৩৩. উমাপুপ্ফিযৱগ্গো

১. উমাপুপ্ফিযত্থেৰঅপদানং

১. ‘‘সমাহিতং সমাপন্নং, সিদ্ধত্থমপৰাজিতং;

সমাধিনা উপৱিট্ঠং, অদ্দসাহং নৰুত্তমং.

২. ‘‘উমাপুপ্ফং গহেত্ৱান, বুদ্ধস্স অভিৰোপযিং;

সব্বপুপ্ফা একসীসা, উদ্ধংৱণ্টা অধোমুখা.

৩. ‘‘সুচিত্তা ৱিয তিট্ঠন্তে, আকাসে পুপ্ফসন্থৰা;

তেন চিত্তপ্পসাদেন, তুসিতং উপপজ্জহং.

৪. ‘‘চতুন্নৱুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৫. ‘‘পঞ্চপঞ্ঞাসিতো কপ্পে, একো আসিং মহীপতি;

সমন্তছদনো নাম, চক্কৱত্তী মহব্বলো.

৬. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং.

ইত্থং সুদং আযস্মা উমাপুপ্ফিযো থেৰো ইমা গাথাযো অভাসিত্থাতি.

উমাপুপ্ফিযত্থেৰস্সাপদানং পঠমং.

২. পুলিনপূজকত্থেৰঅপদানং

৭. ‘‘ককুধং ৱিলসন্তংৱ, নিসভাজানিযং যথা;

ওসধিংৱ ৱিৰোচন্তং, ওভাসন্তং নৰাসভং.

৮. ‘‘অঞ্জলিং পগ্গহেত্ৱান, অৱন্দিং সত্থুনো অহং;

সত্থাৰং পৰিৱণ্ণেসিং, সককম্মেন তোসযিং [তোসিতো (সী.)].

৯. ‘‘সুসুদ্ধং পুলিনং গয্হ, গতমগ্গে সমোকিৰিং;

উচ্ছঙ্গেন গহেত্ৱান, ৱিপস্সিস্স মহেসিনো.

১০. ‘‘ততো উপড্ঢপুলিনং, ৱিপ্পসন্নেন চেতসা;

দিৱাৱিহাৰে ওসিঞ্চিং, দ্ৱিপদিন্দস্স তাদিনো.

১১. ‘‘একনৱুতিতো কপ্পে, পুলিনং যমসিঞ্চহং;

দুগ্গতিং নাভিজানামি, পুলিনস্স ইদং ফলং.

১২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পুলিনপূজকো থেৰো ইমা গাথাযো অভাসিত্থাতি.

পুলিনপূজকত্থেৰস্সাপদানং দুতিযং.

৩. হাসজনকত্থেৰঅপদানং

১৩. ‘‘দুমগ্গে পংসুকূলকং [পংসুকূলিকং (স্যা. ক.)], লগ্গং দিস্ৱান সত্থুনো;

অঞ্জলিং পগ্গহেত্ৱান, ভিয্যো উচ্চাৰিতং মযা.

১৪. ‘‘দূৰতো পন দিস্ৱান [পতিদিস্ৱান (সী. স্যা.)], হাসো মে উদপজ্জথ;

অঞ্জলিং পগ্গহেত্ৱান, ভিয্যো চিত্তং পসাদযিং.

১৫. ‘‘একনৱুতিতো কপ্পে, যং সঞ্ঞমলভিং তদা;

দুগ্গতিং নাভিজানামি, বুদ্ধসঞ্ঞাযিদং ফলং.

১৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা হাসজনকো থেৰো ইমা গাথাযো অভাসিত্থাতি.

হাসজনকত্থেৰস্সাপদানং ততিযং.

৪. যঞ্ঞসামিকত্থেৰঅপদানং

১৭. ‘‘জাতিযা সত্তৱস্সোহং, অহোসিং মন্তপাৰগূ;

কুলৱত্তং [কুলৱংসং (সী. স্যা.)] অধাৰেসিং, যঞ্ঞো উস্সাহিতো মযা.

