহং;

ৰথিযং পটিপজ্জন্তং, ফাৰুসফলমদাসহং.

২৭. ‘‘একনৱুতিতো কপ্পে, যং ফলমদদিং অহং;

দুগ্গতিং নাভিজানামি, ফলদানস্সিদং ফলং.

২৮. ‘‘কিলেসা ঝাপিতা ময্হং…পে… ৱিহৰামি অনাসৱো.

২৯. ‘‘স্ৱাগতং ৱত মে আসি…পে… কতং বুদ্ধস্স সাসনং.

৩০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ফাৰুসফলদাযকো থেৰো ইমা গাথাযো অভাসিত্থাতি.

ফাৰুসফলদাযকত্থেৰস্সাপদানং পঞ্চমং.

৬. ৱল্লিফলদাযকত্থেৰঅপদানং

৩১. ‘‘সব্বে জনা সমাগম্ম, অগমিংসু ৱনং তদা;

ফলমন্ৱেসমানা তে, অলভিংসু ফলং তদা.

৩২. ‘‘তত্থদ্দসাসিং সম্বুদ্ধং, সযম্ভুং অপৰাজিতং;

পসন্নচিত্তো সুমনো, ৱল্লিফলমদাসহং.

৩৩. ‘‘একত্তিংসে ইতো কপ্পে, যং ফলমদদিং তদা;

দুগ্গতিং নাভিজানামি, ফলদানস্সিদং ফলং.

৩৪. ‘‘কিলেসা ঝাপিতা ময্হং…পে… ৱিহৰামি অনাসৱো.

৩৫. ‘‘স্ৱাগতং ৱত মে আসি…পে… কতং বুদ্ধস্স সাসনং.

৩৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৱল্লিফলদাযকো থেৰো ইমা গাথাযো অভাসিত্থাতি.

ৱল্লিফলদাযকত্থেৰস্সাপদানং ছট্ঠং.

৭. কদলিফলদাযকত্থেৰঅপদানং

৩৭. ‘‘কণিকাৰংৱ জলিতং, পুণ্ণমাযেৱ [পুণ্ণমাসেৱ (সী. ক.)] চন্দিমং;

জলন্তং দীপৰুক্খংৱ, অদ্দসং লোকনাযকং.

৩৮. ‘‘কদলিফলং পগ্গয্হ, অদাসিং সত্থুনো অহং;

পসন্নচিত্তো সুমনো, ৱন্দিত্ৱান অপক্কমিং.

৩৯. ‘‘একত্তিংসে ইতো কপ্পে, যং ফলমদদিং তদা;

দুগ্গতিং নাভিজানামি, ফলদানস্সিদং ফলং.

৪০. ‘‘কিলেসা ঝাপিতা ময্হং…পে… ৱিহৰামি অনাসৱো.

৪১. ‘‘স্ৱাগতং ৱত মে আসি…পে… কতং বুদ্ধস্স সাসনং.

৪২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কদলিফলদাযকো থেৰো ইমা গাথাযো অভাসিত্থাতি.

কদলিফলদাযকত্থেৰস্সাপদানং সত্তমং.

৮. পনসফলদাযকত্থেৰঅপদানং

৪৩. ‘‘অজ্জুনো নাম সম্বুদ্ধো, হিমৱন্তে ৱসী তদা;

চৰণেন চ সম্পন্নো, সমাধিকুসলো মুনি.

৪৪. ‘‘কুম্ভমত্তং গহেত্ৱান, পনসং জীৱজীৱকং [দেৱগন্ধিকং (৪১ ৱগ্গে, ৫ অপদানে)];

ছত্তপণ্ণে ঠপেত্ৱান, অদাসিং সত্থুনো অহং.

৪৫. ‘‘একত্তিংসে ইতো কপ্পে, যং ফলমদদিং তদা;

দুগ্গতিং নাভিজানামি, ফলদানস্সিদং ফলং.

