৩-৩. মহাকস্সপত্থেৰঅপদানং

৩৯৮. ‘‘পদুমুত্তৰস্স ভগৱতো, লোকজেট্ঠস্স তাদিনো;

নিব্বুতে লোকনাথম্হি, পূজং কুব্বন্তি সত্থুনো.

৩৯৯. ‘‘উদগ্গচিত্তা জনতা, আমোদিতপমোদিতা;

তেসু সংৱেগজাতেসু, পীতি মে উদপজ্জথ.

৪০০. ‘‘ঞাতিমিত্তে সমানেত্ৱা, ইদং ৱচনমব্ৰৱিং;

পৰিনিব্বুতো মহাৱীৰো, হন্দ পূজং কৰোমসে.

৪০১. ‘‘সাধূতি তে পটিস্সুত্ৱা, ভিয্যো হাসং জনিংসু মে;

বুদ্ধস্মিং লোকনাথম্হি, কাহাম পুঞ্ঞসঞ্চযং.

৪০২. ‘‘অগ্ঘিযং সুকতং কত্ৱা, সতহত্থসমুগ্গতং;

দিযড্ঢহত্থপত্থটং, ৱিমানং নভমুগ্গতং.

৪০৩. ‘‘কত্ৱান হম্মিযং তত্থ, তালপন্তীহি চিত্তিতং;

সকং চিত্তং পসাদেত্ৱা, চেতিযং পূজযুত্তমং.

৪০৪. ‘‘অগ্গিক্খন্ধোৱ জলিতো, কিংসুকো ইৱ [সালৰাজাৱ (সী.)] ফুল্লিতো;

ইন্দলট্ঠীৱ আকাসে, ওভাসেতি চতুদ্দিসা.

৪০৫. ‘‘তত্থ চিত্তং পসাদেত্ৱা, কত্ৱান কুসলং বহুং;

পুব্বকম্মং সৰিত্ৱান, তিদসং উপপজ্জহং.

৪০৬. ‘‘সহস্সযুত্তং হযৱাহিং, দিব্বযানমধিট্ঠিতো;

উব্বিদ্ধং ভৱনং ময্হং, সত্তভূমং সমুগ্গতং.

৪০৭. ‘‘কূটাগাৰসহস্সানি, সব্বসোণ্ণমযা অহুং;

জলন্তি সকতেজেন, দিসা সব্বা পভাসযং.

৪০৮. ‘‘সন্তি অঞ্ঞেপি নিয্যূহা, লোহিতঙ্গমযা তদা;

তেপি জোতন্তি আভায, সমন্তা চতুৰো দিসা.

৪০৯. ‘‘পুঞ্ঞকম্মাভিনিব্বত্তা, কূটাগাৰা সুনিম্মিতা;

মণিমযাপি জোতন্তি, দিসা দস [দিসোদিসং (স্যা.)] সমন্ততো.

৪১০. ‘‘তেসং উজ্জোতমানানং, ওভাসো ৱিপুলো অহু;

সব্বে দেৱে অভিভোমি, পুঞ্ঞকম্মস্সিদং ফলং.

৪১১. ‘‘সট্ঠিকপ্পসহস্সম্হি, উব্বিদ্ধো নাম খত্তিযো;

চাতুৰন্তো ৱিজিতাৱী, পথৱিং আৱসিং অহং.

৪১২. ‘‘তথেৱ ভদ্দকে কপ্পে, তিংসক্খত্তুং অহোসহং;

সককম্মাভিৰদ্ধোম্হি, চক্কৱত্তী মহব্বলো.

৪১৩. ‘‘সত্তৰতনসম্পন্নো, চতুদীপম্হি ইস্সৰো;

তত্থাপি ভৱনং ময্হং, ইন্দলট্ঠীৱ উগ্গতং.

৪১৪. ‘‘আযামতো চতুব্বীসং, ৱিত্থাৰেন চ দ্ৱাদস;

ৰম্মণং [ৰম্মকং (সী. স্যা.)] নাম নগৰং, দড়্হপাকাৰতোৰণং.

৪১৫. ‘‘আযামতো পঞ্চসতং, ৱিত্থাৰেন তদড্ঢকং;

আকিণ্ণং জনকাযেহি, তিদসানং পুৰং ৱিয.

৪১৬. ‘‘যথা সূচিঘৰে সূচী, পক্খিত্তা পণ্ণৱীসতি;

অঞ্ঞমঞ্ঞং পঘট্টেন্তি, আকিণ্ণং হোতি লঙ্কতং [তং তদা (সী.), সততা (স্যা.), সঙ্কৰং (?)].

৪১৭. ‘‘এৱম্পি নগৰং ময্হং, হত্থিস্সৰথসংকুলং;

মনুস্সেহি সদাকিণ্ণং, ৰম্মণং নগৰুত্তমং.

৪১৮. ‘‘তত্থ ভুত্ৱা পিৱিত্ৱা চ, পুন দেৱত্তনং গতো [পুনপি দেৱতঙ্গতো (ক.)].

ভৱে পচ্ছিমকে ময্হং, অহোসি কুলসম্পদা.

৪১৯. ‘‘ব্ৰাহ্মঞ্ঞকুলসম্ভূতো, মহাৰতনসঞ্চযো;

অসীতিকোটিযো হিত্ৱা, হিৰঞ্ঞস্সাপি পব্বজিং.

৪২০. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা মহাকস্সপো থেৰো ইমা গাথাযো অভাসিত্থাতি.

মহাকস্সপত্থেৰস্সাপদানং ততিযং.