১৮. ‘‘চুল্লাসীতিসহস্সানি, পসূ হঞ্ঞন্তি মে তদা;

সাৰথম্ভুপনীতানি [তাৰস্মীহি উপনীতানি (ক.), সাৰস্মিংহি উপনীতানি (স্যা.)], যঞ্ঞত্থায উপট্ঠিতা.

১৯. ‘‘উক্কামুখপহট্ঠোৱ, খদিৰঙ্গাৰসন্নিভো;

উদযন্তোৱ সূৰিযো, পুণ্ণমাযেৱ [পুণ্ণমাসেৱ (সী.)] চন্দিমা.

২০. ‘‘সিদ্ধত্থো সব্বসিদ্ধত্থো, তিলোকমহিতো হিতো;

উপগন্ত্ৱান সম্বুদ্ধো, ইদং ৱচনমব্ৰৱি.

২১. ‘‘‘অহিংসা সব্বপাণীনং, কুমাৰ মম ৰুচ্চতি;

থেয্যা চ অতিচাৰা চ, মজ্জপানা চ আৰতি.

২২. ‘‘‘ৰতি চ সমচৰিযায, বাহুসচ্চং কতঞ্ঞুতা;

দিট্ঠে ধম্মে পৰত্থ চ, ধম্মা এতে পসংসিযা.

২৩. ‘‘‘এতে ধম্মে ভাৱযিত্ৱা, সব্বসত্তহিতে ৰতো [হিতেসিতো (ক.)];

বুদ্ধে চিত্তং পসাদেত্ৱা, ভাৱেহি মগ্গমুত্তমং’.

২৪. ‘‘ইদং ৱত্ৱান সব্বঞ্ঞূ, লোকজেট্ঠো নৰাসভো;

মমেৱং অনুসাসিত্ৱা, ৱেহাসং উগ্গতো গতো.

২৫. ‘‘পুব্বে চিত্তং ৱিসোধেত্ৱা, পচ্ছা চিত্তং পসাদযিং;

তেন চিত্তপ্পসাদেন, তুসিতং উপপজ্জহং.

২৬. ‘‘চতুন্নৱুতিতো কপ্পে, যদা চিত্তং পসাদযিং;

দুগ্গতিং নাভিজানামি, বুদ্ধসঞ্ঞাযিদং ফলং.

২৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা যঞ্ঞসামিকো থেৰো ইমা গাথাযো অভাসিত্থাতি.

যঞ্ঞসামিকত্থেৰস্সাপদানং চতুত্থং.

৫. নিমিত্তসঞ্ঞকত্থেৰঅপদানং

২৮. ‘‘চন্দভাগানদীতীৰে, ৱসামি অস্সমে অহং;

সুৱণ্ণমিগমদ্দক্খিং, চৰন্তং ৱিপিনে অহং.

২৯. ‘‘মিগে চিত্তং পসাদেত্ৱা, লোকজেট্ঠং অনুস্সৰিং;

তেন চিত্তপ্পসাদেন, অঞ্ঞে বুদ্ধে অনুস্সৰিং.

৩০. ‘‘অব্ভতীতা চ যে বুদ্ধা, ৱত্তমানা অনাগতা;

এৱমেৱং ৱিৰোচন্তি, মিগৰাজাৱ তে তযো.

৩১. ‘‘চতুন্নৱুতিতো কপ্পে, যং সঞ্ঞমলভিং তদা;

দুগ্গতিং নাভিজানামি, বুদ্ধসঞ্ঞাযিদং ফলং.

৩২. ‘‘সত্তৱীসে ইতো কপ্পে, একো আসিং মহীপতি;

অৰঞ্ঞসত্থো নামেন, চক্কৱত্তী মহব্বলো.

৩৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা নিমিত্তসঞ্ঞকো থেৰো ইমা গাথাযো অভাসিত্থাতি.

নিমিত্তসঞ্ঞকত্থেৰস্সাপদানং পঞ্চমং.

