১৩. সেৰেয্যৱগ্গো

১. সেৰেয্যকত্থেৰঅপদানং

১. ‘‘অজ্ঝাযকো মন্তধৰো, তিণ্ণং ৱেদান পাৰগূ;

অব্ভোকাসে ঠিতো সন্তো, অদ্দসং লোকনাযকং.

২. ‘‘সীহং যথা ৱনচৰং, ব্যগ্ঘৰাজংৱ নিত্তসং;

তিধাপভিন্নমাতঙ্গং, কুঞ্জৰংৱ মহেসিনং.

৩. ‘‘সেৰেয্যকং গহেত্ৱান, আকাসে উক্খিপিং [নিক্খিপিং (ক.)] অহং;

বুদ্ধস্স আনুভাৱেন, পৰিৱাৰেন্তি সব্বসো [সব্বতো (সী.)].

৪. ‘‘অধিট্ঠহি মহাৱীৰো, সব্বঞ্ঞূ লোকনাযকো;

সমন্তা পুপ্ফচ্ছদনা, ওকিৰিংসু নৰাসভং.

৫. ‘‘ততো সা পুপ্ফকঞ্চুকা, অন্তোৱণ্টা বহিমুখা;

সত্তাহং ছদনং কত্ৱা, ততো অন্তৰধাযথ.

৬. ‘‘তঞ্চ অচ্ছৰিযং দিস্ৱা, অব্ভুতং লোমহংসনং;

বুদ্ধে চিত্তং পসাদেসিং, সুগতে লোকনাযকে.

৭. ‘‘তেন চিত্তপ্পসাদেন, সুক্কমূলেন চোদিতো;

কপ্পানং সতসহস্সং, দুগ্গতিং নুপপজ্জহং.

৮. ‘‘পন্নৰসসহস্সম্হি, কপ্পানং পঞ্চৱীসতি;

ৱীতমলা [চিত্তমালা (সী.), ৱিলামালা (স্যা.)] সমানা চ, চক্কৱত্তী মহব্বলা.

৯. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা সেৰেয্যকো থেৰো ইমা গাথাযো অভাসিত্থাতি.

সেৰেয্যকত্থেৰস্সাপদানং পঠমং.

২. পুপ্ফথূপিযত্থেৰঅপদানং

১০. ‘‘হিমৱন্তস্সাৱিদূৰে, কুক্কুৰো নাম [কুক্কুটো নাম (সী.)] পব্বতো;

ৱেমজ্ঝে তস্স ৱসতি, ব্ৰাহ্মণো মন্তপাৰগূ.

১১. ‘‘পঞ্চ সিস্সসহস্সানি, পৰিৱাৰেন্তি মং সদা;

পুব্বুট্ঠাযী চ তে আসুং, মন্তেসু চ ৱিসাৰদা.

১২. ‘‘বুদ্ধো লোকে সমুপ্পন্নো, তং ৱিজানাথ নো ভৱং;

অসীতিব্যঞ্জনানস্স, বাত্তিংসৱৰলক্খণা.

১৩. ‘‘ব্যামপ্পভো জিনৱৰো, আদিচ্চোৱ ৱিৰোচতি;

সিস্সানং ৱচনং সুত্ৱা, ব্ৰাহ্মণো মন্তপাৰগূ.

১৪. ‘‘অস্সমা অভিনিক্খম্ম, দিসং পুচ্ছতি সিস্সকে [ব্ৰাহ্মণো (স্যা.)];

যম্হি দেসে মহাৱীৰো, ৱসতি লোকনাযকো.

১৫. ‘‘তাহং দিসং নমস্সিস্সং, জিনং অপ্পটিপুগ্গলং;

উদগ্গচিত্তো সুমনো, পূজেসিং তং তথাগতং.

১৬. ‘‘এথ সিস্সা গমিস্সাম, দক্খিস্সাম তথাগতং;

ৱন্দিত্ৱা সত্থুনো পাদে, সোস্সাম জিনসাসনং.

১৭. ‘‘একাহং অভিনিক্খম্ম, ব্যাধিং পটিলভিং অহং;

ব্যাধিনা পীড়িতো সন্তো, সালং ৱাসযিতুং গমিং.

