৩-২. মহামোগ্গল্লানত্থেৰঅপদানং

৩৭৫. ‘‘অনোমদস্সী ভগৱা, লোকজেট্ঠো নৰাসভো;

ৱিহাসি হিমৱন্তম্হি, দেৱসঙ্ঘপুৰক্খতো.

৩৭৬. ‘‘ৱৰুণো নাম নামেন, নাগৰাজা অহং তদা;

কামৰূপী ৱিকুব্বামি, মহোদধিনিৱাসহং.

৩৭৭. ‘‘সঙ্গণিযং গণং হিত্ৱা, তূৰিযং পট্ঠপেসহং;

সম্বুদ্ধং পৰিৱাৰেত্ৱা, ৱাদেসুং অচ্ছৰা তদা.

৩৭৮. ‘‘ৱজ্জমানেসু তূৰেসু, দেৱা তূৰানি [তুৰিযেসু, দেৱা তুৰিযানি (সী. স্যা.)] ৱজ্জযুং;

উভিন্নং সদ্দং সুত্ৱান, বুদ্ধোপি সম্পবুজ্ঝথ.

৩৭৯. ‘‘নিমন্তেত্ৱান সম্বুদ্ধং, সকং ভৱনুপাগমিং;

আসনং পঞ্ঞপেত্ৱান, কালমাৰোচযিং অহং.

৩৮০. ‘‘খীণাসৱসহস্সেহি, পৰিৱুতো লোকনাযকো;

ওভাসেন্তো দিসা সব্বা, ভৱনং মে উপাগমি.

৩৮১. ‘‘উপৱিট্ঠং মহাৱীৰং, দেৱদেৱং নৰাসভং;

সভিক্খুসঙ্ঘং তপ্পেসিং [সন্তপ্পেসিং (স্যা.), তপ্পেমি (ক.)], অন্নপানেনহং তদা.

৩৮২. ‘‘অনুমোদি মহাৱীৰো, সযম্ভূ অগ্গপুগ্গলো;

ভিক্খুসঙ্ঘে নিসীদিত্ৱা, ইমা গাথা অভাসথ.

৩৮৩. ‘‘‘যো সো [যং সো (ক.)] সঙ্ঘং অপূজেসি, বুদ্ধঞ্চ লোকনাযকং;

তেন চিত্তপ্পসাদেন, দেৱলোকং গমিস্সতি.

৩৮৪. ‘‘‘সত্তসত্ততিক্খত্তুঞ্চ, দেৱৰজ্জং কৰিস্সতি;

পথব্যা ৰজ্জং অট্ঠসতং, ৱসুধং আৱসিস্সতি.

৩৮৫. ‘‘‘পঞ্চপঞ্ঞাসক্খত্তুঞ্চ, চক্কৱত্তী ভৱিস্সতি;

ভোগা অসঙ্খিযা তস্স, উপ্পজ্জিস্সন্তি তাৱদে.

৩৮৬. ‘‘‘অপৰিমেয্যে ইতো কপ্পে, ওক্কাককুলসম্ভৱো;

গোতমো নাম গোত্তেন [নামেন (সী.)], সত্থা লোকে ভৱিস্সতি.

৩৮৭. ‘‘‘নিৰযা সো চৱিত্ৱান, মনুস্সতং গমিস্সতি;

কোলিতো নাম নামেন, ব্ৰহ্মবন্ধু ভৱিস্সতি.

৩৮৮. ‘‘‘সো পচ্ছা পব্বজিত্ৱান, কুসলমূলেন চোদিতো;

গোতমস্স ভগৱতো, দুতিযো হেস্সতি সাৱকো.

৩৮৯. ‘‘‘আৰদ্ধৱীৰিযো পহিতত্তো, ইদ্ধিযা পাৰমিং গতো;

সব্বাসৱে পৰিঞ্ঞায, নিব্বাযিস্সতিনাসৱো’.

৩৯০. ‘‘পাপমিত্তোপনিস্সায, কামৰাগৱসং গতো;

মাতৰং পিতৰঞ্চাপি, ঘাতযিং দুট্ঠমানসো.

৩৯১. ‘‘যং যং যোনুপপজ্জামি, নিৰযং অথ মানুসং;

পাপকম্মসমঙ্গিতা, ভিন্নসীসো মৰামহং.

৩৯২. ‘‘ইদং পচ্ছিমকং ময্হং, চৰিমো ৱত্ততে ভৱো;

ইধাপি এদিসো ময্হং, মৰণকালে ভৱিস্সতি.

৩৯৩. ‘‘পৱিৱেকমনুযুত্তো, সমাধিভাৱনাৰতো;

সব্বাসৱে পৰিঞ্ঞায, ৱিহৰামি অনাসৱো.

৩৯৪. ‘‘ধৰণিম্পি সুগম্ভীৰং, বহলং দুপ্পধংসিযং;

ৱামঙ্গুট্ঠেন খোভেয্যং, ইদ্ধিযা পাৰমিং গতো.

৩৯৫. ‘‘অস্মিমানং ন পস্সামি, মানো ময্হং ন ৱিজ্জতি;

সামণেৰে উপাদায, গৰুচিত্তং কৰোমহং.

৩৯৬. ‘‘অপৰিমেয্যে ইতো কপ্পে, যং কম্মমভিনীহৰিং;

তাহং ভূমিমনুপ্পত্তো, পত্তোম্হি আসৱক্খযং.

৩৯৭. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা মহামোগ্গল্লানো থেৰো ইমা গাথাযো অভাসিত্থাতি.

মহামোগ্গল্লানত্থেৰস্সাপদানং দুতিযং.