৬. অন্নসংসাৱকত্থেৰঅপদানং

৩৪. ‘‘সুৱণ্ণৱণ্ণং সম্বুদ্ধং, গচ্ছন্তং অন্তৰাপণে;

কঞ্চনগ্ঘিযসঙ্কাসং, বাত্তিংসৱৰলক্খণং.

৩৫. ‘‘সিদ্ধত্থং সব্বসিদ্ধত্থং, অনেজং অপৰাজিতং;

সম্বুদ্ধং অতিনামেত্ৱা, ভোজযিং তং মহামুনিং.

৩৬. ‘‘মুনি কাৰুণিকো লোকে, ওভাসযি মমং তদা;

বুদ্ধে চিত্তং পসাদেত্ৱা, কপ্পং সগ্গম্হি মোদহং.

৩৭. ‘‘চতুন্নৱুতিতো কপ্পে, যং দানমদদিং তদা;

দুগ্গতিং নাভিজানামি, ভিক্খাদানস্সিদং ফলং.

৩৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অন্নসংসাৱকো থেৰো ইমা গাথাযো অভাসিত্থাতি;

অন্নসংসাৱকত্থেৰস্সাপদানং ছট্ঠং.

৭. নিগ্গুণ্ডিপুপ্ফিযত্থেৰঅপদানং

৩৯. ‘‘যদা দেৱো দেৱকাযা, চৱতে আযুসঙ্খযা;

তযো সদ্দা নিচ্ছৰন্তি, দেৱানং অনুমোদতং.

৪০. ‘‘‘ইতো ভো সুগতিং গচ্ছ, মনুস্সানং সহব্যতং;

মনুস্সভূতো সদ্ধম্মে, লভ সদ্ধং অনুত্তৰং.

৪১. ‘‘‘সা তে সদ্ধা নিৱিট্ঠাস্স, মূলজাতা পতিট্ঠিতা;

যাৱজীৱং অসংহীৰা, সদ্ধম্মে সুপ্পৱেদিতে.

৪২. ‘‘‘কাযেন কুসলং কত্ৱা, ৱাচায কুসলং বহুং;

মনসা কুসলং কত্ৱা, অব্যাপজ্জং নিৰূপধিং.

৪৩. ‘‘‘ততো ওপধিকং পুঞ্ঞং, কত্ৱা দানেন তং বহুং;

অঞ্ঞেপি মচ্চে সদ্ধম্মে, ব্ৰহ্মচৰিযে নিৱেসয’.

৪৪. ‘‘ইমায অনুকম্পায, দেৱাদেৱং যদা ৱিদূ;

চৱন্তং অনুমোদন্তি, এহি দেৱ পুনপ্পুনং [দেৱপুৰং পুন (সী.)].

৪৫. ‘‘সংৱেগো মে [সংৱিগ্গোহং (স্যা.)] তদা আসি, দেৱসঙ্ঘে সমাগতে;

কংসু নাম অহং যোনিং, গমিস্সামি ইতো চুতো.

৪৬. ‘‘মম সংৱেগমঞ্ঞায, সমণো ভাৱিতিন্দ্ৰিযো;

মমুদ্ধৰিতুকামো সো, আগচ্ছি মম সন্তিকং.

৪৭. ‘‘সুমনো নাম নামেন, পদুমুত্তৰসাৱকো;

অত্থধম্মানুসাসিত্ৱা, সংৱেজেসি মমং তদা.

দ্ৱাদসমং ভাণৱাৰং.

৪৮. ‘‘তস্সাহং ৱচনং সুত্ৱা, বুদ্ধে চিত্তং পসাদযিং;

তং ধীৰং অভিৱাদেত্ৱা, তত্থ কালংকতো অহং.

৪৯. ‘‘উপপজ্জিং স [উপপজ্জিস্সং (সী.)] তত্থেৱ, সুক্কমূলেন চোদিতো;

ৱসন্তো মাতুকুচ্ছিম্হি, পুন ধাৰেতি মাতুযা.