১৮. ‘‘সব্বে সিস্সে সমানেত্ৱা, অপুচ্ছিং তে তথাগতং;

কীদিসং লোকনাথস্স, গুণং পৰমবুদ্ধিনো.

১৯. ‘‘তে মে পুট্ঠা ৱিযাকংসু, যথা দস্সাৱিনো তথা;

সক্কচ্চং বুদ্ধসেট্ঠং তং, দেসেসুং [দস্সেসুং (সী. স্যা.)] মম সম্মুখা.

২০. ‘‘তেসাহং ৱচনং সুত্ৱা, সকং চিত্তং পসাদযিং;

পুপ্ফেহি থূপং কত্ৱান, তত্থ কালঙ্কতো অহং.

২১. ‘‘তে মে সৰীৰং ঝাপেত্ৱা, অগমুং বুদ্ধসন্তিকং;

অঞ্জলিং পগ্গহেত্ৱান, সত্থাৰমভিৱাদযুং.

২২. ‘‘পুপ্ফেহি থূপং কত্ৱান, সুগতস্স মহেসিনো;

কপ্পানং সতসহস্সং, দুগ্গতিং নুপপজ্জহং.

২৩. ‘‘চত্তালীসসহস্সম্হি, কপ্পে সোড়স খত্তিযা;

নামেনগ্গিসমা নাম, চক্কৱত্তী মহব্বলা.

২৪. ‘‘ৱীসকপ্পসহস্সম্হি, ৰাজানো চক্কৱত্তিনো;

ঘতাসনসনামাৱ, অট্ঠত্তিংস মহীপতী.

২৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পুপ্ফথূপিযো থেৰো ইমা গাথাযো অভাসিত্থাতি.

পুপ্ফথূপিযত্থেৰস্সাপদানং দুতিযং.

৩. পাযসদাযকত্থেৰঅপদানং

২৬. ‘‘সুৱণ্ণৱণ্ণো সম্বুদ্ধো, বাত্তিংসৱৰলক্খণো;

পৱনা [পধানো (ক.)] অভিনিক্খন্তো, ভিক্খুসঙ্ঘপুৰক্খতো [সুৱণ্ণৱণ্ণং …পে… পুৰক্খতং-এৱং দুতিযন্তৱসেন সী. স্যা. পোত্থকেসু দিস্সতি].

২৭. ‘‘মহচ্চা [সহত্থা (স্যা. ক.)] কংসপাতিযা, ৱড্ঢেত্ৱা পাযসং [পাযাসং (স্যা. ক.)] অহং;

আহুতিং যিট্ঠুকামো সো, উপনেসিং বলিং অহং.

২৮. ‘‘ভগৱা তম্হি সমযে, লোকজেট্ঠো নৰাসভো;

চঙ্কমং সুসমাৰূড়্হো, অম্বৰে অনিলাযনে.

২৯. ‘‘তঞ্চ অচ্ছৰিযং দিস্ৱা, অব্ভুতং লোমহংসনং;

ঠপযিত্ৱা কংসপাতিং, ৱিপস্সিং অভিৱাদযিং.

৩০. ‘‘তুৱং দেৱোসি [বুদ্ধোসি (স্যা.)] সব্বঞ্ঞূ, সদেৱে সহমানুসে;

অনুকম্পং উপাদায, পটিগণ্হ মহামুনি.

৩১. ‘‘পটিগ্গহেসি ভগৱা, সব্বঞ্ঞূ লোকনাযকো;

মম সঙ্কপ্পমঞ্ঞায, সত্থা লোকে মহামুনি [অনুত্তৰো (স্যা.)].

৩২. ‘‘একনৱুতিতো কপ্পে, যং দানমদদিং তদা;

দুগ্গতিং নাভিজানামি, পাযসস্স [পাযাসস্স (স্যা. ক.)] ইদং ফলং.

৩৩. ‘‘একতালীসিতো কপ্পে, বুদ্ধো নামাসি খত্তিযো;

সত্তৰতনসম্পন্নো, চক্কৱত্তী মহব্বলো.

৩৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পাযসদাযকো [পাযাসদাযকো (স্যা. ক.)] থেৰো ইমা গাথাযো অভাসিত্থাতি.

