৮. উত্তৰেয্যদাযকত্থেৰঅপদানং

৯০. ‘‘নগৰে হংসৱতিযা, অহোসিং ব্ৰাহ্মণো তদা;

অজ্ঝাযকো মন্তধৰো, তিণ্ণং ৱেদান পাৰগূ.

৯১. ‘‘পুৰক্খতো সসিস্সেহি, জাতিমা চ সুসিক্খিতো;

তোযাভিসেচনত্থায, নগৰা নিক্খমিং তদা.

৯২. ‘‘পদুমুত্তৰো নাম জিনো, সব্বধম্মান পাৰগূ;

খীণাসৱসহস্সেহি, পাৱিসী নগৰং জিনো.

৯৩. ‘‘সুচাৰুৰূপং দিস্ৱান, আনেঞ্জকাৰিতং ৱিয;

পৰিৱুতং অৰহন্তেহি, দিস্ৱা চিত্তং পসাদযিং.

৯৪. ‘‘সিৰস্মিং অঞ্জলিং কত্ৱা, নমস্সিত্ৱান সুব্বতং;

পসন্নচিত্তো সুমনো, উত্তৰীযমদাসহং.

৯৫. ‘‘উভো হত্থেহি পগ্গয্হ, সাটকং উক্খিপিং অহং;

যাৱতা বুদ্ধপৰিসা, তাৱ ছাদেসি সাটকো.

৯৬. ‘‘পিণ্ডচাৰং চৰন্তস্স, মহাভিক্খুগণাদিনো;

ছদং কৰোন্তো অট্ঠাসি, হাসযন্তো মমং তদা.

৯৭. ‘‘ঘৰতো নিক্খমন্তস্স, সযম্ভূ অগ্গপুগ্গলো;

ৱীথিযংৱ ঠিতো সত্থা, অকা মে [অকাসি (স্যা.)] অনুমোদনং.

৯৮. ‘‘পসন্নচিত্তো সুমনো, যো মে অদাসি সাটকং;

তমহং কিত্তযিস্সামি, সুণোথ মম ভাসতো.

৯৯. ‘‘‘তিংসকপ্পসহস্সানি, দেৱলোকে ৰমিস্সতি;

পঞ্ঞাসক্খত্তুং দেৱিন্দো, দেৱৰজ্জং কৰিস্সতি.

১০০. ‘‘‘দেৱলোকে ৱসন্তস্স, পুঞ্ঞকম্মসমঙ্গিনো;

সমন্তা যোজনসতং, দুস্সচ্ছন্নং ভৱিস্সতি.

১০১. ‘‘‘ছত্তিংসক্খত্তুং ৰাজা চ, চক্কৱত্তী ভৱিস্সতি;

পদেসৰজ্জং ৱিপুলং, গণনাতো অসঙ্খিযং.

১০২. ‘‘‘ভৱে সংসৰমানস্স, পুঞ্ঞকম্মসমঙ্গিনো;

মনসা পত্থিতং সব্বং, নিব্বত্তিস্সতি তাৱদে.

১০৩. ‘‘‘কোসেয্যকম্বলিযানি [কোসেয্যকম্বলীযানি (সী.)], খোমকপ্পাসিকানি চ;

মহগ্ঘানি চ দুস্সানি, পটিলচ্ছতিযং নৰো.

১০৪. ‘‘‘মনসা পত্থিতং সব্বং, পটিলচ্ছতিযং নৰো;

একদুস্সস্স ৱিপাকং, অনুভোস্সতি সব্বদা.

১০৫. ‘‘‘সো পচ্ছা পব্বজিত্ৱান, সুক্কমূলেন চোদিতো;

গোতমস্স ভগৱতো, ধম্মং সচ্ছিকৰিস্সতি’.

১০৬. ‘‘অহো মে সুকতং কম্মং, সব্বঞ্ঞুস্স মহেসিনো;

একাহং সাটকং দত্ৱা, পত্তোম্হি অমতং পদং.

১০৭. ‘‘মণ্ডপে ৰুক্খমূলে ৱা, ৱসতো সুঞ্ঞকে ঘৰে;

ধাৰেতি দুস্সছদনং, সমন্তা ব্যামতো মম.

১০৮. ‘‘অৱিঞ্ঞত্তং নিৱাসেমি [অৱিঞ্ঞত্তানি সেৱামি (?)], চীৱৰং পচ্চযঞ্চহং;

লাভী [লাভিম্হি (স্যা.)] অন্নস্স পানস্স, উত্তৰেয্যস্সিদং ফলং.

১০৯. ‘‘সতসহস্সিতো কপ্পে, যং কম্মমকৰিং তদা;

দুগ্গতিং নাভিজানামি, ৱত্থদানস্সিদং ফলং.

১১০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উত্তৰেয্যদাযকো থেৰো ইমা গাথাযো অভাসিত্থাতি.

উত্তৰেয্যদাযকত্থেৰস্সাপদানং অট্ঠমং.