(৪) অৱন্দনীযপুগ্গলাদিৱণ্ণনা

৪৭৭. দস পুগ্গলা নাভিৱাদেতব্বাতি সেনাসনক্খন্ধকে ৱুত্তা দস জনা. অঞ্জলি সামীচেন চাতি সামীচিকম্মেন সদ্ধিং অঞ্জলি চ তেসং ন কাতব্বো, নেৱ পানীযাপুচ্ছনতালৱণ্টগ্গহণাদি খন্ধকৱত্তং তেসং দস্সেতব্বং, ন অঞ্জলি পগ্গণ্হিতব্বোতি অত্থো. দসন্নং দুক্কটন্তি তেসংযেৱ দসন্নং এৱং কৰোন্তস্স দুক্কটং হোতি. দস চীৱৰধাৰণাতি দস দিৱসানি অতিৰেকচীৱৰস্স ধাৰণা অনুঞ্ঞাতাতি অত্থো.

পঞ্চন্নং ৱস্সংৱুট্ঠানং, দাতব্বং ইধ চীৱৰন্তি পঞ্চন্নং সহধম্মিকানং সম্মুখাৱ দাতব্বং. সত্তন্নং সন্তেতি দিসাপক্কন্তউম্মত্তকখিত্তচিত্তৱেদনাট্টানং তিণ্ণঞ্চ উক্খিত্তকানন্তি ইমেসং সত্তন্নং সন্তে পতিৰূপে গাহকে পৰম্মুখাপি দাতব্বং. সোড়সন্নং ন দাতব্বন্তি সেসানং চীৱৰক্খন্ধকে ৱুত্তানং পণ্ডকাদীনং সোড়সন্নং ন দাতব্বং.

কতিসতং ৰত্তিসতং, আপত্তিযো ছাদযিত্ৱানাতি কতিসতং আপত্তিযো ৰত্তিসতং ছাদযিত্ৱান. দসসতং ৰত্তিসতং, আপত্তিযো ছাদযিত্ৱানাতি দসসতং আপত্তিযো ৰত্তিসতং ছাদযিত্ৱান. অযঞ্হেত্থ সঙ্খেপত্থো – যো দিৱসে সতং সতং সঙ্ঘাদিসেসাপত্তিযো আপজ্জিত্ৱা দস দস দিৱসে পটিচ্ছাদেতি, তেন ৰত্তিসতং আপত্তিসহস্সং পটিচ্ছাদিতং হোতি, সো সব্বাৱ তা আপত্তিযো দসাহপটিচ্ছন্নাতি পৰিৱাসং যাচিত্ৱা দস ৰত্তিযো ৱসিত্ৱান মুচ্চেয্য পাৰিৱাসিকোতি.

দ্ৱাদস কম্মদোসা ৱুত্তাতি অপলোকনকম্মং অধম্মেনৱগ্গং, অধম্মেনসমগ্গং, ধম্মেনৱগ্গং, তথা ঞত্তিকম্মঞত্তিদুতিযকম্মঞত্তিচতুত্থকম্মানিপীতি এৱং একেকস্মিং কম্মে তযো তযো কত্ৱা দ্ৱাদস কম্মদোসা ৱুত্তা.

চতস্সো কম্মসম্পত্তিযোতি অপলোকনকম্মং ধম্মেনসমগ্গং, তথা সেসানিপীতি এৱং চতস্সো কম্মসম্পত্তিযো ৱুত্তা.

ছ কম্মানীতি অধম্মেনৱগ্গকম্মং, অধম্মেনসমগ্গকম্মং, ধম্মপতিৰূপকেনৱগ্গকম্মং, ধম্মপতিৰূপকেনসমগ্গকম্মং, ধম্মেনৱগ্গকম্মং, ধম্মেনসমগ্গকম্মন্তি এৱং ছ কম্মানি ৱুত্তানি. একেত্থ ধম্মিকা কতাতি একং ধম্মেন সমগ্গকম্মমেৱেত্থ ধম্মিকং কতন্তি অত্থো. দুতিযগাথাৱিস্সজ্জনেপি এতদেৱ ধম্মিকং.

