৭. তিণকুটিদাযকত্থেৰঅপদানং

৭৪. ‘‘নগৰে বন্ধুমতিযা, অহোসিং পৰকম্মিকো;

পৰকম্মাযনে যুত্তো, পৰভত্তং অপস্সিতো.

৭৫. ‘‘ৰহোগতো নিসীদিত্ৱা, এৱং চিন্তেসহং তদা;

বুদ্ধো লোকে সমুপ্পন্নো, অধিকাৰো চ নত্থি মে.

৭৬. ‘‘কালো মে গতিং [কালো গতিং মে (সী. স্যা.)] সোধেতুং, খণো মে পটিপাদিতো;

দুক্খো নিৰযসম্ফস্সো, অপুঞ্ঞানঞ্হি পাণিনং.

৭৭. ‘‘এৱাহং চিন্তযিত্ৱান, কম্মসামিং উপাগমিং;

একাহং কম্মং যাচিত্ৱা, ৱিপিনং পাৱিসিং অহং.

৭৮. ‘‘তিণকট্ঠঞ্চ ৱল্লিঞ্চ, আহৰিত্ৱানহং তদা;

তিদণ্ডকে ঠপেত্ৱান, অকং তিণকুটিং অহং.

৭৯. ‘‘সঙ্ঘস্সত্থায কুটিকং, নিয্যাদেত্ৱান [নিয্যাতেত্ৱান (সী.)] তং অহং;

তদহেযেৱ আগন্ত্ৱা, কম্মসামিং উপাগমিং.

৮০. ‘‘তেন কম্মেন সুকতেন, তাৱতিংসমগচ্ছহং;

তত্থ মে সুকতং ব্যম্হং, কুটিকায সুনিম্মিতং [তিণকুটিকায নিম্মিতং (সী.)].

৮১. ‘‘সহস্সকণ্ডং সতভেণ্ডু, ধজালু হৰিতামযং;

সতসহস্সনিয্যূহা, ব্যম্হে পাতুভৱিংসু মে.

৮২. ‘‘যং যং যোনুপপজ্জামি, দেৱত্তং অথ মানুসং;

মম সঙ্কপ্পমঞ্ঞায, পাসাদো উপতিট্ঠতি.

৮৩. ‘‘ভযং ৱা ছম্ভিতত্তং ৱা, লোমহংসো ন ৱিজ্জতি;

তাসং মম ন জানামি, তিণকুটিকাযিদং [তিণকুটিযিদং (ক.)] ফলং.

৮৪. ‘‘সীহব্যগ্ঘা চ দীপী চ, অচ্ছকোকতৰচ্ছকা [তৰচ্ছযো (স্যা. ক.)];

সব্বে মং পৰিৱজ্জেন্তি, তিণকুটিকাযিদং ফলং.

৮৫. ‘‘সৰীসপা [সিৰিংসপা (সী. স্যা.), সৰিংসপা (ক.)] চ ভূতা চ, অহী কুম্ভণ্ডৰক্খসা;

তেপি মং পৰিৱজ্জেন্তি, তিণকুটিকাযিদং ফলং.

৮৬. ‘‘ন পাপসুপিনস্সাপি, সৰামি দস্সনং মম;

উপট্ঠিতা সতি ময্হং, তিণকুটিকাযিদং ফলং.

৮৭. ‘‘তাযেৱ তিণকুটিকায, অনুভোত্ৱান সম্পদা;

গোতমস্স ভগৱতো, ধম্মং সচ্ছিকৰিং অহং.

৮৮. ‘‘একনৱুতিতো কপ্পে, যং কম্মমকৰিং তদা;

দুগ্গতিং নাভিজানামি, তিণকুটিকাযিদং ফলং.

৮৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিণকুটিদাযকো থেৰো ইমা গাথাযো অভাসিত্থাতি.

তিণকুটিদাযকত্থেৰস্সাপদানং সত্তমং.