৪৬. ‘‘কিলেসা ঝাপিতা ময্হং…পে… ৱিহৰামি অনাসৱো.

৪৭. ‘‘স্ৱাগতং ৱত মে আসি…পে… কতং বুদ্ধস্স সাসনং.

৪৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পনসফলদাযকো থেৰো ইমা গাথাযো অভাসিত্থাতি.

পনসফলদাযকত্থেৰস্সাপদানং অট্ঠমং.

৯. সোণকোটিৱীসত্থেৰঅপদানং

৪৯. ‘‘ৱিপস্সিনো পাৱচনে, একং লেণং মযা কতং;

চাতুদ্দিসস্স সঙ্ঘস্স, বন্ধুমাৰাজধানিযা.

৫০. ‘‘দুস্সেহি ভূমিং লেণস্স, সন্থৰিত্ৱা পৰিচ্চজিং;

উদগ্গচিত্তো সুমনো, অকাসিং পণিধিং তদা.

৫১. ‘‘আৰাধযেয্যং সম্বুদ্ধং, পব্বজ্জঞ্চ লভেয্যহং;

অনুত্তৰঞ্চ নিব্বানং, ফুসেয্যং সন্তিমুত্তমং.

৫২. ‘‘তেনেৱ সুক্কমূলেন, কপ্পে [কপ্পং (সী.), কপ্প (ক.)] নৱুতি সংসৰিং;

দেৱভূতো মনুস্সো চ, কতপুঞ্ঞো ৱিৰোচহং.

৫৩. ‘‘ততো কম্মাৱসেসেন, ইধ পচ্ছিমকে ভৱে;

চম্পাযং অগ্গসেট্ঠিস্স, জাতোম্হি একপুত্তকো.

৫৪. ‘‘জাতমত্তস্স মে সুত্ৱা, পিতু ছন্দো অযং অহু;

দদামহং কুমাৰস্স, ৱীসকোটী অনূনকা.

৫৫. ‘‘চতুৰঙ্গুলা চ মে লোমা, জাতা পাদতলে উভো;

সুখুমা মুদুসম্ফস্সা, তূলাপিচুসমা সুভা.

৫৬. ‘‘অতীতা নৱুতি কপ্পা, অযং একো চ উত্তৰি;

নাভিজানামি নিক্খিত্তে, পাদে ভূম্যা অসন্থতে.

৫৭. ‘‘আৰাধিতো মে সম্বুদ্ধো, পব্বজিং অনগাৰিযং;

অৰহত্তঞ্চ মে পত্তং, সীতিভূতোম্হি নিব্বুতো.

৫৮. ‘‘অগ্গো আৰদ্ধৱীৰিযানং, নিদ্দিট্ঠো সব্বদস্সিনা;

খীণাসৱোম্হি অৰহা, ছড়ভিঞ্ঞো মহিদ্ধিকো.

৫৯. ‘‘একনৱুতিতো কপ্পে, যং দানমদদিং তদা;

দুগ্গতিং নাভিজানামি, লেণদানস্সিদং ফলং.

৬০. ‘‘কিলেসা ঝাপিতা ময্হং…পে… ৱিহৰামি অনাসৱো.

৬১. ‘‘স্ৱাগতং ৱত মে আসি…পে… কতং বুদ্ধস্স সাসনং.

৬২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

৬৩. ‘‘থেৰো কোটিৱীসো [কোটিৱিসো (স্যা. ক.), কোড়িৱিসো (অঞ্ঞট্ঠানেসু)] সোণো, ভিক্খুসঙ্ঘস্স অগ্গতো;

পঞ্হং পুট্ঠো ৱিযাকাসি, অনোতত্তে মহাসৰে’’তি.

ইত্থং সুদং আযস্মা সোণো কোটিৱীসো থেৰো ইমা গাথাযো অভাসিত্থাতি.

