১. সুধাপিণ্ডিযত্থেৰঅপদানং

১. ‘‘পূজাৰহে পূজযতো, বুদ্ধে যদি ৱ সাৱকে;

পপঞ্চসমতিক্কন্তে, তিণ্ণসোকপৰিদ্দৱে.

২. ‘‘তে তাদিসে পূজযতো, নিব্বুতে অকুতোভযে;

ন সক্কা পুঞ্ঞং সঙ্খাতুং, ইমেত্তমপি [ইদম্মত্তন্তি (সী.), ইমেত্থমপি (ক.)] কেনচি.

৩. ‘‘চতুন্নমপি দীপানং, ইস্সৰং যোধ কাৰযে;

একিস্সা পূজনাযেতং, কলং নাগ্ঘতি সোড়সিং.

৪. ‘‘সিদ্ধত্থস্স নৰগ্গস্স, চেতিযে ফলিতন্তৰে;

সুধাপিণ্ডো মযা দিন্নো, ৱিপ্পসন্নেন চেতসা.

৫. ‘‘চতুন্নৱুতিতো কপ্পে, যং কম্মমকৰিং তদা;

দুগ্গতিং নাভিজানামি, পটিসঙ্খাৰস্সিদং ফলং.

৬. ‘‘ইতো তিংসতিকপ্পম্হি, পটিসঙ্খাৰসৱ্হযা;

সত্তৰতনসম্পন্না, তেৰস চক্কৱত্তিনো.

৭. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা সুধাপিণ্ডিযো থেৰো ইমা গাথাযো অভাসিত্থাতি.

সুধাপিণ্ডিযত্থেৰস্সাপদানং পঠমং.