৩৪. গন্ধোদকৱগ্গো

১. গন্ধধূপিযত্থেৰঅপদানং

১. ‘‘সিদ্ধত্থস্স ভগৱতো, গন্ধধূপং অদাসহং;

সুমনেহি পটিচ্ছন্নং, বুদ্ধানুচ্ছৱিকঞ্চ তং.

২. ‘‘কঞ্চনগ্ঘিযসঙ্কাসং, বুদ্ধং লোকগ্গনাযকং;

ইন্দীৱৰংৱ জলিতং, আদিত্তংৱ হুতাসনং.

৩. ‘‘ব্যগ্ঘুসভংৱ পৱৰং, অভিজাতংৱ কেসৰিং;

নিসিন্নং সমণানগ্গং, ভিক্খুসঙ্ঘপুৰক্খতং.

৪. ‘‘দিস্ৱা চিত্তং পসাদেত্ৱা, পগ্গহেত্ৱান অঞ্জলিং;

ৱন্দিত্ৱা সত্থুনো পাদে, পক্কামিং উত্তৰামুখো.

৫. ‘‘চতুন্নৱুতিতো কপ্পে, যং গন্ধমদদিং তদা;

দুগ্গতিং নাভিজানামি, গন্ধপূজাযিদং ফলং.

৬. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা গন্ধধূপিযো থেৰো ইমা গাথাযো অভাসিত্থাতি.

গন্ধধূপিযত্থেৰস্সাপদানং পঠমং.

২. উদকপূজকত্থেৰঅপদানং

৭. ‘‘সুৱণ্ণৱণ্ণং সম্বুদ্ধং, গচ্ছন্তং অনিলঞ্জসে;

ঘতাসনংৱ জলিতং, আদিত্তংৱ হুতাসনং.

৮. ‘‘পাণিনা উদকং গয্হ, আকাসে উক্খিপিং অহং;

সম্পটিচ্ছি মহাৱীৰো, বুদ্ধো কাৰুণিকো ইসি.

৯. ‘‘অন্তলিক্খে ঠিতো সত্থা, পদুমুত্তৰনামকো;

মম সঙ্কপ্পমঞ্ঞায, ইমং গাথমভাসথ.

১০. ‘‘‘ইমিনা দকদানেন, পীতিউপ্পাদনেন চ;

কপ্পসতসহস্সম্পি, দুগ্গতিং নুপপজ্জসি’.

১১. ‘‘তেন কম্মেন দ্ৱিপদিন্দ, লোকজেট্ঠ নৰাসভ;

পত্তোম্হি অচলং ঠানং, হিত্ৱা জযপৰাজযং.

১২. ‘‘সহস্সৰাজনামেন, তযো চ চক্কৱত্তিনো;

পঞ্চসট্ঠিকপ্পসতে, চাতুৰন্তা জনাধিপা.

১৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উদকপূজকো থেৰো ইমা গাথাযো অভাসিত্থাতি.

উদকপূজকত্থেৰস্সাপদানং দুতিযং.

৩. পুন্নাগপুপ্ফিযত্থেৰঅপদানং

১৪. ‘‘কাননং ৱনমোগয্হ, ৱসামি লুদ্দকো অহং;

পুন্নাগং পুপ্ফিতং দিস্ৱা, বুদ্ধসেট্ঠং অনুস্সৰিং.

১৫. ‘‘তং পুপ্ফং ওচিনিত্ৱান, সুগন্ধং গন্ধিতং সুভং;

থূপং কত্ৱান পুলিনে, বুদ্ধস্স অভিৰোপযিং.

১৬. ‘‘দ্ৱেনৱুতে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

১৭. ‘‘একম্হি নৱুতে কপ্পে, একো আসিং তমোনুদো;

সত্তৰতনসম্পন্নো, চক্কৱত্তী মহব্বলো.

১৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পুন্নাগপুপ্ফিযো থেৰো ইমা গাথাযো অভাসিত্থাতি.

