১৬. বন্ধুজীৱকৱগ্গো

১. বন্ধুজীৱকত্থেৰঅপদানং

১. ‘‘চন্দংৱ ৱিমলং সুদ্ধং, ৱিপ্পসন্নমনাৱিলং;

নন্দীভৱপৰিক্খীণং, তিণ্ণং লোকে ৱিসত্তিকং.

২. ‘‘নিব্বাপযন্তং জনতং, তিণ্ণং [দিস্ৱা (?)] তাৰযতং ৱৰং [তাৰযতং মুনিং (স্যা.)];

মুনিং ৱনম্হি ঝাযন্তং [ৱনস্মিং ঝাযমানং তং (সী. স্যা.)], একগ্গং সুসমাহিতং.

৩. ‘‘বন্ধুজীৱকপুপ্ফানি, লগেত্ৱা সুত্তকেনহং;

বুদ্ধস্স অভিৰোপযিং, সিখিনো লোকবন্ধুনো.

৪. ‘‘একত্তিংসে ইতো কপ্পে, যং কম্মমকৰিং তদা;

দুগ্গতিং নাভিজানামি, বুদ্ধপূজাযিদং ফলং.

৫. ‘‘ইতো সত্তমকে কপ্পে, মনুজিন্দো মহাযসো;

সমন্তচক্খু নামাসি, চক্কৱত্তী মহব্বলো.

৬. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা বন্ধুজীৱকো থেৰো ইমা গাথাযো অভাসিত্থাতি.

বন্ধুজীৱকত্থেৰস্সাপদানং পঠমং.

২. তম্বপুপ্ফিযত্থেৰঅপদানং

৭. ‘‘পৰকম্মাযনে যুত্তো, অপৰাধং অকাসহং;

ৱনন্তং অভিধাৱিস্সং, ভযৱেৰসমপ্পিতো.

৮. ‘‘পুপ্ফিতং পাদপং দিস্ৱা, পিণ্ডিবন্ধং সুনিম্মিতং;

তম্বপুপ্ফং গহেত্ৱান, বোধিযং ওকিৰিং অহং.

৯. ‘‘সম্মজ্জিত্ৱান তং বোধিং, পাটলিং পাদপুত্তমং;

পল্লঙ্কং আভুজিত্ৱান, বোধিমূলে উপাৱিসিং.

১০. ‘‘গতমগ্গং গৱেসন্তা, আগচ্ছুং মম সন্তিকং;

তে চ দিস্ৱানহং তত্থ, আৱজ্জিং বোধিমুত্তমং.

১১. ‘‘ৱন্দিত্ৱান অহং বোধিং, ৱিপ্পসন্নেন চেতসা;

অনেকতালে পপতিং, গিৰিদুগ্গে ভযানকে.

১২. ‘‘একনৱুতিতো কপ্পে, যং পুপ্ফমভিৰোপযিং;

দুগ্গতিং নাভিজানামি, বোধিপূজাযিদং ফলং.

১৩. ‘‘ইতো চ ততিযে কপ্পে, ৰাজা সুসঞ্ঞতো অহং [সংথুসিতো অহুং (সী.)];

সত্তৰতনসম্পন্নো, চক্কৱত্তী মহব্বলো.

১৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তম্বপুপ্ফিযো থেৰো ইমা গাথাযো অভাসিত্থাতি.

তম্বপুপ্ফিযত্থেৰস্সাপদানং দুতিযং.

৩. ৱীথিসম্মজ্জকত্থেৰঅপদানং

১৫. ‘‘উদেন্তং সতৰংসিংৱ, পীতৰংসিংৱ [সিতৰংসিংৱ (সী. স্যা.)] ভাণুমং;

পন্নৰসে যথা চন্দং, নিয্যন্তং লোকনাযকং.

১৬. ‘‘অট্ঠসট্ঠিসহস্সানি, সব্বে খীণাসৱা অহুং;

পৰিৱাৰিংসু সম্বুদ্ধং, দ্ৱিপদিন্দং নৰাসভং.

১৭. ‘‘সম্মজ্জিত্ৱান তং ৱীথিং, নিয্যন্তে লোকনাযকে;

উস্সাপেসিং ধজং তত্থ, ৱিপ্পসন্নেন চেতসা.

১৮. ‘‘একনৱুতিতো কপ্পে, যং ধজং অভিৰোপযিং;

দুগ্গতিং নাভিজানামি, ধজদানস্সিদং ফলং.

