১০. সপৰিৱাৰছত্তদাযকত্থেৰঅপদানং

৮২. ‘‘পদুমুত্তৰো লোকৱিদূ, আহুতীনং পটিগ্গহো;

আকাসে জলৱুট্ঠীৱ ৱস্সতে [ৱস্সতি (সী. স্যা.), ৱস্সেতি (?)] ধম্মৱুট্ঠিযা.

৮৩. ‘‘তমদ্দসাসিং সম্বুদ্ধং, দেসেন্তং অমতং পদং;

সকং চিত্তং পসাদেত্ৱা, অগমাসিং সকং ঘৰং.

৮৪. ‘‘ছত্তং অলঙ্কতং গয্হ, উপগচ্ছিং নৰুত্তমং;

হট্ঠো হট্ঠেন চিত্তেন, আকাসে উক্খিপিং অহং.

৮৫. ‘‘সুসঙ্গহিতযানংৱ, দন্তোৱ সাৱকুত্তমো;

উপগন্ত্ৱান সম্বুদ্ধং, মত্থকে সম্পতিট্ঠহি.

৮৬. ‘‘অনুকম্পকো কাৰুণিকো, বুদ্ধো লোকগ্গনাযকো;

ভিক্খুসঙ্ঘে নিসীদিত্ৱা, ইমা গাথা অভাসথ.

৮৭. ‘‘‘যেন ছত্তমিদং দিন্নং, অলঙ্কতং মনোৰমং;

তেন চিত্তপ্পসাদেন, দুগ্গতিং সো ন গচ্ছতি.

৮৮. ‘‘‘সত্তক্খত্তুঞ্চ দেৱেসু, দেৱৰজ্জং কৰিস্সতি;

বাত্তিংসক্খত্তুঞ্চ ৰাজা, চক্কৱত্তী ভৱিস্সতি.

৮৯. ‘‘‘কপ্পসতসহস্সম্হি, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

৯০. ‘‘‘তস্স ধম্মেসু দাযাদো, ওৰসো ধম্মনিম্মিতো;

সব্বাসৱে পৰিঞ্ঞায, নিব্বাযিস্সতিনাসৱো’.

৯১. ‘‘বুদ্ধস্স গিৰমঞ্ঞায, ৱাচাসভিমুদীৰিতং;

পসন্নচিত্তো সুমনো, ভিয্যো হাসং জনেসহং.

৯২. ‘‘জহিত্ৱা মানুসং যোনিং, দিব্বং যোনিং [দেৱযোনিং (সী.), দিব্বযোনিং (স্যা.)] মজ্ঝগং;

ৱিমানমুত্তমং ময্হং, অব্ভুগ্গতং মনোৰমং.

৯৩. ‘‘ৱিমানা নিক্খমন্তস্স, সেতচ্ছত্তং ধৰীযতি;

তদা সঞ্ঞং পটিলভিং, পুব্বকম্মস্সিদং ফলং.

৯৪. ‘‘দেৱলোকা চৱিত্ৱান, মনুস্সত্তঞ্চ আগমিং;

ছত্তিংসক্খত্তুং চক্কৱত্তী, সত্তকপ্পসতম্হিতো.

৯৫. ‘‘তম্হা কাযা চৱিত্ৱান, আগচ্ছিং [অগঞ্ছিং (?)] তিদসং পুৰং;

সংসৰিত্ৱানুপুব্বেন, মানুসং পুনৰাগমিং.

৯৬. ‘‘ওক্কন্তং মাতুকুচ্ছিং মং, সেত্তচ্ছত্তং অধাৰযুং;

জাতিযা সত্তৱস্সোহং, পব্বজিং অনগাৰিযং.

৯৭. ‘‘সুনন্দো নাম নামেন, ব্ৰাহ্মণো মন্তপাৰগূ;

ফলিকং ছত্তমাদায, সাৱকগ্গস্স সো তদা.

৯৮. ‘‘অনুমোদি মহাৱীৰো, সাৰিপুত্তো মহাকথী;

সুত্ৱানুমোদনং তস্স, পুব্বকম্মমনুস্সৰিং.

৯৯. ‘‘অঞ্জলিং পগ্গহেত্ৱান, সকং চিত্তং পসাদযিং;

সৰিত্ৱা পুৰিমং কম্মং, অৰহত্তমপাপুণিং.

১০০. ‘‘উট্ঠায আসনা তম্হা, সিৰে কত্ৱান অঞ্জলিং;

সম্বুদ্ধং অভিৱাদেত্ৱা, ইমং ৱাচং উদীৰিযিং.

১০১. ‘‘সতসহস্সিতো কপ্পে, বুদ্ধো লোকে অনুত্তৰো;

পদুমুত্তৰো লোকৱিদূ, আহুতীনং পটিগ্গহো.

১০২. ‘‘তস্স ছত্তং মযা দিন্নং, ৱিচিত্তং সমলঙ্কতং;

উভো হত্থেহি পগ্গণ্হি, সযম্ভূ অগ্গপুগ্গলো.

১০৩. ‘‘অহো বুদ্ধো অহো ধম্মো, অহো নো সত্থুসম্পদা;

একচ্ছত্তস্স দানেন, দুগ্গতিং নুপপজ্জহং.

১০৪. ‘‘কিলেসা ঝাপিতা ময্হং, ভৱা সব্বে সমূহতা;

সব্বাসৱে পৰিঞ্ঞায, ৱিহৰামি অনাসৱো.

১০৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সপৰিৱাৰছত্তদাযকো থেৰো ইমা গাথাযো অভাসিত্থাতি.

সপৰিৱাৰছত্তদাযকত্থেৰস্সাপদানং দসমং.

উমাপুপ্ফিযৱগ্গো তেত্তিংসতিমো.