পুন্নাগপুপ্ফিযত্থেৰস্সাপদানং ততিযং.

৪. একদুস্সদাযকত্থেৰঅপদানং

১৯. ‘‘নগৰে হংসৱতিযা, অহোসিং তিণহাৰকো;

তিণহাৰেন জীৱামি, তেন পোসেমি দাৰকে.

২০. ‘‘পদুমুত্তৰো নাম জিনো, সব্বধম্মান পাৰগূ;

তমন্ধকাৰং নাসেত্ৱা, উপ্পজ্জি লোকনাযকো.

২১. ‘‘সকে ঘৰে নিসীদিত্ৱা, এৱং চিন্তেসহং তদা;

‘বুদ্ধো লোকে সমুপ্পন্নো, দেয্যধম্মো চ নত্থি মে.

২২. ‘‘‘ইদং মে সাটকং একং, নত্থি মে কোচি দাযকো;

দুক্খো নিৰযসম্ফস্সো, ৰোপযিস্সামি দক্খিণং’.

২৩. ‘‘এৱাহং চিন্তযিত্ৱান, সকং চিত্তং পসাদযিং;

একং দুস্সং গহেত্ৱান, বুদ্ধসেট্ঠস্সদাসহং.

২৪. ‘‘একং দুস্সং দদিত্ৱান, উক্কুট্ঠিং সম্পৱত্তযিং;

যদি বুদ্ধো তুৱং ৱীৰ, তাৰেহি মং মহামুনি.

২৫. ‘‘পদুমুত্তৰো লোকৱিদূ, আহুতীনং পটিগ্গহো;

মম দানং পকিত্তেন্তো, অকা মে অনুমোদনং.

২৬. ‘‘‘ইমিনা একদুস্সেন, চেতনাপণিধীহি চ;

কপ্পসতসহস্সানি, ৱিনিপাতং ন গচ্ছতি.

২৭. ‘‘‘ছত্তিংসক্খত্তুং দেৱিন্দো, দেৱৰজ্জং কৰিস্সতি;

তেত্তিংসক্খত্তুং ৰাজা চ, চক্কৱত্তী ভৱিস্সতি;

পদেসৰজ্জং ৱিপুলং, গণনাতো অসঙ্খিযং.

২৮. ‘‘‘দেৱলোকে মনুস্সে ৱা, সংসৰন্তো তুৱং ভৱে;

ৰূপৱা গুণসম্পন্নো, অনৱক্কন্তদেহৱা;

অক্খোভং অমিতং দুস্সং, লভিস্সসি যদিচ্ছকং’.

২৯. ‘‘ইদং ৱত্ৱান সম্বুদ্ধো, জলজুত্তমনামকো;

নভং অব্ভুগ্গমী ধীৰো, হংসৰাজাৱ অম্বৰে.

৩০. ‘‘যং যং যোনুপপজ্জামি, দেৱত্তং অথ মানুসং;

ভোগে মে ঊনতা নত্থি, একদুস্সস্সিদং ফলং.

৩১. ‘‘পদুদ্ধাৰে পদুদ্ধাৰে, দুস্সং নিব্বত্ততে মমং;

হেট্ঠা দুস্সম্হি তিট্ঠামি, উপৰি ছদনং মম.

৩২. ‘‘চক্কৱাড়মুপাদায, সকাননং সপব্বতং;

ইচ্ছমানো চহং অজ্জ, দুস্সেহি ছাদযেয্যহং.

৩৩. ‘‘তেনেৱ একদুস্সেন, সংসৰন্তো ভৱাভৱে;

সুৱণ্ণৱণ্ণো হুত্ৱান, সংসৰামি ভৱাভৱে.

৩৪. ‘‘ৱিপাকং একদুস্সস্স, নজ্ঝগং কত্থচিক্খযং;

অযং মে অন্তিমা জাতি, ৱিপচ্চতি ইধাপি মে.

৩৫. ‘‘সতসহস্সিতো কপ্পে, যং দুস্সমদদিং তদা;

দুগ্গতিং নাভিজানামি, একদুস্সস্সিদং ফলং.