১৯. ‘‘ইতো চতুত্থকে কপ্পে, ৰাজাহোসিং মহব্বলো;

সব্বাকাৰেন সম্পন্নো, সুধজো ইতি ৱিস্সুতো.

২০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৱীথিসম্মজ্জকো থেৰো ইমা গাথাযো অভাসিত্থাতি.

ৱীথিসম্মজ্জকত্থেৰস্সাপদানং ততিযং.

৪. কক্কাৰুপুপ্ফপূজকত্থেৰঅপদানং

২১. ‘‘দেৱপুত্তো অহং সন্তো, পূজযিং সিখিনাযকং;

কক্কাৰুপুপ্ফং পগ্গয্হ, বুদ্ধস্স অভিৰোপযিং.

২২. ‘‘একত্তিংসে ইতো কপ্পে, যং পুপ্ফমভিৰোপযিং;

দুগ্গতিং নাভিজানামি, বুদ্ধপূজাযিদং ফলং.

২৩. ‘‘ইতো চ নৱমে কপ্পে, ৰাজা সত্তুত্তমো অহুং;

সত্তৰতনসম্পন্নো, চক্কৱত্তী মহব্বলো.

২৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কক্কাৰুপুপ্ফপূজকো থেৰো ইমা গাথাযো অভাসিত্থাতি.

কক্কাৰুপুপ্ফপূজকত্থেৰস্সাপদানং চতুত্থং.

৫. মন্দাৰৱপুপ্ফপূজকত্থেৰঅপদানং

২৫. ‘‘দেৱপুত্তো অহং সন্তো, পূজযিং সিখিনাযকং;

মন্দাৰৱেন পুপ্ফেন, বুদ্ধস্স অভিৰোপযিং.

২৬. ‘‘সত্তাহং ছদনং আসি, দিব্বং মালং তথাগতে;

সব্বে জনা সমাগন্ত্ৱা, নমস্সিংসু তথাগতং.

২৭. ‘‘একত্তিংসে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

২৮. ‘‘ইতো চ দসমে কপ্পে, ৰাজাহোসিং জুতিন্ধৰো;

সত্তৰতনসম্পন্নো, চক্কৱত্তী মহব্বলো.

২৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মন্দাৰৱপুপ্ফপূজকো থেৰো ইমা গাথাযো অভাসিত্থাতি.

মন্দাৰৱপুপ্ফপূজকত্থেৰস্সাপদানং পঞ্চমং.

৬. কদম্বপুপ্ফিযত্থেৰঅপদানং

৩০. ‘‘হিমৱন্তস্সাৱিদূৰে, কুক্কুটো নাম পব্বতো;

তম্হি পব্বতপাদম্হি, সত্ত বুদ্ধা ৱসন্তি তে.

৩১. ‘‘কদম্বং পুপ্ফিতং দিস্ৱা, দীপৰাজংৱ উগ্গতং;

উভো হত্থেহি পগ্গয্হ, সত্ত বুদ্ধে সমোকিৰিং.

৩২. ‘‘চতুন্নৱুতিতো কপ্পে, যং পুপ্ফমভিৰোপযিং;

দুগ্গতিং নাভিজানামি, বুদ্ধপূজাযিদং ফলং.

৩৩. ‘‘দ্ৱেনৱুতে ইতো কপ্পে, সত্তাসুং পুপ্ফনামকা;

সত্তৰতনসম্পন্না, চক্কৱত্তী মহব্বলা.

৩৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কদম্বপুপ্ফিযো থেৰো ইমা গাথাযো অভাসিত্থাতি;

কদম্বপুপ্ফিযত্থেৰস্সাপদানং ছট্ঠং.

৭. তিণসূলকত্থেৰঅপদানং

৩৫. ‘‘হিমৱন্তস্সাৱিদূৰে, ভূতগণো নাম পব্বতো;

ৱসতেকো জিনো তত্থ, সযম্ভূ লোকনিস্সটো.

৩৬. ‘‘তিণসূলং গহেত্ৱান, বুদ্ধস্স অভিৰোপযিং;

একূনসতসহস্সং, কপ্পং ন ৱিনিপাতিকো.

৩৭. ‘‘ইতো একাদসে কপ্পে, একোসিং ধৰণীৰুহো;

সত্তৰতনসম্পন্নো, চক্কৱত্তী মহব্বলো.

৩৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিণসূলকো থেৰো ইমা গাথাযো অভাসিত্থাতি.

