৯. কিংকণিকপুপ্ফিযত্থেৰঅপদানং

৪৭. ‘‘সুমঙ্গলোতি নামেন, সযম্ভূ অপৰাজিতো;

পৱনা নিক্খমিত্ৱান, নগৰং পাৱিসী জিনো.

৪৮. ‘‘পিণ্ডচাৰং চৰিত্ৱান, নিক্খম্ম নগৰা মুনি;

কতকিচ্চোৱ সম্বুদ্ধো, সো ৱসী ৱনমন্তৰে.

৪৯. ‘‘কিংকণিপুপ্ফং পগ্গয্হ, বুদ্ধস্স অভিৰোপযিং;

পসন্নচিত্তো সুমনো, সযম্ভুস্স মহেসিনো.

৫০. ‘‘চতুন্নৱুতিতো কপ্পে, যং পুপ্ফমভিৰোপযিং;

দুগ্গতিং নাভিজানামি, বুদ্ধপূজাযিদং ফলং.

৫১. ‘‘ছড়াসীতিম্হিতো কপ্পে, অপিলাসিসনামকো;

সত্তৰতনসম্পন্নো, চক্কৱত্তী মহব্বলো.

৫২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কিংকণিকপুপ্ফিযো থেৰো ইমা গাথাযো অভাসিত্থাতি.

কিংকণিকপুপ্ফিযত্থেৰস্সাপদানং নৱমং.