৩-৯. খদিৰৱনিযৰেৱতত্থেৰঅপদানং

৬২৮. ‘‘গঙ্গা ভাগীৰথী নাম, হিমৱন্তা পভাৱিতা;

কুতিত্থে নাৱিকো আসিং, ওৰিমে চ তৰিং [ওৰিমং চ তৰে (স্যা.)] অহং.

৬২৯. ‘‘পদুমুত্তৰো নাযকো, সম্বুদ্ধো দ্ৱিপদুত্তমো;

ৱসী সতসহস্সেহি, গঙ্গাতীৰমুপাগতো [পুব্বে ময্হং সুতং আসি,§‘‘পদুমুত্তৰনাযকো; ৱসীসতসহস্সেহি, গঙ্গাসোতং তৰিস্সতি‘‘; (সী.)].

৬৩০. ‘‘বহূ নাৱা সমানেত্ৱা, ৱড্ঢকীহি [চম্মকেহি (ক.)] সুসঙ্খতং;

নাৱায [নাৱানং (ক.)] ছদনং কত্ৱা, পটিমানিং নৰাসভং.

৬৩১. ‘‘আগন্ত্ৱান চ সম্বুদ্ধো, আৰূহি তঞ্চ নাৱকং;

ৱাৰিমজ্ঝে ঠিতো সত্থা, ইমা গাথা অভাসথ.

৬৩২. ‘‘‘যো সো তাৰেসি সম্বুদ্ধং, সঙ্ঘঞ্চাপি অনাসৱং;

তেন চিত্তপ্পসাদেন, দেৱলোকে ৰমিস্সতি.

৬৩৩. ‘‘‘নিব্বত্তিস্সতি তে ব্যম্হং, সুকতং নাৱসণ্ঠিতং;

আকাসে পুপ্ফছদনং, ধাৰযিস্সতি সব্বদা.

৬৩৪. ‘‘‘অট্ঠপঞ্ঞাসকপ্পম্হি, তাৰকো [তাৰণো (স্যা.)] নাম খত্তিযো;

চাতুৰন্তো ৱিজিতাৱী, চক্কৱত্তী ভৱিস্সতি.

৬৩৫. ‘‘‘সত্তপঞ্ঞাসকপ্পম্হি, চম্মকো [চম্পকো (সী.), চম্বকো (স্যা.)] নাম খত্তিযো;

উগ্গচ্ছন্তোৱ সূৰিযো, জোতিস্সতি মহব্বলো.

৬৩৬. ‘‘‘কপ্পসতসহস্সম্হি, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

৬৩৭. ‘‘‘তিদসা সো চৱিত্ৱান, মনুস্সত্তং গমিস্সতি;

ৰেৱতো নাম নামেন, ব্ৰহ্মবন্ধু ভৱিস্সতি.

৬৩৮. ‘‘‘অগাৰা নিক্খমিত্ৱান, সুক্কমূলেন চোদিতো;

গোতমস্স ভগৱতো, সাসনে পব্বজিস্সতি.

৬৩৯. ‘‘‘সো পচ্ছা পব্বজিত্ৱান, যুত্তযোগো ৱিপস্সকো;

সব্বাসৱে পৰিঞ্ঞায, নিব্বাযিস্সতিনাসৱো’.

৬৪০. ‘‘ৱীৰিযং [ৱিৰিযং (সী. স্যা.)] মে ধুৰধোৰয্হং, যোগক্খেমাধিৱাহনং;

ধাৰেমি অন্তিমং দেহং, সম্মাসম্বুদ্ধসাসনে.

৬৪১. ‘‘সতসহস্সে কতং কম্মং, ফলং দস্সেসি মে ইধ;

সুমুত্তো সৰৱেগোৱ, কিলেসে ঝাপযী মম.

৬৪২. ‘‘ততো মং ৱননিৰতং, দিস্ৱা লোকন্তগূ মুনি;

ৱনৱাসিভিক্খূনগ্গং, পঞ্ঞপেসি মহামতি.

৬৪৩. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা খদিৰৱনিযো ৰেৱতো থেৰো ইমা গাথাযো অভাসিত্থাতি.

খদিৰৱনিযৰেৱতত্থেৰস্সাপদানং নৱমং.