৯. সালপুপ্ফদাযকত্থেৰঅপদানং

৬০. ‘‘মিগৰাজা তদা আসিং, অভিজাতো সুকেসৰী;

গিৰিদুগ্গং গৱেসন্তো, অদ্দসং লোকনাযকং.

৬১. ‘‘অযং নু খো মহাৱীৰো, নিব্বাপেতি মহাজনং;

যংনূনাহং উপাসেয্যং, দেৱদেৱং নৰাসভং.

৬২. ‘‘সাখং সালস্স ভঞ্জিত্ৱা, সকোসং পুপ্ফমাহৰিং;

উপগন্ত্ৱান সম্বুদ্ধং, অদাসিং পুপ্ফমুত্তমং.

৬৩. ‘‘একনৱুতিতো কপ্পে, যং পুপ্ফমভিৰোপযিং;

দুগ্গতিং নাভিজানামি, পুপ্ফদানস্সিদং ফলং.

৬৪. ‘‘ইতো চ নৱমে কপ্পে, ৱিৰোচনসনামকা;

তযো আসিংসু ৰাজানো, চক্কৱত্তী মহব্বলা.

৬৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সালপুপ্ফদাযকো থেৰো ইমা গাথাযো অভাসিত্থাতি.

সালপুপ্ফদাযকত্থেৰস্সাপদানং নৱমং.