৩-৮. পিণ্ডোলভাৰদ্ৱাজত্থেৰঅপদানং

৬১৩. ‘‘পদুমুত্তৰো নাম জিনো, সযম্ভূ অগ্গপুগ্গলো;

পুৰতো হিমৱন্তস্স, চিত্তকূটে ৱসী তদা.

৬১৪. ‘‘অভীতৰূপো তত্থাসিং, মিগৰাজা চতুক্কমো;

তস্স সদ্দং সুণিত্ৱান, ৱিক্খম্ভন্তি বহুজ্জনা.

৬১৫. ‘‘সুফুল্লং পদুমং গয্হ, উপগচ্ছিং নৰাসভং;

ৱুট্ঠিতস্স সমাধিম্হা, বুদ্ধস্স অভিৰোপযিং.

৬১৬. ‘‘চাতুদ্দিসং নমস্সিত্ৱা, বুদ্ধসেট্ঠং নৰুত্তমং;

সকং চিত্তং পসাদেত্ৱা, সীহনাদং নদিং অহং [তদা (স্যা.)].

৬১৭. ‘‘পদুমুত্তৰো লোকৱিদূ, আহুতীনং পটিগ্গহো;

সকাসনে নিসীদিত্ৱা, ইমা গাথা অভাসথ.

৬১৮. ‘‘‘বুদ্ধস্স গিৰমঞ্ঞায, সব্বে দেৱা সমাগতা;

আগতো ৱদতং সেট্ঠো, ধম্মং সোস্সাম তং মযং.

৬১৯. ‘‘‘তেসং হাসপৰেতানং, পুৰতো লোকনাযকো;

মম সদ্দং [কম্মং (?)] পকিত্তেসি, দীঘদস্সী মহামুনি’.

৬২০. ‘‘যেনিদং পদুমং দিন্নং, সীহনাদো চ নাদিতো;

তমহং কিত্তযিস্সামি, সুণাথ মম ভাসতো.

৬২১. ‘‘‘ইতো অট্ঠমকে কপ্পে, চক্কৱত্তী ভৱিস্সতি;

সত্তৰতনসম্পন্নো চতুদীপম্হি ইস্সৰো.

৬২২. ‘‘‘কাৰযিস্সতি ইস্সৰিযং [ইস্সৰং (স্যা. ক.)], মহিযা চতুসট্ঠিযা;

পদুমো নাম নামেন, চক্কৱত্তী মহব্বলো.

৬২৩. ‘‘কপ্পসতসহস্সম্হি, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

৬২৪. ‘পকাসিতে পাৱচনে, ব্ৰহ্মবন্ধু ভৱিস্সতি;

ব্ৰহ্মঞ্ঞা অভিনিক্খম্ম, পব্বজিস্সতি তাৱদে’.

৬২৫. ‘‘পধানপহিতত্তো সো, উপসন্তো নিৰূপধি;

সব্বাসৱে পৰিঞ্ঞায, নিব্বাযিস্সতিনাসৱো.

৬২৬. ‘‘ৱিজনে পন্তসেয্যম্হি, ৱাড়মিগসমাকুলে;

সব্বাসৱে পৰিঞ্ঞায, নিব্বাযিস্সতিনাসৱো.

৬২৭. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা পিণ্ডোলভাৰদ্ৱাজো থেৰো ইমা গাথাযো অভাসিত্থাতি.

পিণ্ডোলভাৰদ্ৱাজত্থেৰস্সাপদানং অট্ঠমং.