১. একপদুমিযত্থেৰঅপদানং

১. ‘‘পদুমুত্তৰো নাম জিনো, সব্বধম্মান পাৰগূ;

ভৱাভৱে ৱিভাৱেন্তো, তাৰেসি জনতং বহুং.

২. ‘‘হংসৰাজা তদা হোমি, দিজানং পৱৰো অহং;

জাতস্সৰং সমোগয্হ, কীড়ামি হংসকীড়িতং.

৩. ‘‘পদুমুত্তৰো লোকৱিদূ, আহুতীনং পটিগ্গহো;

জাতস্সৰস্স উপৰি, আগচ্ছি তাৱদে জিনো.

৪. ‘‘দিস্ৱানহং দেৱদেৱং, সযম্ভুং লোকনাযকং;

ৱণ্টে ছেত্ৱান পদুমং, সতপত্তং মনোৰমং.

৫. ‘‘মুখতুণ্ডেন পগ্গয্হ, পসন্নো লোকনাযকে [ৱিপ্পসন্নেন চেতসা (স্যা.)];

উক্খিপিত্ৱান গগণে [উক্খিপিত্ৱা নলাটেন (ক.)], বুদ্ধসেট্ঠং অপূজযিং.

৬. ‘‘পদুমুত্তৰো লোকৱিদূ, আহুতীনং পটিগ্গহো;

অন্তলিক্খে ঠিতো সত্থা, অকা মে অনুমোদনং.

৭. ‘‘‘ইমিনা একপদুমেন, চেতনাপণিধীহি চ;

কপ্পানং সতসহস্সং, ৱিনিপাতং ন গচ্ছসি’.

৮. ‘‘ইদং ৱত্ৱান সম্বুদ্ধো, জলজুত্তমনামকো;

মম কম্মং পকিত্তেত্ৱা, অগমা যেন পত্থিতং.

৯. ‘‘সতসহস্সিতো কপ্পে, যং কম্মমকৰিং তদা;

দুগ্গতিং নাভিজানামি, বুদ্ধপূজাযিদং ফলং.

১০. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা একপদুমিযো থেৰো ইমা গাথাযো অভাসিত্থাতি.

একপদুমিযত্থেৰস্সাপদানং পঠমং.