১০. জাতিপূজকত্থেৰঅপদানং

৮২. ‘‘জাযন্তস্স ৱিপস্সিস্স, আলোকো ৱিপুলো অহু;

পথৱী চ পকম্পিত্থ, সসাগৰা সপব্বতা.

৮৩. ‘‘নেমিত্তা চ ৱিযাকংসু, বুদ্ধো লোকে ভৱিস্সতি;

অগ্গো চ সব্বসত্তানং, জনতং উদ্ধৰিস্সতি.

৮৪. ‘‘নেমিত্তানং সুণিত্ৱান, জাতিপূজমকাসহং;

এদিসা পূজনা নত্থি, যাদিসা জাতিপূজনা.

৮৫. ‘‘সঙ্খৰিত্ৱান [সংহৰিত্ৱান (সী. স্যা.), সঙ্কৰিত্ৱান (ক.)]

কুসলং, সকং চিত্তং পসাদযিং.

জাতিপূজং কৰিত্ৱান, তত্থ কালঙ্কতো অহং.

৮৬. ‘‘যং যং যোনুপপজ্জামি, দেৱত্তং অথ মানুসং;

সব্বে সত্তে অভিভোমি, জাতিপূজাযিদং ফলং.

৮৭. ‘‘ধাতিযো মং উপট্ঠন্তি, মম চিত্তৱসানুগা;

ন তা সক্কোন্তি কোপেতুং, জাতিপূজাযিদং ফলং.

৮৮. ‘‘একনৱুতিতো কপ্পে, যং পূজমকৰিং তদা;

দুগ্গতিং নাভিজানামি, জাতিপূজাযিদং ফলং.

৮৯. ‘‘সুপাৰিচৰিযা নাম, চতুত্তিংস জনাধিপা;

ইতো ততিযকপ্পম্হি, চক্কৱত্তী মহব্বলা.

৯০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা জাতিপূজকো থেৰো ইমা গাথাযো অভাসিত্থাতি.

জাতিপূজকত্থেৰস্সাপদানং দসমং.

মহাপৰিৱাৰৱগ্গো দ্ৱাদসমো.