৩-১. সাৰিপুত্তত্থেৰঅপদানং

অথ থেৰাপদানং সুণাথ –

১৪১. ‘‘হিমৱন্তস্স অৱিদূৰে, লম্বকো নাম পব্বতো;

অস্সমো সুকতো ময্হং, পণ্ণসালা সুমাপিতা.

১৪২. ‘‘উত্তানকূলা নদিকা, সুপতিত্থা মনোৰমা;

সুসুদ্ধপুড়িনাকিণ্ণা, অৱিদূৰে মমস্সমং.

১৪৩. ‘‘অসক্খৰা অপব্ভাৰা, সাদু অপ্পটিগন্ধিকা;

সন্দতী নদিকা তত্থ, সোভযন্তা মমস্সমং.

১৪৪. ‘‘কুম্ভীলা মকৰা চেত্থ, সুসুমাৰা [সুংসুমাৰা (সী. স্যা. )] চ কচ্ছপা;

চৰন্তি নদিযা তত্থ, সোভযন্তা মমস্সমং.

১৪৫. ‘‘পাঠীনা পাৱুসা মচ্ছা, বলজা [ৱজলা (সী. স্যা.) জলজা (পী.)] মুঞ্জৰোহিতা;

ৱগ্গড়া [ৱগ্গুলা (সী.) ৱগ্গুড়া (স্যা.) মগ্গুৰা (থেৰগাথা)] পপতাযন্তা, সোভযন্তি [পপতাযন্তি, সোভযন্তা (ক.)] মমস্সমং.

১৪৬. ‘‘উভো কূলেসু নদিযা, পুপ্ফিনো ফলিনো দুমা;

উভতো অভিলম্বন্তা, সোভযন্তি [অভিলম্বন্তি সোভযন্তা (ক.)] মমস্সমং.

১৪৭. ‘‘অম্বা সালা চ তিলকা, পাটলী সিন্দুৱাৰকা [সিন্দুৱাৰিকা (বহূসু)];

দিব্বগন্ধা সম্পৱন্তি, পুপ্ফিতা মম অস্সমে.

১৪৮. ‘‘চম্পকা সড়লা নীপা [নিম্বা (ক.)], নাগপুন্নাগকেতকা;

দিব্বগন্ধা সম্পৱন্তি, পুপ্ফিতা মম অস্সমে.

১৪৯. ‘‘অতিমুত্তা অসোকা চ, ভগিনীমালা চ পুপ্ফিতা;

অঙ্কোলা বিম্বিজালা [বিম্বজালা (ক.)] চ, পুপ্ফিতা মম অস্সমে.

১৫০. ‘‘কেতকা কন্দলি [কদলী (স্যা.)] চেৱ, গোধুকা তিণসূলিকা;

দিব্বগন্ধং সম্পৱন্তা, সোভযন্তি মমস্সমং.

১৫১. ‘‘কণিকাৰা কণ্ণিকা চ, অসনা অজ্জুনা বহূ;

দিব্বগন্ধং সম্পৱন্তা, সোভযন্তি মমস্সমং.

১৫২. ‘‘পুন্নাগা গিৰিপুন্নাগা, কোৱিড়াৰা চ পুপ্ফিতা;

দিব্বগন্ধং সম্পৱন্তা, সোভযন্তি মমস্সমং.

১৫৩. ‘‘উদ্ধালকা চ কুটজা, কদম্বা ৱকুলা বহূ;

দিব্বগন্ধং সম্পৱন্তা, সোভযন্তি মমস্সমং.

১৫৪. ‘‘আড়কা ইসিমুগ্গা চ, কদলিমাতুলুঙ্গিযো;

গন্ধোদকেন সংৱড্ঢা, ফলানি ধাৰযন্তি তে.

১৫৫. ‘‘অঞ্ঞে পুপ্ফন্তি পদুমা, অঞ্ঞে জাযন্তি কেসৰী;

অঞ্ঞে ওপুপ্ফা পদুমা, পুপ্ফিতা তড়াকে তদা.

১৫৬. ‘‘গব্ভং গণ্হন্তি পদুমা, নিদ্ধাৱন্তি মুলাড়িযো;

সিংঘাটিপত্তমাকিণ্ণা, সোভন্তি তড়াকে তদা.

১৫৭. ‘‘নযিতা অম্বগন্ধী চ, উত্তলী বন্ধুজীৱকা;

দিব্বগন্ধা সম্পৱন্তি, পুপ্ফিতা তড়াকে তদা.

