৩৫. একপদুমিযৱগ্গো

১. একপদুমিযত্থেৰঅপদানং

১. ‘‘পদুমুত্তৰো নাম জিনো, সব্বধম্মান পাৰগূ;

ভৱাভৱে ৱিভাৱেন্তো, তাৰেসি জনতং বহুং.

২. ‘‘হংসৰাজা তদা হোমি, দিজানং পৱৰো অহং;

জাতস্সৰং সমোগয্হ, কীড়ামি হংসকীড়িতং.

৩. ‘‘পদুমুত্তৰো লোকৱিদূ, আহুতীনং পটিগ্গহো;

জাতস্সৰস্স উপৰি, আগচ্ছি তাৱদে জিনো.

৪. ‘‘দিস্ৱানহং দেৱদেৱং, সযম্ভুং লোকনাযকং;

ৱণ্টে ছেত্ৱান পদুমং, সতপত্তং মনোৰমং.

৫. ‘‘মুখতুণ্ডেন পগ্গয্হ, পসন্নো লোকনাযকে [ৱিপ্পসন্নেন চেতসা (স্যা.)];

উক্খিপিত্ৱান গগণে [উক্খিপিত্ৱা নলাটেন (ক.)], বুদ্ধসেট্ঠং অপূজযিং.

৬. ‘‘পদুমুত্তৰো লোকৱিদূ, আহুতীনং পটিগ্গহো;

অন্তলিক্খে ঠিতো সত্থা, অকা মে অনুমোদনং.

৭. ‘‘‘ইমিনা একপদুমেন, চেতনাপণিধীহি চ;

কপ্পানং সতসহস্সং, ৱিনিপাতং ন গচ্ছসি’.

৮. ‘‘ইদং ৱত্ৱান সম্বুদ্ধো, জলজুত্তমনামকো;

মম কম্মং পকিত্তেত্ৱা, অগমা যেন পত্থিতং.

৯. ‘‘সতসহস্সিতো কপ্পে, যং কম্মমকৰিং তদা;

দুগ্গতিং নাভিজানামি, বুদ্ধপূজাযিদং ফলং.

১০. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা একপদুমিযো থেৰো ইমা গাথাযো অভাসিত্থাতি.

একপদুমিযত্থেৰস্সাপদানং পঠমং.

২. তীণুপ্পলমালিযত্থেৰঅপদানং

১১. ‘‘চন্দভাগানদীতীৰে, অহোসিং ৱানৰো তদা;

অদ্দসং ৱিৰজং বুদ্ধং, নিসিন্নং পব্বতন্তৰে.

১২. ‘‘ওভাসেন্তং দিসা সব্বা, সালৰাজংৱ ফুল্লিতং;

লক্খণব্যঞ্জনূপেতং, দিস্ৱা অত্তমনো অহুং.

১৩. ‘‘উদগ্গচিত্তো সুমনো, পীতিযা হট্ঠমানসো;

তীণি উপ্পলপুপ্ফানি, মত্থকে অভিৰোপযিং.

১৪. ‘‘পুপ্ফানি অভিৰোপেত্ৱা, ৱিপস্সিস্স মহেসিনো;

সগাৰৱো ভৱিত্ৱান [গমিত্ৱান (সী.), নমিত্ৱান (ক.)], পক্কামিং উত্তৰামুখো.

১৫. ‘‘গচ্ছন্তো পটিকুটিকো, ৱিপ্পসন্নেন চেতসা;

সেলন্তৰে পতিত্ৱান [পপতিত্ৱা (স্যা. ক.)], পাপুণিং জীৱিতক্খযং.

১৬. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং [পুৰিমং জাতিং (?) উপৰি ৩৮ ৱগ্গে ততিযাপদানে এৱমেৱ দিস্সতি], তাৱতিংসমগচ্ছহং.

১৭. ‘‘সতানং তীণিক্খত্তুঞ্চ, দেৱৰজ্জং অকাৰযিং;

সতানং পঞ্চক্খত্তুঞ্চ, চক্কৱত্তী অহোসহং.

১৮. ‘‘একনৱুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তীণুপ্পলমালিযো [তিউপ্পলমালিযো (সী.)] থেৰো ইমা গাথাযো অভাসিত্থাতি.

তীণুপ্পলমালিযত্থেৰস্সাপদানং দুতিযং.

৩. ধজদাযকত্থেৰঅপদানং

২০. ‘‘তিস্সো নাম অহু সত্থা, লোকজেট্ঠো নৰাসভো;

তযোপধিক্খযে [তস্সোপধিক্খযে (সী.)] দিস্ৱা, ধজং আৰোপিতং মযা.

২১. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

২২. ‘‘সতানং তীণিক্খত্তুঞ্চ, দেৱৰজ্জং অকাৰযিং;

সতানং পঞ্চক্খত্তুঞ্চ, চক্কৱত্তী অহোসহং.

২৩. ‘‘পদেসৰজ্জং ৱিপুলং, গণনাতো অসঙ্খিযং;

অনুভোমি সকং কম্মং, পুব্বে সুকতমত্তনো.

