১০. কুমুদদাযকত্থেৰঅপদানং

৫১. ‘‘হিমৱন্তস্সাৱিদূৰে, মহাজাতস্সৰো অহু;

পদুমুপ্পলসঞ্ছন্নো, পুণ্ডৰীকসমোত্থটো.

৫২. ‘‘কুকুত্থো নাম নামেন, তত্থাসিং সকুণো তদা;

সীলৱা বুদ্ধিসম্পন্নো, পুঞ্ঞাপুঞ্ঞেসু কোৱিদো.

৫৩. ‘‘পদুমুত্তৰো লোকৱিদূ, আহুতীনং পটিগ্গহো;

জাতস্সৰস্সাৱিদূৰে, সঞ্চৰিত্থ মহামুনি.

৫৪. ‘‘জলজং কুমুদং ছেত্ৱা, উপনেসিং মহেসিনো;

মম সঙ্কপ্পমঞ্ঞায, পটিগ্গহি মহামুনি.

৫৫. ‘‘তঞ্চ দানং দদিত্ৱান, সুক্কমূলেন চোদিতো;

কপ্পানং সতসহস্সং, দুগ্গতিং নুপপজ্জহং.

৫৬. ‘‘সোড়সেতো কপ্পসতে, আসুং ৱৰুণনামকা;

অট্ঠ এতে জনাধিপা, চক্কৱত্তী মহব্বলা.

৫৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কুমুদদাযকো থেৰো ইমা গাথাযো অভাসিত্থাতি.

কুমুদদাযকত্থেৰস্সাপদানং দসমং.

বন্ধুজীৱকৱগ্গো সোড়সমো.