দুতিযগাথাসঙ্গণিকং

চোদনাদিপুচ্ছাৱিস্সজ্জনাৱণ্ণনা

৩৫৯. দুতিযগাথাসঙ্গণিযং চোদনাতি ৱত্থুঞ্চ আপত্তিঞ্চ দস্সেত্ৱা চোদনা. সাৰণাতি দোসসাৰণা. সঙ্ঘো কিমত্থাযাতি সঙ্ঘসন্নিপাতো কিমত্থায. মতিকম্মং পন কিস্স কাৰণাতি মতিকম্মং ৱুচ্চতি মন্তগ্গহণং; তং কিস্স কাৰণাতি অত্থো.

চোদনা সাৰণত্থাযাতি ৱুত্তপ্পকাৰা চোদনা, তেন চুদিতকপুগ্গলেন চোদকদোসসাৰণত্থায. নিগ্গহত্থায সাৰণাতি দোসসাৰণা পন তস্স পুগ্গলস্স নিগ্গহত্থায. সঙ্ঘো পৰিগ্গহত্থাযাতি তত্থ সন্নিপতিতো সঙ্ঘো ৱিনিচ্ছযপৰিগ্গহণত্থায; ধম্মাধম্মং তুলনত্থায সুৱিনিচ্ছিতদুব্বিনিচ্ছিতং জাননত্থাযাতি অত্থো. মতিকম্মং পন পাটিযেক্কন্তি সুত্তন্তিকত্থেৰানঞ্চ ৱিনযধৰত্থেৰানঞ্চ মন্তগ্গহণং পাটেক্কং পাটেক্কং ৱিনিচ্ছযসন্নিট্ঠাপনত্থং.

মা খো পটিঘন্তি চুদিতকে ৱা চোদকে ৱা কোপং মা জনযি. সচে অনুৱিজ্জকো তুৱন্তি সচে ত্ৱং সঙ্ঘমজ্ঝে ওতিণ্ণং অধিকৰণং ৱিনিচ্ছিতুং নিসিন্নো ৱিনযধৰো.

ৱিগ্গাহিকন্তি ‘‘ন ত্ৱং ইমং ধম্মৱিনযং আজানাসী’’তিআদিনযপ্পৱত্তং. অনত্থসংহিতন্তি যা অনত্থং জনযতি, পৰিসং খোভেত্ৱা উট্ঠাপেতি, এৱৰূপিং কথং মা অভণি. সুত্তে ৱিনযে ৱাতিআদীসু সুত্তং নাম উভতোৱিভঙ্গো. ৱিনযো নাম খন্ধকো. অনুলোমো নাম পৰিৱাৰো. পঞ্ঞত্তং নাম সকলং ৱিনযপিটকং. অনুলোমিকং নাম চত্তাৰো মহাপদেসা.

অনুযোগৱত্তং নিসামযাতি অনুযুঞ্জনৱত্তং নিসামেহি. কুসলেন বুদ্ধিমতা কতন্তি ছেকেন পণ্ডিতেন ঞাণপাৰমিপ্পত্তেন ভগৱতা নীহৰিত্ৱা ঠপিতং. সুৱুত্তন্তি সুপঞ্ঞাপিতং. সিক্খাপদানুলোমিকন্তি সিক্খাপদানং অনুলোমং. অযং তাৱ পদত্থো, অযং পনেত্থ সাধিপ্পাযসঙ্খেপৱণ্ণনা – ‘‘সচে ত্ৱং অনুৱিজ্জকো, মা সহসা ভণি, মা অনত্থসংহিতং ৱিগ্গাহিককথং ভণি. যং পন কুসলেন বুদ্ধিমতা লোকনাথেন এতেসু সুত্তাদীসু অনুযোগৱত্তং কথং সুপঞ্ঞত্তং সব্বসিক্খাপদানং অনুলোমং, তং নিসাময তং উপধাৰেহী’’তি. গতিং ন নাসেন্তো সম্পৰাযিকন্তি অত্তনো সম্পৰাযে সুগতিনিব্বত্তিং অনাসেন্তো অনুযোগৱত্তং নিসাময. যো হি তং অনিসামেত্ৱা অনুযুঞ্জতি, সো সম্পৰাযিকং অত্তনো গতিং নাসেতি, তস্মা ত্ৱং অনাসেন্তো নিসামযাতি অত্থো. ইদানি তং অনুযোগৱত্তং দস্সেতুং হিতেসীতিআদিমাহ. তত্থ হিতেসীতি হিতং এসন্তো গৱেসন্তো; মেত্তঞ্চ মেত্তাপুব্বভাগঞ্চ উপট্ঠপেত্ৱাতি অত্থো. কালেনাতি যুত্তপত্তকালেন; অজ্ঝেসিতকালেযেৱ তৱ ভাৰে কতে অনুযুঞ্জাতি অত্থো.

