৩. সৰণগমনিযত্থেৰঅপদানং

২০. ‘‘উভিন্নং দেৱৰাজূনং, সঙ্গামো সমুপট্ঠিতো;

অহোসি সমুপব্যূড়্হো [সমুপব্বূড়্হো (সী.)], মহাঘোসো অৱত্তথ [পৱত্তথ (সী.)].

২১. ‘‘পদুমুত্তৰো লোকৱিদূ, আহুতীনং পটিগ্গহো;

অন্তলিক্খে ঠিতো সত্থা, সংৱেজেসি মহাজনং.

২২. ‘‘সব্বে দেৱা অত্তমনা, নিক্খিত্তকৱচাৱুধা;

সম্বুদ্ধং অভিৱাদেত্ৱা, একগ্গাসিংসু তাৱদে.

২৩. ‘‘ময্হং [অম্হং (সী.)] সঙ্কপ্পমঞ্ঞায, ৱাচাসভিমুদীৰযি;

অনুকম্পকো লোকৱিদূ, নিব্বাপেসি মহাজনং.

২৪. ‘‘পদুট্ঠচিত্তো মনুজো, একপাণং ৱিহেঠযং;

তেন চিত্তপ্পদোসেন, অপাযং উপপজ্জতি.

২৫. ‘‘সঙ্গামসীসে নাগোৱ, বহূ পাণে ৱিহেঠযং;

নিব্বাপেথ সকং চিত্তং, মা হঞ্ঞিত্থো পুনপ্পুনং.

২৬. ‘‘দ্ৱিন্নম্পি যক্খৰাজূনং, সেনা সা ৱিম্হিতা অহু [সেনাযো ৱিম্হিতা অহূ (সী.), সেনাপি সমিতা অহু (স্যা.)];

সৰণঞ্চ উপাগচ্ছুং, লোকজেট্ঠং সুতাদিনং.

২৭. ‘‘সঞ্ঞাপেত্ৱান জনতং, পদমুদ্ধৰি [উদ্ধৰি পন (সী. স্যা.)] চক্খুমা;

পেক্খমানোৱ দেৱেহি, পক্কামি উত্তৰামুখো.

২৮. ‘‘পঠমং সৰণং গচ্ছিং, দ্ৱিপদিন্দস্স তাদিনো;

কপ্পানং সতসহস্সং, দুগ্গতিং নুপপজ্জহং.

২৯. ‘‘মহাদুন্দুভিনামা চ, সোড়সাসুং ৰথেসভা;

তিংসকপ্পসহস্সম্হি, ৰাজানো চক্কৱত্তিনো.

৩০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সৰণগমনিযো থেৰো ইমা গাথাযো অভাসিত্থাতি.

সৰণগমনিযত্থেৰস্সাপদানং ততিযং.