১৫৮. ‘‘পাঠীনা পাৱুসা মচ্ছা, বলজা মুঞ্জৰোহিতা;

সংগুলা মগ্গুৰা [মঙ্গুৰা (সী. ক.)] চেৱ, ৱসন্তি তড়াকে তদা.

১৫৯. ‘‘কুম্ভীলা সুসুমাৰা চ, তন্তিগাহা চ ৰক্খসা;

ওগুহা [ওগাহা (স্যা.)] অজগৰা চ, ৱসন্তি তড়াকে তদা.

১৬০. ‘‘পাৰেৱতা ৰৱিহংসা, চক্কৱাকা নদীচৰা;

কোকিলা সুকসাড়িকা, উপজীৱন্তি তং সৰং.

১৬১. ‘‘কুক্কুত্থকা কুড়ীৰকা, ৱনে পোক্খৰসাতকা;

দিন্দিভা সুৱপোতা চ, উপজীৱন্তি তং সৰং.

১৬২. ‘‘হংসা কোঞ্চা মযূৰা চ, কোকিলা তম্বচূড়কা [তম্বচূড়িকা (সী.)];

পম্পকা জীৱংজীৱা চ, উপজীৱন্তি তং সৰং.

১৬৩. ‘‘কোসিকা পোট্ঠসীসা চ, কুৰৰা সেনকা বহূ;

মহাকাড়া চ সকুণা, উপজীৱন্তি তং সৰং.

১৬৪. ‘‘পসদা চ ৱৰাহা চ, চমৰা গণ্ডকা বহূ [ৱকা ভেৰণ্ডকা বহূ (সী. স্যা.)];

ৰোহিচ্চা সুকপোতা [সুত্তপোতা (স্যা.)] চ, উপজীৱন্তি তং সৰং.

১৬৫. ‘‘সীহব্যগ্ঘা চ দীপী চ, অচ্ছকোকতৰচ্ছকা;

তিধা পভিন্নমাতঙ্গা, উপজীৱন্তি তং সৰং.

১৬৬. ‘‘কিন্নৰা ৱানৰা চেৱ, অথোপি ৱনকম্মিকা;

চেতা চ লুদ্দকা চেৱ, উপজীৱন্তি তং সৰং.

১৬৭. ‘‘তিন্দুকানি পিযালানি, মধুকা কাসুমাৰযো [কাসমাৰিযো (স্যা.)];

ধুৱং ফলানি ধাৰেন্তি, অৱিদূৰে মমস্সমং.

১৬৮. ‘‘কোসম্বা [কোসুম্ভা (সী. স্যা.)] সড়লা নিম্বা [সড়লা নীপা (সী. স্যা.) পনসা অম্বা (?)], সাদুফলসমাযুতা;

ধুৱং ফলানি ধাৰেন্তি, অৱিদূৰে মমস্সমং.

১৬৯. ‘‘হৰীতকা আমলকা, অম্বজম্বুৱিভীতকা;

কোলা ভল্লাতকা বিল্লা, ফলানি ধাৰযন্তি তে.

১৭০. ‘‘আলুৱা চ কড়ম্বা চ, বিড়ালীতক্কড়ানি চ;

জীৱকা সুতকা চেৱ, বহুকা মম অস্সমে.

১৭১. ‘‘অস্সমস্সাৱিদূৰম্হি, তড়াকাসুং সুনিম্মিতা;

অচ্ছোদকা সীতজলা, সুপতিত্থা মনোৰমা.

১৭২. ‘‘পদুমুপ্পলসঞ্ছন্না, পুণ্ডৰীকসমাযুতা;

মন্দালকেহি সঞ্ছন্না, দিব্বগন্ধো পৱাযতি.

১৭৩. ‘‘এৱং সব্বঙ্গসম্পন্নে, পুপ্ফিতে ফলিতে ৱনে;

সুকতে অস্সমে ৰম্মে, ৱিহৰামি অহং তদা.

১৭৪. ‘‘সীলৱা ৱতসম্পন্নো [ৱত্তসম্পন্নো (স্যা.)], ঝাযী ঝানৰতো সদা;

পঞ্চাভিঞ্ঞাবলপ্পত্তো, সুৰুচি নাম তাপসো.

১৭৫. ‘‘চতুৱীসসহস্সানি, সিস্সা ময্হং উপট্ঠহু;

সব্বেৱ ব্ৰাহ্মণা এতে, জাতিমন্তো যসস্সিনো.

