৯. ছত্তুপাহনৱগ্গো

১. পঠমসিক্খাপদৱণ্ণনা

১১৮১. ছত্তৱগ্গস্স পঠমসিক্খাপদে – সকিম্পি ধাৰেতি আপত্তি পাচিত্তিযস্সাতি মগ্গগমনে একপযোগেনেৱ দিৱসম্পি ধাৰেতি, একাৱ আপত্তি. সচে কদ্দমাদীনি পত্ৱা উপাহনা ওমুঞ্চিত্ৱা ছত্তমেৱ ধাৰেন্তী গচ্ছতি, দুক্কটং. অথাপি গচ্ছাদীনি দিস্ৱা ছত্তং অপনামেত্ৱা উপাহনাৰুড়্হাৱ গচ্ছতি, দুক্কটমেৱ. সচে ছত্তম্পি অপনামেত্ৱা উপাহনাপি ওমুঞ্চিত্ৱা পুন ধাৰেতি, পুন পাচিত্তিযং. এৱং পযোগগণনায আপত্তিযো ৱেদিতব্বা. সেসং উত্তানমেৱ. এড়কলোমসমুট্ঠানং – কিৰিযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, তিচিত্তং, তিৱেদনন্তি.

পঠমসিক্খাপদং.

২. দুতিযসিক্খাপদৱণ্ণনা

১১৮৪. দুতিযে – যানেন যাযন্তীতি এত্থাপি ওৰোহিত্ৱা পুনপ্পুনং অভিৰুহন্তিযা পযোগগণনায আপত্তিযো ৱেদিতব্বা. সেসং পঠমে ৱুত্তনযমেৱাতি.

দুতিযসিক্খাপদং.

৩. ততিযসিক্খাপদৱণ্ণনা

১১৯০. ততিযে – ৱিপ্পকিৰিযিংসূতি মণযো ৱিপ্পকিণ্ণা. ইধাপি ওমুঞ্চিত্ৱা ধাৰেন্তিযা পযোগগণনায আপত্তিযো. সমুট্ঠানাদীনি ৱুত্তনযানেৱ. কেৱলং ইধ অকুসলচিত্তং হোতীতি.

ততিযসিক্খাপদং.

৪. চতুত্থসিক্খাপদৱণ্ণনা

১১৯৪. চতুত্থে – সীসূপগাদীসু যং যং ধাৰেতি, তস্স তস্স ৱসেন ৱত্থুগণনায আপত্তিযো ৱেদিতব্বা. সেসং ততিযে ৱুত্তনযমেৱাতি.

চতুত্থসিক্খাপদং.

৫. পঞ্চমসিক্খাপদৱণ্ণনা

১১৯৯. পঞ্চমে – গন্ধৱণ্ণকেনাতি গন্ধেন চ ৱণ্ণকেন চ. সেসং উত্তানমেৱ. সমুট্ঠানাদীনি ততিযসদিসানেৱাতি.

পঞ্চমসিক্খাপদং.

৬. ছট্ঠসিক্খাপদৱণ্ণনা

১২০২. ছট্ঠে – সব্বং পঞ্চমে ৱুত্তসদিসমেৱাতি.

ছট্ঠসিক্খাপদং.

৭. সত্তমসিক্খাপদৱণ্ণনা

১২০৮-৯. সত্তমে – উম্মদ্দাপেতি আপত্তি পাচিত্তিযস্সাতি এত্থ হত্থং অমোচেত্ৱা উম্মদ্দনে একাৱ আপত্তি, মোচেত্ৱা মোচেত্ৱা উম্মদ্দনে পযোগগণনায আপত্তিযো. সম্বাহনেপি এসেৱ নযো. গিলানাযাতি অন্তমসো মগ্গগমনপৰিস্সমেনাপি সাবাধায. আপদাসূতি চোৰভযাদীহি সৰীৰকম্পনাদীসু. সেসং উত্তানমেৱ. সমুট্ঠানাদীনি ততিযসদিসানেৱাতি.

সত্তমসিক্খাপদং.

৮-৯-১০. অট্ঠমনৱমদসমসিক্খাপদৱণ্ণনা

১২১০. অট্ঠমাদীসু তীসু সিক্খমানায সামণেৰিযা, গিহিনিযাতি ইদমেৱ নানাকৰণং, সেসং সত্তমে ৱুত্তসদিসমেৱাতি.

অট্ঠমনৱমদসমসিক্খাপদানি.

১১. একাদসমসিক্খাপদৱণ্ণনা

১২১৪. একাদসমে – ভিক্খুস্স পুৰতোতি অভিমুখমেৱাতি অত্থো. ইদং পন উপচাৰং সন্ধায কথিতন্তি ৱেদিতব্বং. সেসং উত্তানমেৱ. কথিনসমুট্ঠানং – কাযৱাচতো কাযৱাচাচিত্ততো চ সমুট্ঠাতি, কিৰিযাকিৰিযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, ৱচীকম্মং, তিচিত্তং, তিৱেদনন্তি.

একাদসমসিক্খাপদং.

