৯. ধম্মসৱনিযত্থেৰঅপদানং

১১১. ‘‘পদুমুত্তৰো নাম জিনো, সব্বধম্মান পাৰগূ;

চতুসচ্চং পকাসেন্তো, সন্তাৰেসি বহুং জনং.

১১২. ‘‘অহং তেন সমযেন, জটিলো উগ্গতাপনো;

ধুনন্তো ৱাকচীৰানি, গচ্ছামি অম্বৰে তদা.

১১৩. ‘‘বুদ্ধসেট্ঠস্স উপৰি, গন্তুং ন ৱিসহামহং;

পক্খীৱ সেলমাসজ্জ [সেলমাপজ্জ (স্যা.)], গমনং ন লভামহং.

১১৪. ‘‘ন মে ইদং ভূতপুব্বং, ইৰিযস্স ৱিকোপনং;

দকে যথা উম্মুজ্জিত্ৱা, এৱং গচ্ছামি অম্বৰে.

১১৫. ‘‘উড়াৰভূতো মনুজো, হেট্ঠাসীনো [হেট্ঠাপি নো (ক.)] ভৱিস্সতি;

হন্দ মেনং গৱেসিস্সং, অপি অত্থং লভেয্যহং.

১১৬. ‘‘ওৰোহন্তো অন্তলিক্খা, সদ্দমস্সোসি সত্থুনো;

অনিচ্চতং কথেন্তস্স, তমহং উগ্গহিং তদা.

১১৭. ‘‘অনিচ্চসঞ্ঞমুগ্গয্হ, অগমাসিং মমস্সমং;

যাৱতাযুং ৱসিত্ৱান, তত্থ কালঙ্কতো অহং.

১১৮. ‘‘চৰিমে ৱত্তমানম্হি, তং ধম্মসৱনং [ধম্মসৱণং (সী.)] সৰিং;

তেন কম্মেন সুকতেন, তাৱতিংসমগচ্ছহং.

১১৯. ‘‘তিংসকপ্পসহস্সানি, দেৱলোকে ৰমিং অহং;

একপঞ্ঞাসক্খত্তুঞ্চ, দেৱৰজ্জমকাৰযিং.

১২০. ‘‘একসত্ততিক্খত্তুঞ্চ, চক্কৱত্তী অহোসহং;

পদেসৰজ্জং ৱিপুলং, গণনাতো অসঙ্খিযং.

১২১. ‘‘পিতুগেহে নিসীদিত্ৱা, সমণো ভাৱিতিন্দ্ৰিযো;

গাথায পৰিদীপেন্তো, অনিচ্চতমুদাহৰি [অনিচ্চৱত্থুদাহৰি (স্যা. ক.)].

১২২. ‘‘অনুস্সৰামি তং সঞ্ঞং, সংসৰন্তো ভৱাভৱে;

ন কোটিং পটিৱিজ্ঝামি [ন কোচি পটিৱজ্জামি (ক.)], নিব্বানং অচ্চুতং পদং [অযং গাথা উপৰি ৪৩ ৱগ্গে সত্তমাপদানে পুৰিমগাথায পুৰেতৰং দিস্সতি].

১২৩. ‘‘অনিচ্চা ৱত সঙ্খাৰা, উপ্পাদৱযধম্মিনো;

উপ্পজ্জিত্ৱা নিৰুজ্ঝন্তি, তেসং ৱূপসমো সুখো.

১২৪. ‘‘সহ গাথং সুণিত্ৱান, পুব্বকম্মং অনুস্সৰিং;

একাসনে নিসীদিত্ৱা, অৰহত্তমপাপুণিং.

১২৫. ‘‘জাতিযা সত্তৱস্সোহং, অৰহত্তমপাপুণিং;

উপসম্পাদযি বুদ্ধো, গুণমঞ্ঞায চক্খুমা.

১২৬. ‘‘দাৰকোৱ অহং সন্তো, কৰণীযং সমাপযিং;

কিং মে কৰণীযং অজ্জ, সক্যপুত্তস্স সাসনে.

১২৭. ‘‘সতসহস্সিতো কপ্পে, যং কম্মমকৰিং তদা;

দুগ্গতিং নাভিজানামি, সদ্ধম্মসৱনে ফলং.

১২৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ধম্মসৱনিযো থেৰো ইমা গাথাযো অভাসিত্থাতি.

ধম্মসৱনিযত্থেৰস্সাপদানং নৱমং.