১৭৬. ‘‘লক্খণে ইতিহাসে চ, সনিঘণ্টুসকেটুভে;

পদকা ৱেয্যাকৰণা, সধম্মে পাৰমিং গতা.

১৭৭. ‘‘উপ্পাতেসু নিমিত্তেসু, লক্খণেসু চ কোৱিদা;

পথব্যা ভূমন্তলিক্খে, মম সিস্সা সুসিক্খিতা.

১৭৮. ‘‘অপ্পিচ্ছা নিপকা এতে, অপ্পাহাৰা অলোলুপা;

লাভালাভেন সন্তুট্ঠা, পৰিৱাৰেন্তি মং সদা.

১৭৯. ‘‘ঝাযী ঝানৰতা ধীৰা, সন্তচিত্তা সমাহিতা;

আকিঞ্চঞ্ঞং পত্থযন্তা, পৰিৱাৰেন্তি মং সদা.

১৮০. ‘‘অভিঞ্ঞাপাৰমিপ্পত্তা, পেত্তিকে গোচৰে ৰতা;

অন্তলিক্খচৰা ধীৰা, পৰিৱাৰেন্তি মং সদা.

১৮১. ‘‘সংৱুতা ছসু দ্ৱাৰেসু, অনেজা ৰক্খিতিন্দ্ৰিযা;

অসংসট্ঠা চ তে ধীৰা, মম সিস্সা দুৰাসদা.

১৮২. ‘‘পল্লঙ্কেন নিসজ্জায, ঠানচঙ্কমনেন চ;

ৱীতিনামেন্তি তে ৰত্তিং, মম সিস্সা দুৰাসদা.

১৮৩. ‘‘ৰজনীযে ন ৰজ্জন্তি, দুস্সনীযে ন দুস্সৰে;

মোহনীযে ন মুয্হন্তি, মম সিস্সা দুৰাসদা.

১৮৪. ‘‘ইদ্ধিং ৱীমংসমানা তে, ৱত্তন্তি নিচ্চকালিকং;

পথৱিং [পঠৱিং (সী. স্যা.)] তে পকম্পেন্তি, সাৰম্ভেন দুৰাসদা.

১৮৫. ‘‘কীড়মানা চ তে সিস্সা, কীড়ন্তি ঝানকীড়িতং;

জম্বুতো ফলমানেন্তি, মম সিস্সা দুৰাসদা.

১৮৬. ‘‘অঞ্ঞে গচ্ছন্তি গোযানং, অঞ্ঞে পুব্বৱিদেহকং [পুব্বৱিদেহনং (স্যা. ক.)];

অঞ্ঞে চ উত্তৰকুৰুং, এসনায দুৰাসদা.

১৮৭. ‘‘পুৰতো পেসেন্তি খাৰিং, পচ্ছতো চ ৱজন্তি তে;

চতুৱীসসহস্সেহি, ছাদিতং হোতি অম্বৰং.

১৮৮. ‘‘অগ্গিপাকী অনগ্গী চ, দন্তোদুক্খলিকাপি চ;

অস্মেন কোট্টিতা কেচি, পৱত্তফলভোজনা.

১৮৯. ‘‘উদকোৰোহণা কেচি, সাযং পাতো সুচীৰতা;

তোযাভিসেচনকৰা, মম সিস্সা দুৰাসদা.

১৯০. ‘‘পৰূড়্হকচ্ছনখলোমা, পঙ্কদন্তা ৰজস্সিৰা;

গন্ধিতা সীলগন্ধেন, মম সিস্সা দুৰাসদা.

১৯১. ‘‘পাতোৱ সন্নিপতিত্ৱা, জটিলা উগ্গতাপনা;

লাভালাভং পকিত্তেত্ৱা, গচ্ছন্তি অম্বৰে তদা.

১৯২. ‘‘এতেসং পক্কমন্তানং, মহাসদ্দো পৱত্ততি;

অজিনচম্মসদ্দেন, মুদিতা হোন্তি দেৱতা.

১৯৩. ‘‘দিসোদিসং পক্কমন্তি, অন্তলিক্খচৰা ইসী;

সকে বলেনুপত্থদ্ধা, তে গচ্ছন্তি যদিচ্ছকং.

১৯৪. ‘‘পথৱীকম্পকা এতে, সব্বেৱ নভচাৰিনো;

উগ্গতেজা দুপ্পসহা, সাগৰোৱ অখোভিযা.

১৯৫. ‘‘ঠানচঙ্কমিনো কেচি, কেচি নেসজ্জিকা ইসী;

পৱত্তভোজনা কেচি, মম সিস্সা দুৰাসদা.

