চোদনাকণ্ডং

অনুৱিজ্জককিচ্চৱণ্ণনা

৩৬০-৩৬১. ইদানি এৱং উপ্পন্নায চোদনায ৱিনযধৰেন কত্তব্বকিচ্চং দস্সেতুং অনুৱিজ্জকেনাতিআদি আৰদ্ধং. তত্থ দিট্ঠং দিট্ঠেনাতি গাথায অযমত্থো – একেনেকো মাতুগামেন সদ্ধিং একট্ঠানতো নিক্খমন্তো ৱা পৱিসন্তো ৱা দিট্ঠো, সো তং পাৰাজিকেন চোদেতি, ইতৰো তস্স দস্সনং অনুজানাতি. তং পন দস্সনং পটিচ্চ পাৰাজিকং ন উপেতি, ন পটিজানাতি. এৱমেত্থ যং তেন দিট্ঠং, তং তস্স ‘‘দিট্ঠো মযা’’তি ইমিনা দিট্ঠৱচনেন সমেতি. যস্মা পন ইতৰো তং দস্সনং পটিচ্চ দোসং ন পটিজানাতি, তস্মা অসুদ্ধপৰিসঙ্কিতো হোতি; অমূলকপৰিসঙ্কিতোতি অত্থো. তস্স পুগ্গলস্স ‘‘সুদ্ধো অহ’’ন্তি পটিঞ্ঞায তেন সদ্ধিং উপোসথো কাতব্বো. সেসগাথাদ্ৱযেপি এসেৱ নযো. সেসং সব্বত্থ উত্তানমেৱাতি.

অনুৱিজ্জককিচ্চৱণ্ণনা নিট্ঠিতা.

চোদকপুচ্ছাৱিস্সজ্জনাৱণ্ণনা

৩৬২-৩৬৩. চোদনায কো আদীতিআদিপুচ্ছানং ৱিস্সজ্জনে সচ্চে চ অকুপ্পে চাতি সচ্চে পতিট্ঠাতব্বং অকুপ্পে চ. যং কতং ৱা ন কতং ৱা, তদেৱ ৱত্তব্বং, ন চ চোদকে ৱা অনুৱিজ্জকে ৱা সঙ্ঘে ৱা কোপো উপ্পাদেতব্বো. ওতিণ্ণানোতিণ্ণং জানিতব্বন্তি ওতিণ্ণঞ্চ অনোতিণ্ণঞ্চ ৱচনং জানিতব্বং. তত্ৰাযং জাননৱিধি – এত্তকা চোদকস্স পুব্বকথা, এত্তকা পচ্ছিমকথা, এত্তকা চুদিতকস্স পুব্বকথা, এত্তকা পচ্ছিমকথাতি জানিতব্বা. চোদকস্স পমাণং গণ্হিতব্বং, চুদিতকস্স পমাণং গণ্হিতব্বং, অনুৱিজ্জকস্স পমাণং গণ্হিতব্বং, অনুৱিজ্জকো অপ্পমত্তকম্পি অহাপেন্তো ‘‘আৱুসো সমন্নাহৰিত্ৱা উজুং কত্ৱা আহৰা’’তি ৱত্তব্বো, সঙ্ঘেন এৱং পটিপজ্জিতব্বং. যেন ধম্মেন যেন ৱিনযেন যেন সত্থুসাসনেন তং অধিকৰণং ৱূপসম্মতীতি এত্থ ধম্মোতি ভূতং ৱত্থু. ৱিনযোতি চোদনা চেৱ সাৰণা চ. সত্থুসাসনন্তি ঞত্তিসম্পদা চেৱ অনুস্সাৱনসম্পদা চ. এতেন হি ধম্মেন চ ৱিনযেন চ সত্থুসাসনেন চ অধিকৰণং ৱূপসমতি, তস্মা অনুৱিজ্জকেন ভূতেন ৱত্থুনা চোদেত্ৱা আপত্তিং সাৰেত্ৱা ঞত্তিসম্পদায চেৱ অনুস্সাৱনসম্পদায চ তং অধিকৰণং ৱূপসমেতব্বং, অনুৱিজ্জকেন এৱং পটিপজ্জিতব্বং. সেসমেত্থ উত্তানমেৱ.

৩৬৪. উপোসথো কিমত্থাযাতিআদিপুচ্ছাৱিস্সজ্জনম্পি উত্তানমেৱ. অৱসানগাথাসু থেৰে চ পৰিভাসতীতি অৱমঞ্ঞং কৰোন্তো ‘‘কিং ইমে জানন্তী’’তি পৰিভাসতি. খতো উপহতিন্দ্ৰিযোতি তায ছন্দাদিগামিতায তেন চ পৰিভাসনেন অত্তনা অত্তনো খতত্তা খতো. সদ্ধাদীনঞ্চ ইন্দ্ৰিযানং উপহতত্তা উপহতিন্দ্ৰিযো. নিৰযং গচ্ছতি দুম্মেধো, ন চ সিক্খায গাৰৱোতি সো খতো উপহতিন্দ্ৰিযো পঞ্ঞায অভাৱতো দুম্মেধো তীসু সিক্খাসু অসিক্খনতো ন চ সিক্খায গাৰৱো কাযস্স ভেদা নিৰযমেৱ উপগচ্ছতি, তস্মা ন চ আমিসং নিস্সায…পে… যথা ধম্মো তথা কৰেতি. তস্সত্থো ন চ আমিসং নিস্সায কৰে, চুদিতকচোদকেসু হি অঞ্ঞতৰেন দিন্নং চীৱৰাদিআমিসং গণ্হন্তো আমিসং নিস্সায কৰোতি, এৱং ন কৰেয্য. ন চ নিস্সায পুগ্গলন্তি ‘‘অযং মে উপজ্ঝাযো ৱা আচৰিযো ৱা’’তিআদিনা নযেন ছন্দাদীহি গচ্ছন্তো পুগ্গলং নিস্সায কৰোতি, এৱং ন কৰেয্য. অথ খো উভোপেতে ৱিৱজ্জেত্ৱা যথা ধম্মো ঠিতো, তথেৱ কৰেয্যাতি.

উপকণ্ণকং জপ্পতীতি ‘‘এৱং কথেহি, মা এৱং কথযিত্থা’’তি কণ্ণমূলে মন্তেতি. জিম্হং পেক্খতীতি দোসমেৱ গৱেসতি. ৱীতিহৰতীতি ৱিনিচ্ছযং হাপেতি. কুম্মগ্গং পটিসেৱতীতি আপত্তিং দীপেতি.

অকালেন চ চোদেতীতি অনোকাসে অনজ্ঝিট্ঠোৱ চোদেতি. পুব্বাপৰং ন জানাতীতি পুৰিমকথঞ্চ পচ্ছিমকথঞ্চ ন জানাতি.

অনুসন্ধিৱচনপথং ন জানাতীতি কথানুসন্ধিৱিনিচ্ছযানুসন্ধিৱসেন ৱচনং ন জানাতি. সেসং সব্বত্থ উত্তানমেৱাতি.

চোদনাকণ্ডৱণ্ণনা নিট্ঠিতা.