৩৬. ‘‘কিলেসা ঝাপিতা ময্হং, ভৱা সব্বে সমূহতা;

নাগোৱ বন্ধনং ছেত্ৱা, ৱিহৰামি অনাসৱো.

৩৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একদুস্সদাযকো থেৰো ইমা গাথাযো অভাসিত্থাতি.

একদুস্সদাযকত্থেৰস্সাপদানং চতুত্থং.

৫. ফুসিতকম্পিযত্থেৰঅপদানং

৩৮. ‘‘ৱিপস্সী নাম [সব্বত্থপি এৱমেৱ দিস্সতি]

সম্বুদ্ধো, লোকজেট্ঠো নৰাসভো.

খীণাসৱেহি সহিতো, সঙ্ঘাৰামে ৱসী তদা.

৩৯. ‘‘আৰামদ্ৱাৰা নিক্খম্ম, ৱিপস্সী [সব্বত্থপি এৱমেৱ দিস্সতি] লোকনাযকো;

সহ সতসহস্সেহি, অট্ঠ [সহস্সসতসিস্সেহি, অট্ঠ (ক.), অট্ঠ সতসহস্সেহি, সহ (?)] খীণাসৱেহি সো.

৪০. ‘‘অজিনেন নিৱত্থোহং, ৱাকচীৰধৰোপি চ;

কুসুমোদকমাদায [কুসুম্ভোদক… (সী. স্যা.)], সম্বুদ্ধং উপসঙ্কমিং.

৪১. ‘‘সকং চিত্তং পসাদেত্ৱা, ৱেদজাতো কতঞ্জলী;

কুসুমোদকমাদায, বুদ্ধমব্ভুক্কিৰিং অহং.

৪২. ‘‘তেন কম্মেন সম্বুদ্ধো, জলজুত্তমনামকো [সব্বত্থপি এৱমেৱ দিস্সতি];

মম কম্মং পকিত্তেত্ৱা, অগমা যেন পত্থিতং.

৪৩. ‘‘ফুসিতা পঞ্চসহস্সা, যেহি পূজেসহং জিনং;

অড্ঢতেয্যসহস্সেহি, দেৱৰজ্জং অকাৰযিং.

৪৪. ‘‘অড্ঢতেয্যসহস্সেহি, চক্কৱত্তী অহোসহং;

অৱসেসেন কম্মেন, অৰহত্তমপাপুণিং.

৪৫. ‘‘দেৱৰাজা যদা হোমি [অহোসিং (স্যা. ক.)], মনুজাধিপতী যদা [তদা (স্যা. ক.)];

তমেৱ নামধেয্যং মে, ফুসিতো নাম হোমহং.

৪৬. ‘‘দেৱভূতস্স সন্তস্স, অথাপি মানুসস্স ৱা;

সমন্তা ব্যামতো ময্হং, ফুসিতংৱ পৱস্সতি.

৪৭. ‘‘ভৱা উগ্ঘাটিতা ময্হং, কিলেসা ঝাপিতা মম;

সব্বাসৱপৰিক্খীণো, ফুসিতস্স ইদং ফলং.

৪৮. ‘‘চন্দনস্সেৱ মে কাযা, তথা গন্ধো পৱাযতি;

সৰীৰতো মম গন্ধো, অড্ঢকোসে পৱাযতি.

৪৯. ‘‘দিব্বগন্ধং সম্পৱন্তং, পুঞ্ঞকম্মসমঙ্গিনং;

গন্ধং ঘত্ৱান জানন্তি, ফুসিতো আগতো ইধ.

৫০. ‘‘সাখাপলাসকট্ঠানি, তিণানিপি চ সব্বসো;

মম সঙ্কপ্পমঞ্ঞায, গন্ধো সম্পজ্জতে খণে.

৫১. ‘‘সতসহস্সিতো [সব্বত্থপি এৱমেৱ দিস্সতি] কপ্পে, চন্দনং অভিপূজযিং;

দুগ্গতিং নাভিজানামি, ফুসিতস্স ইদং ফলং.