১৯৬. ‘‘মেত্তাৱিহাৰিনো এতে, হিতেসী সব্বপাণিনং;

অনত্তুক্কংসকা সব্বে, ন তে ৱম্ভেন্তি কস্সচি.

১৯৭. ‘‘সীহৰাজাৱসম্ভীতা, গজৰাজাৱ থামৱা;

দুৰাসদা ব্যগ্ঘাৰিৱ, আগচ্ছন্তি মমন্তিকে.

১৯৮. ‘‘ৱিজ্জাধৰা দেৱতা চ, নাগগন্ধব্বৰক্খসা;

কুম্ভণ্ডা দানৱা গৰুড়া, উপজীৱন্তি তং সৰং.

১৯৯. ‘‘তে জটাখাৰিভৰিতা, অজিনুত্তৰৱাসনা;

অন্তলিক্খচৰা সব্বে, উপজীৱন্তি তং সৰং.

২০০. ‘‘সদানুচ্ছৱিকা [তদানুচ্ছৱিকা (স্যা. ক.)] এতে, অঞ্ঞমঞ্ঞং সগাৰৱা;

চতুব্বীসসহস্সানং, খিপিতসদ্দো ন ৱিজ্জতি.

২০১. ‘‘পাদে পাদং নিক্খিপন্তা, অপ্পসদ্দা সুসংৱুতা;

উপসঙ্কম্ম সব্বেৱ [সব্বে তে (স্যা.)], সিৰসা ৱন্দৰে মমং.

২০২. ‘‘তেহি সিস্সেহি পৰিৱুতো, সন্তেহি চ তপস্সিভি;

ৱসামি অস্সমে তত্থ, ঝাযী ঝানৰতো অহং.

২০৩. ‘‘ইসীনং সীলগন্ধেন, পুপ্ফগন্ধেন চূভযং;

ফলীনং ফলগন্ধেন, গন্ধিতো হোতি অস্সমো.

২০৪. ‘‘ৰত্তিন্দিৱং ন জানামি, অৰতি মে ন ৱিজ্জতি;

সকে সিস্সে ওৱদন্তো, ভিয্যো হাসং লভামহং.

২০৫. ‘‘পুপ্ফানং পুপ্ফমানানং, ফলানঞ্চ ৱিপচ্চতং;

দিব্বগন্ধা পৱাযন্তি, সোভযন্তা মমস্সমং.

২০৬. ‘‘সমাধিম্হা ৱুট্ঠহিত্ৱা, আতাপী নিপকো অহং;

খাৰিভাৰং গহেত্ৱান, ৱনং অজ্ঝোগহিং অহং.

২০৭. ‘‘উপ্পাতে সুপিনে চাপি, লক্খণেসু সুসিক্খিতো;

পৱত্তমানং [ৱত্তমানং (ক.)] মন্তপদং, ধাৰযামি অহং তদা.

২০৮. ‘‘অনোমদস্সী ভগৱা, লোকজেট্ঠো নৰাসভো;

ৱিৱেককামো সম্বুদ্ধো, হিমৱন্তমুপাগমি.

২০৯. ‘‘অজ্ঝোগাহেত্ৱা হিমৱন্তং, অগ্গো কাৰুণিকো মুনি;

পল্লঙ্কং আভুজিত্ৱান, নিসীদি পুৰিসুত্তমো.

২১০. ‘‘তমদ্দসাহং সম্বুদ্ধং, সপ্পভাসং মনোৰমং;

ইন্দীৱৰংৱ জলিতং, আদিত্তংৱ হুতাসনং.

২১১. ‘‘জলন্তং দীপৰুক্খংৱ, ৱিজ্জুতং গগণে যথা;

সুফুল্লং সালৰাজংৱ, অদ্দসং লোকনাযকং.

২১২. ‘‘অযং নাগো মহাৱীৰো, দুক্খস্সন্তকৰো মুনি;

ইমং দস্সনমাগম্ম, সব্বদুক্খা পমুচ্চৰে.

২১৩. ‘‘দিস্ৱানাহং দেৱদেৱং, লক্খণং উপধাৰযিং;

বুদ্ধো নু খো ন ৱা বুদ্ধো, হন্দ পস্সামি চক্খুমং.

২১৪. ‘‘সহস্সাৰানি চক্কানি, দিস্সন্তি চৰণুত্তমে;

লক্খণানিস্স দিস্ৱান, নিট্ঠং গচ্ছিং তথাগতে.