২. সুমঙ্গলত্থেৰঅপদানং

১১. ‘‘অত্থদস্সী জিনৱৰো, লোকজেট্ঠো নৰাসভো;

ৱিহাৰা অভিনিক্খম্ম, তড়াকং উপসঙ্কমি.

১২. ‘‘ন্হত্ৱা পিত্ৱা চ সম্বুদ্ধো, উত্তৰিত্ৱেকচীৱৰো;

অট্ঠাসি ভগৱা তত্থ, ৱিলোকেন্তো দিসোদিসং.

১৩. ‘‘ভৱনে উপৱিট্ঠোহং, অদ্দসং লোকনাযকং;

হট্ঠো হট্ঠেন চিত্তেন, অপ্ফোটেসিং অহং তদা.

১৪. ‘‘সতৰংসিংৱ জোতন্তং, পভাসন্তংৱ কঞ্চনং [ইমিনা পাদদ্ৱযেন পুৰিমপাদদ্ৱযস্স পুৰতো ভৱিতব্বং];

নচ্চগীতে পযুত্তোহং, পঞ্চঙ্গতূৰিযম্হি চ.

১৫. ‘‘যং যং যোনুপপজ্জামি, দেৱত্তং অথ মানুসং;

সব্বে সত্তে অভিভোমি, ৱিপুলো হোতি মে যসো [অযঞ্চ গাথা পৰিগ্গহেতিগাথায অনন্তৰমেৱ ঠাতুং যুত্তা].

১৬. ‘‘নমো তে পুৰিসাজঞ্ঞ, নমো তে পুৰিসুত্তম;

অত্তানং তোসযিত্ৱান, পৰে তোসেসি ত্ৱং মুনি.

১৭. ‘‘পৰিগ্গহে [পৰিগ্গয্হ (সী.), পৰিগ্গহিত্ৱা (স্যা.), পৰিগ্গহেন (ক.)] নিসীদিত্ৱা, হাসং কত্ৱান সুব্বতে;

উপট্ঠহিত্ৱা সম্বুদ্ধং, তুসিতং উপপজ্জহং.

১৮. ‘‘সোড়সেতো কপ্পসতে, দ্ৱিনৱএকচিন্তিতা;

সত্তৰতনসম্পন্না, চক্কৱত্তী মহব্বলা.

১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সুমঙ্গলো থেৰো ইমা গাথাযো অভাসিত্থাতি.

সুমঙ্গলত্থেৰস্সাপদানং দুতিযং.