উপোসথাদিপুচ্ছাৱিস্সজ্জনা

৩৩২. ‘‘উপোসথকম্মস্স কো আদী’’তিআদীনং পুচ্ছানং ৱিস্সজ্জনে সামগ্গী আদীতি ‘‘উপোসথং কৰিস্সামা’’তি সীমং সোধেত্ৱা ছন্দপাৰিসুদ্ধিং আহৰিত্ৱা সন্নিপতিতানং কাযসামগ্গী আদি. কিৰিযা মজ্ঝেতি পুব্বকিচ্চং কত্ৱা পাতিমোক্খওসাৰণকিৰিযা মজ্ঝে. নিট্ঠানং পৰিযোসানন্তি ‘‘তত্থ সব্বেহেৱ সমগ্গেহি সম্মোদমানেহি অৱিৱদমানেহি সিক্খিতব্ব’’ন্তি ইদং পাতিমোক্খনিট্ঠানং পৰিযোসানং. পৱাৰণাকম্মস্স সামগ্গী আদীতি ‘‘পৱাৰণং কৰিস্সামা’’তি সীমং সোধেত্ৱা ছন্দপৱাৰণং আহৰিত্ৱা সন্নিপতিতানং কাযসামগ্গী আদি. কিৰিযা মজ্ঝেতি পৱাৰণাঞত্তি চ পৱাৰণাকথা চ মজ্ঝে, সঙ্ঘনৱকস্স ‘‘পস্সন্তো পটিকৰিস্সামী’’তি ৱচনং পৰিযোসানং. তজ্জনীযকম্মাদীসু ৱত্থু নাম যেন ৱত্থুনা কম্মাৰহো হোতি, তং ৱত্থু. পুগ্গলোতি যেন তং ৱত্থু কতং, সো পুগ্গলো. কম্মৱাচা পৰিযোসানন্তি ‘‘কতং সঙ্ঘেন ইত্থন্নামস্স ভিক্খুনো তজ্জনীযকম্মং, খমতি সঙ্ঘস্স, তস্মা তুণ্হী, এৱমেতং ধাৰযামী’’তি এৱং তস্সা তস্সা কম্মৱাচায অৱসানৱচনং পৰিযোসানং. সেসং সব্বত্থ উত্তানমেৱাতি

উপোসথাদিপুচ্ছাৱিস্সজ্জনাৱণ্ণনা নিট্ঠিতা.

অত্থৱসপকৰণাৱণ্ণনা

৩৩৪. অত্থৱসপকৰণে – দস অত্থৱসেতিআদীসু যং ৱত্তব্বং তং পঠমপাৰাজিকৱণ্ণনাযমেৱ ৱুত্তং. যং সঙ্ঘসুট্ঠু তং সঙ্ঘফাসূতিআদীসু উপৰিমং উপৰিমং পদং হেট্ঠিমস্স হেট্ঠিমস্স পদস্স অত্থো.

অত্থসতং ধম্মসতন্তিআদিম্হি পন যদেতং দসসু পদেসু একেকং মূলং কত্ৱা দসক্খত্তুং যোজনায পদসতং ৱুত্তং. তত্থ পচ্ছিমস্স পচ্ছিমস্স পদস্স ৱসেন অত্থসতং পুৰিমস্স পুৰিমস্স ৱসেন ধম্মসতং ৱেদিতব্বং. অথ ৱা যে দস অত্থৱসে পটিচ্চ তথাগতেন সাৱকানং সিক্খাপদং পঞ্ঞত্তং, যে পুব্বে পঠমপাৰাজিকৱণ্ণনাযং ‘‘তত্থ সঙ্ঘসুট্ঠুতা নাম সঙ্ঘস্স সুট্ঠুভাৱো ‘সুট্ঠু দেৱা’তি আগতট্ঠানে ৱিয ‘সুট্ঠু ভন্তে’তি ৱচনসম্পটিচ্ছনভাৱো, যো চ তথাগতস্স ৱচনং সম্পটিচ্ছতি, তস্স তং দীঘৰত্তং হিতায সুখায হোতি, তস্মা সঙ্ঘস্স ‘সুট্ঠু ভন্তে’তি মম ৱচনসম্পটিচ্ছনত্থং পঞ্ঞপেস্সামি অসম্পটিচ্ছনে আদীনৱং সম্পটিচ্ছনে চ আনিসংসং দস্সেত্ৱা ন বলক্কাৰেন অভিভৱিত্ৱাতি এতমত্থং আৱিকৰোন্তো আহ – সঙ্ঘসুট্ঠুতাযা’’তি এৱমাদিনা নযেন ৱণ্ণিতা, তেসং ইধ দসক্খত্তুং আগতত্তা অত্থসতং তদত্থজোতকানঞ্চ পদানং ৱসেন ধম্মসতং ৱেদিতব্বং. ইদানি অত্থজোতকানং নিৰুত্তীনং ৱসেন নিৰুত্তিসতং, ধম্মভূতানং নিৰুত্তীনং ৱসেন নিৰুত্তিসতন্তি দ্ৱে নিৰুত্তিসতানি, অত্থসতে ঞাণসতং, ধম্মসতে ঞাণসতং, দ্ৱীসু নিৰুত্তিসতেসু দ্ৱে ঞাণসতানীতি চত্তাৰি ঞাণসতানি চ ৱেদিতব্বানি.

‘‘অত্থসতং ধম্মসতং, দ্ৱে নিৰুত্তিসতানি;

চত্তাৰি ঞাণসতানি, অত্থৱসে পকৰণে’’তি.

ইতি হি যং ৱুত্তং, ইদমেতং পটিচ্চ ৱুত্তন্তি.

ইতি সমন্তপাসাদিকায ৱিনযসংৱণ্ণনায

মহাৱগ্গৱণ্ণনা নিট্ঠিতা.