১০. যূথিকপুপ্ফিযত্থেৰঅপদানং

৫৩. ‘‘পদুমুত্তৰো নাম জিনো, আহুতীনং পটিগ্গহো;

পৱনা নিক্খমিত্ৱান, ৱিহাৰং যাতি চক্খুমা.

৫৪. ‘‘উভো হত্থেহি পগ্গয্হ, যূথিকং পুপ্ফমুত্তমং;

বুদ্ধস্স অভিৰোপযিং, মেত্তচিত্তস্স তাদিনো.

৫৫. ‘‘তেন চিত্তপ্পসাদেন, অনুভোত্ৱান সম্পদা;

কপ্পানং সতসহস্সং, দুগ্গতিং নুপপজ্জহং.

৫৬. ‘‘ইতো পঞ্ঞাসকপ্পেসু, একো আসিং জনাধিপো;

সমিত্তনন্দনো নাম, চক্কৱত্তী মহব্বলো.

৫৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা যূথিকপুপ্ফিযো থেৰো ইমা গাথাযো অভাসিত্থাতি;

যূথিকপুপ্ফিযত্থেৰস্সাপদানং দসমং.

তমালপুপ্ফিযৱগ্গো ৱীসতিমো.

তস্সুদ্দানং –

তমালতিণসন্থাৰো, খণ্ডফুল্লি অসোকিযো;

অঙ্কোলকী কিসলযো, তিন্দুকো নেলপুপ্ফিযো;

কিংকণিকো যূথিকো চ, গাথা পঞ্ঞাস অট্ঠ চাতি.

অথ ৱগ্গুদ্দানং –

ভিক্খাদাযী পৰিৱাৰো, সেৰেয্যো সোভিতো তথা;

ছত্তঞ্চ বন্ধুজীৱী চ, সুপাৰিচৰিযোপি চ.

কুমুদো কুটজো চেৱ, তমালি দসমো কতো;

ছসতানি চ গাথানি, ছসট্ঠি চ ততুত্তৰি.

ভিক্খাৱগ্গদসকং.