২৪. ‘‘দ্ৱেনৱুতে ইতো কপ্পে, যং কম্মমকৰিং তদা;

দুগ্গতিং নাভিজানামি, ধজদানস্সিদং ফলং.

২৫. ‘‘ইচ্ছমানো চহং অজ্জ, সকাননং সপব্বতং;

খোমদুস্সেন ছাদেয্যং, তদা ময্হং কতে ফলং.

২৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ধজদাযকো থেৰো ইমা গাথাযো অভাসিত্থাতি.

ধজদাযকত্থেৰস্সাপদানং ততিযং.

৪. তিকিঙ্কণিপূজকত্থেৰঅপদানং

২৭. ‘‘হিমৱন্তস্সাৱিদূৰে, ভূতগণো নাম পব্বতো;

তত্থদ্দসং পংসুকূলং, দুমগ্গম্হি ৱিলগ্গিতং.

২৮. ‘‘তীণি কিঙ্কণিপুপ্ফানি, ওচিনিত্ৱানহং তদা;

হট্ঠো হট্ঠেন চিত্তেন, পংসুকূলং অপূজযিং.

২৯. ‘‘একত্তিংসে ইতো কপ্পে, যং কম্মমকৰিং তদা;

দুগ্গতিং নাভিজানামি, তিণ্ণং পুপ্ফানিদং ফলং.

৩০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিকিঙ্কণিপূজকো থেৰো ইমা গাথাযো অভাসিত্থাতি.

তিকিঙ্কণিপূজকত্থেৰস্সাপদানং চতুত্থং.

৫. নড়াগাৰিকত্থেৰঅপদানং

৩১. ‘‘হিমৱন্তস্সাৱিদূৰে, হাৰিতো নাম পব্বতো;

সযম্ভূ নাৰদো নাম, ৰুক্খমূলে ৱসী তদা.

৩২. ‘‘নড়াগাৰং কৰিত্ৱান, তিণেন ছাদযিং অহং;

চঙ্কমং সোধযিত্ৱান, সযম্ভুস্স অদাসহং.

৩৩. ‘‘চতুদ্দসসু কপ্পেসু, দেৱলোকে ৰমিং অহং;

চতুসত্ততিক্খত্তুঞ্চ, দেৱৰজ্জং অকাৰযিং.

৩৪. ‘‘চতুসত্ততি [সত্তসত্ততি (সী.)] ক্খত্তুঞ্চ, চক্কৱত্তী অহোসহং;

পদেসৰজ্জং ৱিপুলং, গণনাতো অসঙ্খিযং.

৩৫. ‘‘উব্বিদ্ধং ভৱনং ময্হং, ইন্দলট্ঠীৱ উগ্গতং;

সহস্সথম্ভং অতুলং, ৱিমানং সপভস্সৰং.

৩৬. ‘‘দ্ৱে সম্পত্তী অনুভোত্ৱা, সুক্কমূলেন চোদিতো;

গোতমস্স ভগৱতো, সাসনে পব্বজিং অহং.

৩৭. ‘‘পধানপহিতত্তোম্হি, উপসন্তো নিৰূপধি;

নাগোৱ বন্ধনং ছেত্ৱা, ৱিহৰামি অনাসৱো.

৩৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা নড়াগাৰিকো থেৰো ইমা গাথাযো অভাসিত্থাতি.

নড়াগাৰিকত্থেৰস্সাপদানং পঞ্চমং.

৬. চম্পকপুপ্ফিযত্থেৰঅপদানং

৩৯. ‘‘হিমৱন্তস্সাৱিদূৰে, জাপলো [চাপলো (সী.), ছাপলো (স্যা.)] নাম পব্বতো;

বুদ্ধো সুদস্সনো নাম, ৱিহাসি পব্বতন্তৰে.

৪০. ‘‘পুপ্ফং হেমৱন্তং [হেমৱতং (সী.), হেমৱণ্ণং (স্যা.)] গয্হ, গচ্ছং ৱেহাযসেনহং;

অদ্দসং ৱিৰজং বুদ্ধং, ওঘতিণ্ণমনাসৱং.

৪১. ‘‘সত্ত চম্পকপুপ্ফানি, সীসে কত্ৱানহং তদা;

বুদ্ধস্স অভিৰোপেসিং, সযম্ভুস্স মহেসিনো.

৪২. ‘‘একত্তিংসে ইতো কপ্পে, যং পুপ্ফমভিৰোপযিং;

দুগ্গতিং নাভিজানামি, বুদ্ধপূজাযিদং ফলং.

৪৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা চম্পকপুপ্ফিযো থেৰো ইমা গাথাযো অভাসিত্থাতি.

চম্পকপুপ্ফিযত্থেৰস্সাপদানং ছট্ঠং.