সহসা ৱোহাৰং মা পধাৰেসীতি যো এতেসং সহসা ৱোহাৰো হোতি, সহসা ভাসিতং, তং মা পধাৰেসি, মা গণ্হিত্থ.

পটিঞ্ঞানুসন্ধিতেন কাৰযেতি এত্থ অনুসন্ধিতন্তি কথানুসন্ধি ৱুচ্চতি, তস্মা পটিঞ্ঞানুসন্ধিনা কাৰযে; কথানুসন্ধিং সল্লক্খেত্ৱা পটিঞ্ঞায কাৰযেতি অত্থো. অথ ৱা পটিঞ্ঞায চ অনুসন্ধিতেন চ কাৰযে, লজ্জিং পটিঞ্ঞায কাৰযে; অলজ্জিং ৱত্তানুসন্ধিনাতি অত্থো. তস্মা এৱ পটিঞ্ঞা লজ্জীসূতি গাথমাহ. তত্থ ৱত্তানুসন্ধিতেন কাৰযেতি ৱত্তানুসন্ধিনা কাৰযে, যা অস্স ৱত্তেন সদ্ধিং পটিঞ্ঞা সন্ধিযতি, তায পটিঞ্ঞায কাৰযেতি অত্থো.

সঞ্চিচ্চাতি জানন্তো আপজ্জতি. পৰিগূহতীতি নিগূহতি ন দেসেতি ন ৱুট্ঠাতি.

সা অহম্পি জানামীতি যং তুম্হেহি ৱুত্তং, তং সচ্চং, অহম্পি নং এৱমেৱ জানামি. অঞ্ঞঞ্চ তাহন্তি অঞ্ঞঞ্চ তং অহং পুচ্ছামি.

পুব্বাপৰং ন জানাতীতি পুৰেকথিতঞ্চ পচ্ছাকথিতঞ্চ ন জানাতি. অকোৱিদোতি তস্মিং পুব্বাপৰে অকুসলো. অনুসন্ধিৱচনপথং ন জানাতীতি কথানুসন্ধিৱচনং ৱিনিচ্ছযানুসন্ধিৱচনঞ্চ ন জানাতি.

সীলৱিপত্তিযা চোদেতীতি দ্ৱীহি আপত্তিক্খন্ধেহি চোদেতি. আচাৰদিট্ঠিযাতি আচাৰৱিপত্তিযা চেৱ দিট্ঠিৱিপত্তিযা চ. আচাৰৱিপত্তিযা চোদেন্তো পঞ্চহাপত্তিক্খন্ধেহি চোদেতি, দিট্ঠিৱিপত্তিযা চোদেন্তো মিচ্ছাদিট্ঠিযা চেৱ অন্তগ্গাহিকদিট্ঠিযা চ চোদেতি. আজীৱেনপি চোদেতীতি আজীৱহেতুপঞ্ঞত্তেহি ছহি সিক্খাপদেহি চোদেতি. সেসং সব্বত্থ উত্তানমেৱাতি.

দুতিযগাথাসঙ্গণিকৱণ্ণনা নিট্ঠিতা.