আপত্তিসমুট্ঠানৱণ্ণনা

৪৭০. অচিত্তকো আপজ্জতীতিআদীসু সহসেয্যাদিপণ্ণত্তিৱজ্জং অসঞ্চিচ্চ আপজ্জন্তো অচিত্তকো আপজ্জতি, দেসেন্তো সচিত্তকো ৱুট্ঠাতি. যংকিঞ্চি সঞ্চিচ্চ আপজ্জন্তো সচিত্তকো আপজ্জতি, তিণৱত্থাৰকেন ৱুট্ঠহন্তো অচিত্তকো ৱুট্ঠাতি. পুব্বে ৱুত্তমেৱ তিণৱত্থাৰকেন ৱুট্ঠহন্তো অচিত্তকো আপজ্জতি, অচিত্তকো ৱুট্ঠাতি. ইতৰং দেসেন্তো সচিত্তকো আপজ্জতি, সচিত্তকো ৱুট্ঠাতি. ‘‘ধম্মদানং কৰোমী’’তি পদসোধম্মাদীনি কৰোন্তো কুসলচিত্তো আপজ্জতি, ‘‘বুদ্ধানং অনুসাসনিং কৰোমী’’তি উদগ্গচিত্তো দেসেন্তো কুসলচিত্তো ৱুট্ঠাতি. দোমনস্সিকো হুত্ৱা দেসেন্তো অকুসলচিত্তো ৱুট্ঠাতি, তিণৱত্থাৰকেন নিদ্দাগতোৱ ৱুট্ঠহন্তো অব্যাকতচিত্তো ৱুট্ঠাতি. ভিংসাপনাদীনি কত্ৱা ‘‘বুদ্ধানং সাসনং কৰোমী’’তি সোমনস্সিকো দেসেন্তো অকুসলচিত্তো আপজ্জতি, কুসলচিত্তো ৱুট্ঠাতি. দোমনস্সিকোৱ দেসেন্তো অকুসলচিত্তো ৱুট্ঠাতি, ৱুত্তনযেনেৱ তিণৱত্থাৰকেন ৱুট্ঠহন্তো অব্যাকতচিত্তো ৱুট্ঠাতি. নিদ্দোক্কন্তসমযে সহগাৰসেয্যং আপজ্জন্তো অব্যাকতচিত্তো আপজ্জতি, ৱুত্তনযেনেৱ পনেত্থ ‘‘কুসলচিত্তো ৱুট্ঠাতী’’তিআদি ৱেদিতব্বং.

পঠমং পাৰাজিকং কতিহি সমুট্ঠানেহীতিআদি পুব্বে ৱুত্তনযত্তা উত্তানমেৱ.

৪৭৩. চত্তাৰো পাৰাজিকা কতিহি সমুট্ঠানেহীতিআদীসু উক্কট্ঠপৰিচ্ছেদতো যং যং সমুট্ঠানং যস্স যস্স লব্ভতি, তং সব্বং ৱুত্তমেৱ হোতি.

আপত্তিসমুট্ঠানৱণ্ণনা নিট্ঠিতা.