তিণসূলকত্থেৰস্সাপদানং সত্তমং.

৮. নাগপুপ্ফিযত্থেৰঅপদানং

৩৯. ‘‘সুৱচ্ছো নাম নামেন, ব্ৰাহ্মণো মন্তপাৰগূ;

পুৰক্খতো সসিস্সেহি, ৱসতে পব্বতন্তৰে.

৪০. ‘‘পদুমুত্তৰো নাম জিনো, আহুতীনং পটিগ্গহো;

মমুদ্ধৰিতুকামো সো, আগচ্ছি মম সন্তিকং.

৪১. ‘‘ৱেহাসম্হি চঙ্কমতি, ধূপাযতি জলতে তথা;

হাসং মমং ৱিদিত্ৱান, পক্কামি পাচিনামুখো.

৪২. ‘‘তঞ্চ অচ্ছৰিযং দিস্ৱা, অব্ভুতং লোমহংসনং;

নাগপুপ্ফং গহেত্ৱান, গতমগ্গম্হি ওকিৰিং.

৪৩. ‘‘সতসহস্সিতো কপ্পে, যং পুপ্ফং ওকিৰিং অহং;

তেন চিত্তপ্পসাদেন, দুগ্গতিং নুপপজ্জহং.

৪৪. ‘‘একত্তিংসে কপ্পসতে [একতিংসে ইতো কম্মে (স্যা.)], ৰাজা আসি মহাৰহো;

সত্তৰতনসম্পন্নো, চক্কৱত্তী মহব্বলো.

৪৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা নাগপুপ্ফিযো থেৰো ইমা গাথাযো অভাসিত্থাতি.

নাগপুপ্ফিযত্থেৰস্সাপদানং অট্ঠমং.

৯. পুন্নাগপুপ্ফিযত্থেৰঅপদানং

৪৬. ‘‘কাননং ৱনমোগয্হ, ৱসামি লুদ্দকো অহং;

পুন্নাগং পুপ্ফিতং দিস্ৱা, বুদ্ধসেট্ঠং অনুস্সৰিং.

৪৭. ‘‘তং পুপ্ফং ওচিনিত্ৱান, সুগন্ধং গন্ধিতং সুভং;

থূপং কৰিত্ৱা পুলিনে, বুদ্ধস্স অভিৰোপযিং.

৪৮. ‘‘দ্ৱেনৱুতে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৪৯. ‘‘একম্হি নৱুতে কপ্পে, একো আসিং তমোনুদো;

সত্তৰতনসম্পন্নো, চক্কৱত্তী মহব্বলো.

৫০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পুন্নাগপুপ্ফিযো থেৰো ইমা গাথাযো অভাসিত্থাতি.

পুন্নাগপুপ্ফিযত্থেৰস্সাপদানং নৱমং.

১০. কুমুদদাযকত্থেৰঅপদানং

৫১. ‘‘হিমৱন্তস্সাৱিদূৰে, মহাজাতস্সৰো অহু;

পদুমুপ্পলসঞ্ছন্নো, পুণ্ডৰীকসমোত্থটো.

৫২. ‘‘কুকুত্থো নাম নামেন, তত্থাসিং সকুণো তদা;

সীলৱা বুদ্ধিসম্পন্নো, পুঞ্ঞাপুঞ্ঞেসু কোৱিদো.

৫৩. ‘‘পদুমুত্তৰো লোকৱিদূ, আহুতীনং পটিগ্গহো;

জাতস্সৰস্সাৱিদূৰে, সঞ্চৰিত্থ মহামুনি.

৫৪. ‘‘জলজং কুমুদং ছেত্ৱা, উপনেসিং মহেসিনো;

মম সঙ্কপ্পমঞ্ঞায, পটিগ্গহি মহামুনি.

৫৫. ‘‘তঞ্চ দানং দদিত্ৱান, সুক্কমূলেন চোদিতো;

কপ্পানং সতসহস্সং, দুগ্গতিং নুপপজ্জহং.

৫৬. ‘‘সোড়সেতো কপ্পসতে, আসুং ৱৰুণনামকা;

অট্ঠ এতে জনাধিপা, চক্কৱত্তী মহব্বলা.

৫৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কুমুদদাযকো থেৰো ইমা গাথাযো অভাসিত্থাতি.

কুমুদদাযকত্থেৰস্সাপদানং দসমং.

বন্ধুজীৱকৱগ্গো সোড়সমো.