২. তীণুপ্পলমালিযত্থেৰঅপদানং

১১. ‘‘চন্দভাগানদীতীৰে, অহোসিং ৱানৰো তদা;

অদ্দসং ৱিৰজং বুদ্ধং, নিসিন্নং পব্বতন্তৰে.

১২. ‘‘ওভাসেন্তং দিসা সব্বা, সালৰাজংৱ ফুল্লিতং;

লক্খণব্যঞ্জনূপেতং, দিস্ৱা অত্তমনো অহুং.

১৩. ‘‘উদগ্গচিত্তো সুমনো, পীতিযা হট্ঠমানসো;

তীণি উপ্পলপুপ্ফানি, মত্থকে অভিৰোপযিং.

১৪. ‘‘পুপ্ফানি অভিৰোপেত্ৱা, ৱিপস্সিস্স মহেসিনো;

সগাৰৱো ভৱিত্ৱান [গমিত্ৱান (সী.), নমিত্ৱান (ক.)], পক্কামিং উত্তৰামুখো.

১৫. ‘‘গচ্ছন্তো পটিকুটিকো, ৱিপ্পসন্নেন চেতসা;

সেলন্তৰে পতিত্ৱান [পপতিত্ৱা (স্যা. ক.)], পাপুণিং জীৱিতক্খযং.

১৬. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং [পুৰিমং জাতিং (?) উপৰি ৩৮ ৱগ্গে ততিযাপদানে এৱমেৱ দিস্সতি], তাৱতিংসমগচ্ছহং.

১৭. ‘‘সতানং তীণিক্খত্তুঞ্চ, দেৱৰজ্জং অকাৰযিং;

সতানং পঞ্চক্খত্তুঞ্চ, চক্কৱত্তী অহোসহং.

১৮. ‘‘একনৱুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তীণুপ্পলমালিযো [তিউপ্পলমালিযো (সী.)] থেৰো ইমা গাথাযো অভাসিত্থাতি.

তীণুপ্পলমালিযত্থেৰস্সাপদানং দুতিযং.