যং দেসিতাতি যানি দেসিতানি ৱুত্তানি পকাসিতানি. অনন্তজিনেনাতিআদীসু পৰিযন্তপৰিচ্ছেদভাৱৰহিতত্তা অনন্তং ৱুচ্চতি নিব্বানং, তং ভগৱতা ৰঞ্ঞা সপত্তগণং অভিমদ্দিত্ৱা ৰজ্জং ৱিয কিলেসগণং অভিমদ্দিত্ৱা জিতং ৱিজিতং অধিগতং সম্পত্তং, তস্মা ভগৱা ‘‘অনন্তজিনো’’তি ৱুচ্চতি. স্ৱেৱ ইট্ঠানিট্ঠেসু নিব্বিকাৰতায তাদি, ৱিক্খম্ভনতদঙ্গসমুচ্ছেদপটিপস্সদ্ধিনিস্সৰণৱিৱেকসঙ্খাতং ৱিৱেকপঞ্চকং অদ্দসাতি ৱিৱেকদস্সী; তেন অনন্তজিনেন তাদিনা ৱিৱেকদস্সিনা যানি আপত্তিক্খন্ধানি দেসিতানি ৱুত্তানি. একেত্থ সম্মতি ৱিনা সমথেহীতি অযমেত্থ পদসম্বন্ধো, যানি সত্থাৰা সত্ত আপত্তিক্খন্ধানি দেসিতানি, তত্থ একাপি আপত্তি ৱিনা সমথেহি ন সম্মতি, অথ খো ছ সমথা চত্তাৰি অধিকৰণানীতি সব্বেপিমে ধম্মা সম্মুখাৱিনযেন সম্মন্তি, সমাযোগং গচ্ছন্তি. এত্থ পন একো সম্মুখাৱিনযোৱ ৱিনা সমথেহি সম্মতি, সমথভাৱং গচ্ছতি. ন হি তস্স অঞ্ঞেন সমথেন ৱিনা অনিপ্ফত্তি নাম অত্থি. তেন ৱুত্তং – ‘‘একেত্থ সম্মতি ৱিনা সমথেহী’’তি. ইমিনা তাৱ অধিপ্পাযেন অট্ঠকথাসু অত্থো ৱুত্তো. মযং পন ‘‘ৱিনা’’তি নিপাতস্স পটিসেধনমত্তমত্থং গহেত্ৱা ‘‘একেত্থ সম্মতি ৱিনা সমথেহী’’তি এতেসু সত্তসু আপত্তিক্খন্ধেসু একো পাৰাজিকাপত্তিক্খন্ধো ৱিনা সমথেহি সম্মতীতি এতমত্থং ৰোচেয্যাম. ৱুত্তম্পি চেতং ‘‘যা সা আপত্তি অনৱসেসা, সা আপত্তি ন কতমেন অধিকৰণেন কতমম্হি ঠানে ন কতমেন সমথেন সম্মতী’’তি.

ছঊনদিযড্ঢসতাতি ‘‘ইধ, উপালি, ভিক্খু অধম্মং ধম্মোতি দীপেতি, তস্মিং অধম্মদিট্ঠি ভেদে অধম্মদিট্ঠি, তস্মিং অধম্মদিট্ঠি ভেদে ধম্মদিট্ঠি, তস্মিং অধম্মদিট্ঠি ভেদে ৱেমতিকো, তস্মিং ধম্মদিট্ঠি ভেদে অধম্মদিট্ঠি, তস্মিং ধম্মদিট্ঠি ভেদে ৱেমতিকো, তস্মিং ৱেমতিকো ভেদে অধম্মদিট্ঠি, তস্মিং ৱেমতিকো ভেদে ধম্মদিট্ঠি, তস্মিং ৱেমতিকো ভেদে ৱেমতিকো’’তি এৱং যানি অট্ঠাৰসন্নং ভেদকৰৱত্থূনং ৱসেন অট্ঠাৰস অট্ঠকানি সঙ্ঘভেদকক্খন্ধকে ৱুত্তানি, তেসং ৱসেন ছঊনদিযড্ঢসতং আপাযিকা ৱেদিতব্বা.

অট্ঠাৰস অনাপাযিকাতি ‘‘ইধ, উপালি, ভিক্খু অধম্মং ধম্মোতি দীপেতি, তস্মিং ধম্মদিট্ঠি ভেদে ধম্মদিট্ঠি অৱিনিধায দিট্ঠিং অৱিনিধায খন্তিং অৱিনিধায ৰুচিং অৱিনিধায ভাৱং অনুস্সাৱেতি, সলাকং গাহেতি ‘অযং ধম্মো, অযং ৱিনযো, ইদং সত্থুসাসনং, ইমং গণ্হথ, ইমং ৰোচেথা’তি, অযম্পি খো, উপালি, সঙ্ঘভেদকো ন আপাযিকো ন নেৰযিকো ন কপ্পট্ঠো ন অতেকিচ্ছো’’তি এৱং একেকস্মিং ৱত্থুস্মিং একেকং কত্ৱা সঙ্ঘভেদকক্খন্ধকাৱসানে ৱুত্তা অট্ঠাৰস জনা. অট্ঠাৰস অট্ঠকা ছঊনদিযড্ঢসতৱিস্সজ্জনে ৱুত্তাযেৱ.