৮. দুস্সদাযকত্থেৰঅপদানং

৩৮. ‘‘তিৱৰাযং পুৰে ৰম্মে, ৰাজপুত্তোসহং [ৰাজপুত্তো অহং (সী. স্যা.)] তদা;

পণ্ণাকাৰং লভিত্ৱান, উপসন্তস্সদাসহং.

৩৯. ‘‘অধিৱাসেসি ভগৱা, ৱত্থং [নৱং (ক.)] হত্থেন আমসি;

সিদ্ধত্থো অধিৱাসেত্ৱা, ৱেহাসং নভমুগ্গমি.

৪০. ‘‘বুদ্ধস্স গচ্ছমানস্স, দুস্সা ধাৱন্তি পচ্ছতো;

তত্থ চিত্তং পসাদেসিং, বুদ্ধো নো অগ্গপুগ্গলো.

৪১. ‘‘চতুন্নৱুতিতো কপ্পে, যং দুস্সমদদিং তদা;

দুগ্গতিং নাভিজানামি, দুস্সদানস্সিদং ফলং.

৪২. ‘‘সত্তসট্ঠিম্হিতো কপ্পে, চক্কৱত্তী তদা অহু;

পৰিসুদ্ধোতি নামেন, মনুজিন্দো মহব্বলো.

৪৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা দুস্সদাযকো থেৰো ইমা গাথাযো অভাসিত্থাতি.

দুস্সদাযকত্থেৰস্সাপদানং অট্ঠমং.