৫২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ফুসিতকম্পিযো থেৰো ইমা গাথাযো অভাসিত্থাতি.

ফুসিতকম্পিযত্থেৰস্সাপদানং পঞ্চমং.

৬. পভঙ্কৰত্থেৰঅপদানং

৫৩. ‘‘পদুমুত্তৰভগৱতো, লোকজেট্ঠস্স তাদিনো;

ৱিপিনে চেতিযং আসি, ৱাড়মিগসমাকুলে.

৫৪. ‘‘ন কোচি ৱিসহি গন্তুং, চেতিযং অভিৱন্দিতুং;

তিণকট্ঠলতোনদ্ধং, পলুগ্গং আসি চেতিযং.

৫৫. ‘‘ৱনকম্মিকো তদা আসিং, পিতুমাতুমতেনহং [পিতুপেতামহেনহং (সী.), পিতাপেতামহেনহং (স্যা.)];

অদ্দসং ৱিপিনে থূপং, লুগ্গং তিণলতাকুলং.

৫৬. ‘‘দিস্ৱানাহং বুদ্ধথূপং, গৰুচিত্তং উপট্ঠহিং;

বুদ্ধসেট্ঠস্স থূপোযং, পলুগ্গো অচ্ছতী ৱনে.

৫৭. ‘‘নচ্ছন্নং নপ্পতিৰূপং, জানন্তস্স গুণাগুণং;

বুদ্ধথূপং অসোধেত্ৱা, অঞ্ঞং কম্মং পযোজযে.

৫৮. ‘‘তিণকট্ঠঞ্চ ৱল্লিঞ্চ, সোধযিত্ৱান চেতিযে;

ৱন্দিত্ৱা অট্ঠ ৱাৰানি [অট্ঠ ঠানানি (ক.)], পটিকুটিকো অগচ্ছহং.

৫৯. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

৬০. ‘‘তত্থ মে সুকতং ব্যম্হং, সোৱণ্ণং সপভস্সৰং;

সট্ঠিযোজনমুব্বিদ্ধং, তিংসযোজনৱিত্থতং.

৬১. ‘‘তিসতানি চ ৱাৰানি, দেৱৰজ্জমকাৰযিং;

পঞ্চৱীসতিক্খত্তুঞ্চ, চক্কৱত্তী অহোসহং.

৬২. ‘‘ভৱাভৱে সংসৰন্তো, মহাভোগং লভামহং;

ভোগে মে ঊনতা নত্থি, সোধনায ইদং ফলং.

৬৩. ‘‘সিৱিকা হত্থিখন্ধেন, ৱিপিনে গচ্ছতো মম;

যং যং দিসাহং গচ্ছামি, সৰণং সম্পতে [সিজ্ঝতে (ক.)] ৱনং.

৬৪. ‘‘খাণুং ৱা কণ্টকং ৱাপি, নাহং পস্সামি চক্খুনা;

পুঞ্ঞকম্মেন সংযুত্তো, সযমেৱাপনীযৰে.

৬৫. ‘‘কুট্ঠং গণ্ডো কিলাসো চ, অপমাৰো ৱিতচ্ছিকা;

দদ্দু কচ্ছু [কণ্ডু (স্যা.)] চ মে নত্থি, সোধনায ইদং ফলং.

৬৬. ‘‘অঞ্ঞম্পি মে অচ্ছৰিযং, বুদ্ধথূপস্স সোধনে [বুদ্ধথূপম্হি সোধিতে (স্যা.)];

নাভিজানামি মে কাযে, জাতং পিড়কবিন্দুকং.

৬৭. ‘‘অঞ্ঞম্পি মে অচ্ছৰিযং, বুদ্ধথূপম্হি সোধিতে [সব্বত্থপি এৱমেৱ দিস্সতি, তথা উপৰিপি];

দুৱে ভৱে সংসৰামি, দেৱত্তে অথ মানুসে.