১২. দ্ৱাদসমসিক্খাপদৱণ্ণনা

১২১৯-২৩. দ্ৱাদসমে – অনোকাসকতন্তি অসুকস্মিং নাম ঠানে পুচ্ছামীতি এৱং অকতওকাসং. তেনেৱাহ – ‘‘অনোকাসকতন্তি অনাপুচ্ছা’’তি. অনোদিস্সাতি অসুকস্মিং নাম ঠানে পুচ্ছামীতি এৱং অনিযমেত্ৱা কেৱলং ‘‘পুচ্ছিতব্বং অত্থি, পুচ্ছামি অয্যা’’তি এৱং ৱত্ৱা. সেসং উত্তানমেৱ. পদসোধম্মসমুট্ঠানং – ৱাচতো ৱাচাচিত্ততো চ সমুট্ঠাতি, কিৰিযাকিৰিযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, ৱচীকম্মং, তিচিত্তং, তিৱেদনন্তি.

দ্ৱাদসমসিক্খাপদং.

১৩. তেৰসমসিক্খাপদৱণ্ণনা

১২২৬. তেৰসমে – পৰিক্খেপং অতিক্কামেন্তিযাতি একেন পাদেন অতিক্কন্তে দুক্কটং, দুতিযেন পাচিত্তিযং. উপচাৰেপি এসেৱ নযো.

১২২৭. অচ্ছিন্নচীৱৰিকাযাতিআদীসু সঙ্কচ্চিকচীৱৰমেৱ চীৱৰন্তি ৱেদিতব্বং. আপদাসূতি মহগ্ঘং হোতি সঙ্কচ্চিকং, পাৰুপিত্ৱা গচ্ছন্তিযাৱ উপদ্দৱো উপ্পজ্জতি, এৱৰূপাসু আপদাসু অনাপত্তি. সেসং উত্তানমেৱ. এড়কলোমসমুট্ঠানং – কিৰিযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, তিচিত্তং, তিৱেদনন্তি.

তেৰসমসিক্খাপদং.

ছত্তুপাহনৱগ্গো নৱমো.

উদ্দিট্ঠা খো অয্যাযো ছসট্ঠিসতং পাচিত্তিযা ধম্মাতি এত্থ সব্বানেৱ ভিক্খুনীনং খুদ্দকেসু ছন্নৱুতি, ভিক্খূনং দ্ৱেনৱুতীতি অট্ঠাসীতিসতং সিক্খাপদানি, ততো সকলং ভিক্খুনীৱগ্গং, পৰম্পৰভোজনং, অনতিৰিত্তভোজনং, অনতিৰিত্তেন অভিহট্ঠুং পৱাৰণং, পণীতভোজনৱিঞ্ঞত্তি, অচেলকসিক্খাপদং, দুট্ঠুল্লপটিচ্ছাদনং, ঊনৱীসতিৱস্সুপসম্পাদনং, মাতুগামেন সদ্ধিং সংৱিধায অদ্ধানগমনং, ৰাজন্তেপুৰপ্পৱেসনং, সন্তং ভিক্খুং অনাপুচ্ছা ৱিকালে গামপ্পৱেসনং, নিসীদনং ৱস্সিকসাটিকন্তি ইমানি দ্ৱাৱীসতি সিক্খাপদানি অপনেত্ৱা সেসানি সতঞ্চ ছসট্ঠি চ সিক্খাপদানি পাতিমোক্খুদ্দেসমগ্গেন উদ্দিট্ঠানি হোন্তীতি ৱেদিতব্বানি. তেনাহ – ‘‘উদ্দিট্ঠা খো অয্যাযো ছসট্ঠিসতং পাচিত্তিযা ধম্মা…পে… এৱমেতং ধাৰযামী’’তি.

তত্ৰাযং সঙ্খেপতো সমুট্ঠানৱিনিচ্ছযো – গিৰগ্গসমজ্জং, চিত্তাগাৰসিক্খাপদং, সঙ্ঘাণি, ইত্থালঙ্কাৰো, গন্ধৱণ্ণকো, ৱাসিতকপিঞ্ঞাকো, ভিক্খুনীআদীহি উম্মদ্দনপৰিমদ্দনানীতি ইমানি দস সিক্খাপদানি অচিত্তকানি লোকৱজ্জানি. অযং পনেত্থ অধিপ্পাযো – ৱিনাপি চিত্তেন আপজ্জিতব্বত্তা অচিত্তকানি, চিত্তে পন সতি অকুসলেনেৱ আপজ্জিতব্বত্তা লোকৱজ্জানি. অৱসেসানি অচিত্তকানি, পণ্ণত্তিৱজ্জানেৱ. চোৰীৱুট্ঠাপনং, গামন্তৰং, আৰামসিক্খাপদং গব্ভিনিৱগ্গে আদিতো পট্ঠায সত্ত, কুমাৰিভূতৱগ্গে আদিতো পট্ঠায পঞ্চ, পুৰিসসংসট্ঠং পাৰিৱাসিযছন্দদানং, অনুৱস্সৱুট্ঠাপনং, একন্তৰিকৱুট্ঠাপনন্তি ইমানি একূনৱীসতি সিক্খাপদানি সচিত্তকানি পণ্ণত্তিৱজ্জানি, অৱসেসানি সচিত্তকানি লোকৱজ্জানেৱাতি.

সমন্তপাসাদিকায ৱিনযসংৱণ্ণনায ভিক্খুনীৱিভঙ্গে

খুদ্দকৱণ্ণনা নিট্ঠিতা.

পাচিত্তিযকণ্ডং নিট্ঠিতং.