১. পঠমসিক্খাপদৱণ্ণনা

১১৮১. ছত্তৱগ্গস্স পঠমসিক্খাপদে – সকিম্পি ধাৰেতি আপত্তি পাচিত্তিযস্সাতি মগ্গগমনে একপযোগেনেৱ দিৱসম্পি ধাৰেতি, একাৱ আপত্তি. সচে কদ্দমাদীনি পত্ৱা উপাহনা ওমুঞ্চিত্ৱা ছত্তমেৱ ধাৰেন্তী গচ্ছতি, দুক্কটং. অথাপি গচ্ছাদীনি দিস্ৱা ছত্তং অপনামেত্ৱা উপাহনাৰুড়্হাৱ গচ্ছতি, দুক্কটমেৱ. সচে ছত্তম্পি অপনামেত্ৱা উপাহনাপি ওমুঞ্চিত্ৱা পুন ধাৰেতি, পুন পাচিত্তিযং. এৱং পযোগগণনায আপত্তিযো ৱেদিতব্বা. সেসং উত্তানমেৱ. এড়কলোমসমুট্ঠানং – কিৰিযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, তিচিত্তং, তিৱেদনন্তি.

পঠমসিক্খাপদং.