পাযসদাযকত্থেৰস্সাপদানং ততিযং.

৪. গন্ধোদকিযত্থেৰঅপদানং

৩৫. ‘‘নিসজ্জ পাসাদৱৰে, ৱিপস্সিং অদ্দসং জিনং;

ককুধং ৱিলসন্তংৱ, সব্বঞ্ঞুং তমনাসকং [সব্বঞ্ঞুত্তমনাযকং (স্যা.), সব্বঞ্ঞুতমনাসৱং (ক.)].

৩৬. ‘‘পাসাদস্সাৱিদূৰে চ, গচ্ছতি লোকনাযকো;

পভা নিদ্ধাৱতে তস্স, যথা চ সতৰংসিনো.

৩৭. ‘‘গন্ধোদকঞ্চ পগ্গয্হ, বুদ্ধসেট্ঠং সমোকিৰিং;

তেন চিত্তপ্পসাদেন, তত্থ কালঙ্কতো অহং.

৩৮. ‘‘একনৱুতিতো কপ্পে, যং গন্ধোদকমাকিৰিং;

দুগ্গতিং নাভিজানামি, বুদ্ধপূজাযিদং ফলং.

৩৯. ‘‘একত্তিংসে ইতো কপ্পে, সুগন্ধো নাম খত্তিযো;

সত্তৰতনসম্পন্নো, চক্কৱত্তী মহব্বলো.

৪০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা গন্ধোদকিযো থেৰো ইমা গাথাযো অভাসিত্থাতি.

গন্ধোদকিযত্থেৰস্সাপদানং চতুত্থং.

৫. সম্মুখাথৱিকত্থেৰঅপদানং

৪১. ‘‘জাযমানে ৱিপস্সিম্হি, নিমিত্তং ব্যাকৰিং অহং;

‘নিব্বাপযিঞ্চ [নিব্বাপযং চ (সী. স্যা.), নিব্বাপযন্তো (?)] জনতং, বুদ্ধো লোকে ভৱিস্সতি.

৪২. ‘‘‘যস্মিঞ্চ জাযমানস্মিং, দসসহস্সি কম্পতি;

সো দানি ভগৱা সত্থা, ধম্মং দেসেতি চক্খুমা.

৪৩. ‘‘‘যস্মিঞ্চ জাযমানস্মিং, আলোকো ৱিপুলো অহু;

সো দানি ভগৱা সত্থা, ধম্মং দেসেতি চক্খুমা.

৪৪. ‘‘‘যস্মিঞ্চ জাযমানস্মিং, সৰিতাযো ন সন্দযুং [সন্দিসুং (সী. স্যা.)];

সো দানি ভগৱা সত্থা, ধম্মং দেসেতি চক্খুমা.

৪৫. ‘‘‘যস্মিঞ্চ জাযমানস্মিং, অৱীচগ্গি ন পজ্জলি;

সো দানি ভগৱা সত্থা, ধম্মং দেসেতি চক্খুমা.

৪৬. ‘‘‘যস্মিঞ্চ জাযমানস্মিং, পক্খিসঙ্ঘো ন সংচৰি;

সো দানি ভগৱা সত্থা, ধম্মং দেসেতি চক্খুমা.

৪৭. ‘‘‘যস্মিঞ্চ জাযমানস্মিং, ৱাতক্খন্ধো ন ৱাযতি;

সো দানি ভগৱা সত্থা, ধম্মং দেসেতি চক্খুমা.

৪৮. ‘‘‘যস্মিঞ্চ জাযমানস্মিং, সব্বৰতনানি জোতযুং [জোতিসুং (সী. স্যা.)];

সো দানি ভগৱা সত্থা, ধম্মং দেসেতি চক্খুমা.

৪৯. ‘‘‘যস্মিঞ্চ জাযমানস্মিং, সত্তাসুং পদৱিক্কমা;

সো দানি ভগৱা সত্থা, ধম্মং দেসেতি চক্খুমা.

৫০. ‘‘‘জাতমত্তো চ সম্বুদ্ধো, দিসা সব্বা ৱিলোকযি;

ৱাচাসভিমুদীৰেসি, এসা বুদ্ধান ধম্মতা’.

