৬. পভঙ্কৰত্থেৰঅপদানং

৫৩. ‘‘পদুমুত্তৰভগৱতো, লোকজেট্ঠস্স তাদিনো;

ৱিপিনে চেতিযং আসি, ৱাড়মিগসমাকুলে.

৫৪. ‘‘ন কোচি ৱিসহি গন্তুং, চেতিযং অভিৱন্দিতুং;

তিণকট্ঠলতোনদ্ধং, পলুগ্গং আসি চেতিযং.

৫৫. ‘‘ৱনকম্মিকো তদা আসিং, পিতুমাতুমতেনহং [পিতুপেতামহেনহং (সী.), পিতাপেতামহেনহং (স্যা.)];

অদ্দসং ৱিপিনে থূপং, লুগ্গং তিণলতাকুলং.

৫৬. ‘‘দিস্ৱানাহং বুদ্ধথূপং, গৰুচিত্তং উপট্ঠহিং;

বুদ্ধসেট্ঠস্স থূপোযং, পলুগ্গো অচ্ছতী ৱনে.

৫৭. ‘‘নচ্ছন্নং নপ্পতিৰূপং, জানন্তস্স গুণাগুণং;

বুদ্ধথূপং অসোধেত্ৱা, অঞ্ঞং কম্মং পযোজযে.

৫৮. ‘‘তিণকট্ঠঞ্চ ৱল্লিঞ্চ, সোধযিত্ৱান চেতিযে;

ৱন্দিত্ৱা অট্ঠ ৱাৰানি [অট্ঠ ঠানানি (ক.)], পটিকুটিকো অগচ্ছহং.

৫৯. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসমগচ্ছহং.

৬০. ‘‘তত্থ মে সুকতং ব্যম্হং, সোৱণ্ণং সপভস্সৰং;

সট্ঠিযোজনমুব্বিদ্ধং, তিংসযোজনৱিত্থতং.

৬১. ‘‘তিসতানি চ ৱাৰানি, দেৱৰজ্জমকাৰযিং;

পঞ্চৱীসতিক্খত্তুঞ্চ, চক্কৱত্তী অহোসহং.

৬২. ‘‘ভৱাভৱে সংসৰন্তো, মহাভোগং লভামহং;

ভোগে মে ঊনতা নত্থি, সোধনায ইদং ফলং.

৬৩. ‘‘সিৱিকা হত্থিখন্ধেন, ৱিপিনে গচ্ছতো মম;

যং যং দিসাহং গচ্ছামি, সৰণং সম্পতে [সিজ্ঝতে (ক.)] ৱনং.

৬৪. ‘‘খাণুং ৱা কণ্টকং ৱাপি, নাহং পস্সামি চক্খুনা;

পুঞ্ঞকম্মেন সংযুত্তো, সযমেৱাপনীযৰে.

৬৫. ‘‘কুট্ঠং গণ্ডো কিলাসো চ, অপমাৰো ৱিতচ্ছিকা;

দদ্দু কচ্ছু [কণ্ডু (স্যা.)] চ মে নত্থি, সোধনায ইদং ফলং.

৬৬. ‘‘অঞ্ঞম্পি মে অচ্ছৰিযং, বুদ্ধথূপস্স সোধনে [বুদ্ধথূপম্হি সোধিতে (স্যা.)];

নাভিজানামি মে কাযে, জাতং পিড়কবিন্দুকং.

৬৭. ‘‘অঞ্ঞম্পি মে অচ্ছৰিযং, বুদ্ধথূপম্হি সোধিতে [সব্বত্থপি এৱমেৱ দিস্সতি, তথা উপৰিপি];

দুৱে ভৱে সংসৰামি, দেৱত্তে অথ মানুসে.

৬৮. ‘‘অঞ্ঞম্পি মে অচ্ছৰিযং, বুদ্ধথূপম্হি সোধিতে;

সুৱণ্ণৱণ্ণো সব্বত্থ, সপ্পভাসো ভৱামহং.

৬৯. ‘‘অঞ্ঞম্পি মে অচ্ছৰিযং, বুদ্ধথূপম্হি সোধিতে;

অমনাপং ৱিৱজ্জতি, মনাপং উপতিট্ঠতি.

৭০. ‘‘অঞ্ঞম্পি মে অচ্ছৰিযং, বুদ্ধথূপম্হি সোধিতে;

ৱিসুদ্ধং হোতি মে চিত্তং, একগ্গং সুসমাহিতং.

৭১. ‘‘অঞ্ঞম্পি মে অচ্ছৰিযং, বুদ্ধথূপম্হি সোধিতে;

একাসনে নিসীদিত্ৱা, অৰহত্তমপাপুণিং.

৭২. ‘‘সতসহস্সিতো কপ্পে, যং কম্মমকৰিং তদা;

দুগ্গতিং নাভিজানামি, সোধনায ইদং ফলং.

৭৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পভঙ্কৰো থেৰো ইমা গাথাযো অভাসিত্থাতি.

পভঙ্কৰত্থেৰস্সাপদানং ছট্ঠং.