৭. পদুমপূজকত্থেৰঅপদানং

৪৪. ‘‘হিমৱন্তস্সাৱিদূৰে, ৰোমসো নাম পব্বতো;

বুদ্ধোপি সম্ভৱো নাম, অব্ভোকাসে ৱসী তদা.

৪৫. ‘‘ভৱনা নিক্খমিত্ৱান, পদুমং ধাৰযিং অহং;

একাহং ধাৰযিত্ৱান, পুন ভৱনুপাগমিং.

৪৬. ‘‘একনৱুতিতো কপ্পে, যং পুপ্ফমভিৰোপযিং;

দুগ্গতিং নাভিজানামি, বুদ্ধপূজাযিদং ফলং.

৪৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পদুমপূজকো থেৰো ইমা গাথাযো অভাসিত্থাতি.

পদুমপূজকত্থেৰস্সাপদানং সত্তমং.

তেৰসমং ভাণৱাৰং.

৮. তিণমুট্ঠিদাযকত্থেৰঅপদানং

৪৮. ‘‘হিমৱন্তস্সাৱিদূৰে, লম্বকো নাম পব্বতো;

উপতিস্সো নাম সম্বুদ্ধো, অব্ভোকাসম্হি চঙ্কমি.

৪৯. ‘‘মিগলুদ্দো তদা আসিং, অৰঞ্ঞে কাননে অহং;

দিস্ৱান তং দেৱদেৱং, সযম্ভুং অপৰাজিতং.

৫০. ‘‘ৱিপ্পসন্নেন চিত্তেন, তদা তস্স মহেসিনো;

নিসীদনত্থং বুদ্ধস্স, তিণমুট্ঠিমদাসহং.

৫১. ‘‘দত্ৱান দেৱদেৱস্স, ভিয্যো চিত্তং পসাদযিং;

সম্বুদ্ধং অভিৱাদেত্ৱা, পক্কামিং উত্তৰামুখো.

৫২. ‘‘অচিৰং গতমত্তং মং, মিগৰাজা অপোথযি [অহেঠযি (সী. স্যা.)];

সীহেন পোথিতো [পাতিতো (সী. স্যা.)] সন্তো, তত্থ কালঙ্কতো অহং.

৫৩. ‘‘আসন্নে মে কতং কম্মং, বুদ্ধসেট্ঠে অনাসৱে;

সুমুত্তো সৰৱেগোৱ, দেৱলোকং অগঞ্ছহং.

৫৪. ‘‘যূপো তত্থ সুভো আসি, পুঞ্ঞকম্মাভিনিম্মিতো;

সহস্সকণ্ডো সতভেণ্ডু, ধজালু হৰিতামযো.

৫৫. ‘‘পভা নিদ্ধাৱতে তস্স, সতৰংসীৱ উগ্গতো;

আকিণ্ণো দেৱকঞ্ঞাহি, আমোদিং কামকামহং.

৫৬. ‘‘দেৱলোকা চৱিত্ৱান, সুক্কমূলেন চোদিতো;

আগন্ত্ৱান মনুস্সত্তং, পত্তোম্হি আসৱক্খযং.

৫৭. ‘‘চতুন্নৱুতিতো কপ্পে, নিসীদনমদাসহং;

দুগ্গতিং নাভিজানামি, তিণমুট্ঠিযিদং ফলং.

৫৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিণমুট্ঠিদাযকো থেৰো ইমা গাথাযো অভাসিত্থাতি.

তিণমুট্ঠিদাযকত্থেৰস্সাপদানং অট্ঠমং.

৯. তিন্দুকফলদাযকত্থেৰঅপদানং

৫৯. ‘‘কণিকাৰংৱ জোতন্তং, নিসিন্নং পব্বতন্তৰে;

অদ্দসং ৱিৰজং বুদ্ধং, ওঘতিণ্ণমনাসৱং.

৬০. ‘‘তিন্দুকং সফলং দিস্ৱা, ভিন্দিত্ৱান সকোসকং [সকোটকং (সী.), সকোটিকং (স্যা.)];

পসন্নচিত্তো সুমনো, সযম্ভুস্স মদাসহং [ৱেস্সভুস্স অদাসহং (সী.)].

৬১. ‘‘একনৱুতিতো কপ্পে, যং ফলমদদিং তদা;

দুগ্গতিং নাভিজানামি, ফলদানস্সিদং ফলং.

৬২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিন্দুকফলদাযকো থেৰো ইমা গাথাযো অভাসিত্থাতি.

তিন্দুকফলদাযকত্থেৰস্সাপদানং নৱমং.

১০. একঞ্জলিযত্থেৰঅপদানং

৬৩. ‘‘ৰোমসো [ৰেৱতো (সী.)] নাম সম্বুদ্ধো, নদীকূলে ৱসী তদা;

অদ্দসং ৱিৰজং বুদ্ধং, পীতৰংসিংৱ ভাণুমং.

৬৪. ‘‘উক্কামুখপহট্ঠংৱ, খদিৰঙ্গাৰসন্নিভং;

ওসধিংৱ ৱিৰোচন্তং, একঞ্জলিমকাসহং.