৫০. ‘‘তম্হা কাযা চৱিত্ৱান, তিদসে উপপজ্জহং;

এত্থন্তৰে ন পস্সামি, দোমনস্সমহং তদা.

৫১. ‘‘তাৱতিংসা চৱিত্ৱান, মাতুকুচ্ছিং সমোক্কমিং;

নিক্খমিত্ৱান কুচ্ছিম্হা, কণ্হসুক্কং অজানহং.

৫২. ‘‘জাতিযা সত্তৱস্সোৱ [জাতিযা সত্তৱস্সেন (স্যা.)], আৰামং পাৱিসিং অহং;

গোতমস্স ভগৱতো, সক্যপুত্তস্স তাদিনো.

৫৩. ‘‘ৱিত্থাৰিকে [ৱিত্থাৰিতে (সী. ক.)] পাৱচনে, বাহুজঞ্ঞম্হি সাসনে;

অদ্দসং সাসনকৰে, ভিক্খৱো তত্থ সত্থুনো.

৫৪. ‘‘সাৱত্থি নাম নগৰং, ৰাজা তত্থাসি কোসলো;

ৰথেন নাগযুত্তেন, উপেসি বোধিমুত্তমং.

৫৫. ‘‘তস্সাহং নাগং দিস্ৱান, পুব্বকম্মং অনুস্সৰিং;

অঞ্জলিং পগ্গহেত্ৱান, সমযং অগমাসহং.

৫৬. ‘‘জাতিযা সত্তৱস্সোৱ, পব্বজিং অনগাৰিযং;

যো সো বুদ্ধং উপট্ঠাসি, আনন্দো নাম সাৱকো.

৫৭. ‘‘গতিমা ধিতিমা চেৱ, সতিমা চ বহুস্সুতো;

ৰঞ্ঞো চিত্তং পসাদেন্তো, নিয্যাদেসি মহাজুতি.

৫৮. ‘‘তস্সাহং ধম্মং সুত্ৱান, পুব্বকম্মং অনুস্সৰিং;

তত্থেৱ ঠিতকো সন্তো, অৰহত্তমপাপুণিং.

৫৯. ‘‘একংসং চীৱৰং কত্ৱা, সিৰে কত্ৱান অঞ্জলিং;

সম্বুদ্ধং অভিৱাদেত্ৱা, ইমং ৱাচং উদীৰযিং.

৬০. ‘‘‘পদুমুত্তৰবুদ্ধস্স, দ্ৱিপদিন্দস্স সত্থুনো;

নিগ্গুণ্ডিপুপ্ফং পগ্গয্হ, সীহাসনে ঠপেসহং.

৬১. ‘‘‘তেন কম্মেন দ্ৱিপদিন্দ, লোকজেট্ঠ নৰাসভ;

পত্তোম্হি অচলং ঠানং, হিত্ৱা জযপৰাজযং’.

৬২. ‘‘পঞ্চৱীসসহস্সম্হি, কপ্পানং মনুজাধিপা;

অব্বুদনিৰব্বুদানি, অট্ঠট্ঠাসিংসু খত্তিযা.

৬৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা নিগ্গুণ্ডিপুপ্ফিযো থেৰো ইমা গাথাযো অভাসিত্থাতি.

নিগ্গুণ্ডিপুপ্ফিযত্থেৰস্সাপদানং সত্তমং.

৮. সুমনাৱেড়িযত্থেৰঅপদানং

৬৪. ‘‘ৱেস্সভুস্স ভগৱতো, লোকজেট্ঠস্স তাদিনো;

সব্বে জনা সমাগম্ম, মহাপূজং কৰোন্তি তে.

৬৫. ‘‘সুধায পিণ্ডং কত্ৱান, আৱেড়ং সুমনাযহং;

সীহাসনস্স পুৰতো, অভিৰোপেসহং তদা.

৬৬. ‘‘সব্বে জনা সমাগম্ম, পেক্খন্তি পুপ্ফমুত্তমং;

কেনিদং পূজিতং পুপ্ফং, বুদ্ধসেট্ঠস্স তাদিনো.