সোণকোটিৱীসত্থেৰস্সাপদানং নৱমং.

১০. পুব্বকম্মপিলোতিকবুদ্ধঅপদানং

৬৪. ‘‘অনোতত্তসৰাসন্নে, ৰমণীযে সিলাতলে;

নানাৰতনপজ্জোতে, নানাগন্ধৱনন্তৰে.

৬৫. ‘‘মহতা ভিক্খুসঙ্ঘেন, পৰেতো [উপেতো (উদানট্ঠকথাযং ৪ ৱগ্গে, ৮ সুত্তে)] লোকনাযকো;

আসীনো ব্যাকৰী তত্থ, পুব্বকম্মানি অত্তনো.

৬৬. [সুণাথ ভিক্খৱে ময্হং, যং কম্মং পকতং মযা; একং অৰঞ্ঞিকং ভিক্খুং, দিস্ৱা দিন্নং পিলোতিকং; পত্থিতং পঠমং বুদ্ধং, বুদ্ধত্তায মযা তদা; পিলোতিযস্স কম্মস্স, বুদ্ধত্তেপি ৱিপচ্চতি; গোপালকো পুৰে আসিং, গাৱিং পাজেতি গোচৰং; পিৱন্তিং উদকং আৱিলং, গাৱিং দিস্ৱা নিৱাৰযিং; তেন কম্মৱিপাকেন, ইধ পচ্ছিমকে ভৱে; ৱিপাসিতো যদিচ্ছকং, ন হি পাতুং লভামহং (স্যা.)] ‘‘সুণাথ ভিক্খৱো ময্হং, যং কম্মং পকতং মযা;

পিলোতিকস্স কম্মস্স, বুদ্ধত্তেপি ৱিপচ্চতি [সুণাথ ভিক্খৱে ময্হং, যং কম্মং পকতং মযা; একং অৰঞ্ঞিকং ভিক্খুং, দিস্ৱা দিন্নং পিলোতিকং; পত্থিতং পঠমং বুদ্ধং, বুদ্ধত্তায মযা তদা; পিলোতিযস্স কম্মস্স, বুদ্ধত্তেপি ৱিপচ্চতি; গোপালকো পুৰে আসিং, গাৱিং পাজেতি গোচৰং; পিৱন্তিং উদকং আৱিলং, গাৱিং দিস্ৱা নিৱাৰযিং; তেন কম্মৱিপাকেন, ইধ পচ্ছিমকে ভৱে; ৱিপাসিতো যদিচ্ছকং, ন হি পাতুং লভামহং (স্যা.)].

[১]

৬৭. ‘‘মুনাড়ি নামহং ধুত্তো, পুব্বে অঞ্ঞাসু জাতিসু [অঞ্ঞায জাতিযা (উদান অট্ঠ.)];

পচ্চেকবুদ্ধং সুৰভিং [সৰভুং (সী.)], অব্ভাচিক্খিং অদূসকং.

৬৮. ‘‘তেন কম্মৱিপাকেন, নিৰযে সংসৰিং চিৰং;

বহূৱস্সসহস্সানি, দুক্খং ৱেদেসি ৱেদনং.

৬৯. ‘‘তেন কম্মাৱসেসেন, ইধ পচ্ছিমকে ভৱে;

অব্ভক্খানং মযা লদ্ধং, সুন্দৰিকায কাৰণা.

[২]

৭০. ‘‘সব্বাভিভুস্স বুদ্ধস্স, নন্দো নামাসি সাৱকো;

তং অব্ভক্খায নিৰযে, চিৰং সংসৰিতং মযা.

৭১. ‘‘দসৱস্সসহস্সানি, নিৰযে সংসৰিং চিৰং;

মনুস্সভাৱং লদ্ধাহং, অব্ভক্খানং বহুং লভিং.

৭২. ‘‘তেন কম্মাৱসেসেন, চিঞ্চমানৱিকা মমং;