২. কণৱেৰপুপ্ফিযত্থেৰঅপদানং

৭. ‘‘সিদ্ধত্থো নাম ভগৱা, লোকজেট্ঠো নৰাসভো;

পুৰক্খতো সাৱকেহি, নগৰং পটিপজ্জথ.

৮. ‘‘ৰঞ্ঞো অন্তেপুৰে আসিং, গোপকো অভিসম্মতো;

পাসাদে উপৱিট্ঠোহং, অদ্দসং লোকনাযকং.

৯. ‘‘কণৱেৰং [কৰৱীৰং (সক্কতানুলোমং), কণৱীৰং (পাকত)] গহেত্ৱান, ভিক্খুসঙ্ঘে সমোকিৰিং;

বুদ্ধস্স ৱিসুং কত্ৱান, ততো ভিয্যো সমোকিৰিং.

১০. ‘‘চতুন্নৱুতিতো কপ্পে, যং পুপ্ফমভিপূজযিং [ৰোপযিং (স্যা.)];

দুগ্গতিং নাভিজানামি, বুদ্ধপূজাযিদং ফলং.

১১. ‘‘সত্তাসীতিম্হিতো কপ্পে, চতুৰাসুং মহিদ্ধিকা;

সত্তৰতনসম্পন্না, চক্কৱত্তী মহব্বলা.

১২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কণৱেৰপুপ্ফিযো থেৰো ইমা গাথাযো অভাসিত্থাতি.

কণৱেৰপুপ্ফিযত্থেৰস্সাপদানং দুতিযং.