১. সুপাৰিচৰিযত্থেৰঅপদানং

১. ‘‘পদুমো নাম নামেন, দ্ৱিপদিন্দো নৰাসভো;

পৱনা অভিনিক্খম্ম, ধম্মং দেসেতি চক্খুমা.

২. ‘‘যক্খানং সমযো আসি, অৱিদূৰে মহেসিনো;

যেন কিচ্চেন সম্পত্তা, অজ্ঝাপেক্খিংসু তাৱদে.

৩. ‘‘বুদ্ধস্স গিৰমঞ্ঞায, অমতস্স চ দেসনং;

পসন্নচিত্তো সুমনো, অপ্ফোটেত্ৱা উপট্ঠহিং.

৪. ‘‘সুচিণ্ণস্স ফলং পস্স, উপট্ঠানস্স সত্থুনো;

তিংসকপ্পসহস্সেসু, দুগ্গতিং নুপপজ্জহং.

৫. ‘‘ঊনতিংসে কপ্পসতে, সমলঙ্কতনামকো;

সত্তৰতনসম্পন্নো, চক্কৱত্তী মহব্বলো.

৬. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা সুপাৰিচৰিযো থেৰো ইমা গাথাযো অভাসিত্থাতি.

সুপাৰিচৰিযত্থেৰস্সাপদানং পঠমং.