৫১. ‘‘সংৱেজযিত্ৱা জনতং, থৱিত্ৱা লোকনাযকং;

সম্বুদ্ধং অভিৱাদেত্ৱা, পক্কামিং পাচিনামুখো.

৫২. ‘‘একনৱুতিতো কপ্পে, যং বুদ্ধমভিথোমযিং;

দুগ্গতিং নাভিজানামি, থোমনায ইদং ফলং.

৫৩. ‘‘ইতো নৱুতিকপ্পম্হি, সম্মুখাথৱিকৱ্হযো;

সত্তৰতনসম্পন্নো, চক্কৱত্তী মহব্বলো.

৫৪. ‘‘পথৱীদুন্দুভি নাম [দুদ্দসি নাম (ক.)], একূননৱুতিম্হিতো;

সত্তৰতনসম্পন্নো, চক্কৱত্তী মহব্বলো.

৫৫. ‘‘অট্ঠাসীতিম্হিতো কপ্পে, ওভাসো নাম খত্তিযো;

সত্তৰতনসম্পন্নো, চক্কৱত্তী মহব্বলো.

৫৬. ‘‘সত্তাসীতিম্হিতো কপ্পে, সৰিতচ্ছেদনৱ্হযো;

সত্তৰতনসম্পন্নো, চক্কৱত্তী মহব্বলো.

৫৭. ‘‘অগ্গিনিব্বাপনো নাম, কপ্পানং ছড়সীতিযা;

সত্তৰতনসম্পন্নো, চক্কৱত্তী মহব্বলো.

৫৮. ‘‘গতিপচ্ছেদনো নাম, কপ্পানং পঞ্চসীতিযা;

সত্তৰতনসম্পন্নো, চক্কৱত্তী মহব্বলো.

৫৯. ‘‘ৰাজা ৱাতসমো নাম, কপ্পানং চুল্লসীতিযা;

সত্তৰতনসম্পন্নো, চক্কৱত্তী মহব্বলো.

৬০. ‘‘ৰতনপজ্জলো নাম, কপ্পানং তেঅসীতিযা;

সত্তৰতনসম্পন্নো, চক্কৱত্তী মহব্বলো.

৬১. ‘‘পদৱিক্কমনো নাম, কপ্পানং দ্ৱেঅসীতিযা;

সত্তৰতনসম্পন্নো, চক্কৱত্তী মহব্বলো.

৬২. ‘‘ৰাজা ৱিলোকনো নাম, কপ্পানং একসীতিযা;

সত্তৰতনসম্পন্নো, চক্কৱত্তী মহব্বলো.

৬৩. ‘‘গিৰসাৰোতি নামেন, কপ্পেসীতিম্হি খত্তিযো;

সত্তৰতনসম্পন্নো, চক্কৱত্তী মহব্বলো.

৬৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সম্মুখাথৱিকো থেৰো ইমা গাথাযো অভাসিত্থাতি.

সম্মুখাথৱিকত্থেৰস্সাপদানং পঞ্চমং.

৬. কুসুমাসনিযত্থেৰঅপদানং

৬৫. ‘‘নগৰে ধঞ্ঞৱতিযা, অহোসিং ব্ৰাহ্মণো তদা;

লক্খণে ইতিহাসে চ, সনিঘণ্ডুসকেটুভে.

৬৬. ‘‘পদকো ৱেয্যাকৰণো, নিমিত্তকোৱিদো অহং;

মন্তে চ সিস্সে ৱাচেসিং, তিণ্ণং ৱেদান পাৰগূ.

৬৭. ‘‘পঞ্চ উপ্পলহত্থানি, পিট্ঠিযং ঠপিতানি মে;

আহুতিং যিট্ঠুকামোহং, পিতুমাতুসমাগমে.

৬৮. ‘‘তদা ৱিপস্সী ভগৱা, ভিক্খুসঙ্ঘপুৰক্খতো;

ওভাসেন্তো দিসা সব্বা, আগচ্ছতি নৰাসভো.

৬৯. ‘‘আসনং পঞ্ঞপেত্ৱান, নিমন্তেত্ৱা মহামুনিং;