১০. উক্খিত্তপদুমিযত্থেৰঅপদানং

১২৯. ‘‘নগৰে হংসৱতিযা, অহোসিং মালিকো তদা;

ওগাহেত্ৱা পদুমসৰং, সতপত্তং ওচিনামহং.

১৩০. ‘‘পদুমুত্তৰো নাম জিনো, সব্বধম্মান পাৰগূ;

সহ সতসহস্সেহি [সতসহস্সসিস্সেহি (ক.)], সন্তচিত্তেহি তাদিভি.

১৩১. ‘‘খীণাসৱেহি সুদ্ধেহি, ছড়ভিঞ্ঞেহি ঝাযিভি [সো তদা (সী.), সো সহ (ক.)];

মম ৱুদ্ধিং সমন্ৱেসং, আগচ্ছি মম সন্তিকং [মম সন্তিকে (সী.), পুৰিসুত্তমো (স্যা. ক.)].

১৩২. ‘‘দিস্ৱানহং দেৱদেৱং, সযম্ভুং লোকনাযকং;

ৱণ্টে ছেত্ৱা সতপত্তং, উক্খিপিমম্বৰে তদা.

১৩৩. ‘‘যদি বুদ্ধো তুৱং ৱীৰ, লোকজেট্ঠো নৰাসভো;

সযং গন্ত্ৱা সতপত্তা, মত্থকে ধাৰযন্তু তে.

১৩৪. ‘‘অধিট্ঠহি মহাৱীৰো, লোকজেট্ঠো নৰাসভো;

বুদ্ধস্স আনুভাৱেন, মত্থকে ধাৰযিংসু তে.

১৩৫. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

১৩৬. ‘‘তত্থ মে সুকতং ব্যম্হং, সতপত্তন্তি ৱুচ্চতি;

সট্ঠিযোজনমুব্বিদ্ধং, তিংসযোজনৱিত্থতং.

১৩৭. ‘‘সহস্সক্খত্তুং দেৱিন্দো, দেৱৰজ্জমকাৰযিং;

পঞ্চসত্ততিক্খত্তুঞ্চ, চক্কৱত্তী অহোসহং.

১৩৮. ‘‘পদেসৰজ্জং ৱিপুলং, গণনাতো অসঙ্খিযং;

অনুভোমি সকং কম্মং, পুব্বে সুকতমত্তনো.

১৩৯. ‘‘তেনেৱেকপদুমেন, অনুভোত্ৱান সম্পদা;

গোতমস্স ভগৱতো, ধম্মং সচ্ছিকৰিং অহং.

১৪০. ‘‘কিলেসা ঝাপিতা ময্হং, ভৱা সব্বে সমূহতা;

নাগোৱ বন্ধনং ছেত্ৱা, ৱিহৰামি অনাসৱো.

১৪১. ‘‘সতসহস্সিতো কপ্পে, যং পুপ্ফমভিপূজযিং;

দুগ্গতিং নাভিজানামি, একপদুমস্সিদং ফলং.

১৪২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উক্খিত্তপদুমিযো থেৰো ইমা গাথাযো অভাসিত্থাতি.

উক্খিত্তপদুমিযত্থেৰস্সাপদানং দসমং.

গন্ধোদকৱগ্গো চতুতিংসতিমো.