৮. কুমাৰিভূতৱগ্গো

১-২-৩. পঠমদুতিযততিযসিক্খাপদৱণ্ণনা

১১১৯. কুমাৰিভূতৱগ্গস্স পঠমদুতিযততিযসিক্খাপদানি তীণি তীহি গিহিগতসিক্খাপদেহি সদিসানি. যা পন তা সব্বপঠমা দ্ৱে মহাসিক্খমানা, তা অতিক্কন্তৱীসতিৱস্সাতি ৱেদিতব্বা. তা গিহিগতা ৱা হোন্তু অগিহিগতা ৱা, সিক্খমানা ইচ্চেৱ ৱত্তব্বা, গিহিগতাতি ৱা কুমাৰিভূতাতি ৱা ন ৱত্তব্বা. গিহিগতায দসৱস্সকালে সিক্খাসম্মুতিং দত্ৱা দ্ৱাদসৱস্সকালে উপসম্পদা কাতব্বা. একাদসৱস্সকালে দত্ৱা তেৰসৱস্সকালে কাতব্বা, দ্ৱাদসতেৰসচুদ্দসপন্নৰসসোড়সসত্তৰসঅট্ঠাৰসৱস্সকালে সম্মুতিং দত্ৱা ৱীসতিৱস্সকালে উপসম্পদা কাতব্বা. অট্ঠাৰসৱস্সকালতো পট্ঠায চ পনাযং গিহিগতাতিপি কুমাৰিভূতাতিপি ৱত্তুং ৱট্টতি, কুমাৰিভূতা পন গিহিগতাতি ন ৱত্তব্বা, কুমাৰিভূতা ইচ্চেৱ ৱত্তব্বা. মহাসিক্খমানা পন গিহিগতাতিপি ৱত্তুং ন ৱট্টতি, কুমাৰিভূতাতিপি ৱত্তুং ন ৱট্টতি, সিক্খাসম্মুতিদানৱসেন পন তিস্সোপি সিক্খমানাতি ৱত্তুং ৱট্টতি.

পঠমদুতিযততিযানি.

৪-৫-৬. চতুত্থপঞ্চমছট্ঠসিক্খাপদৱণ্ণনা

১১৩৬. চতুত্থপঞ্চমছট্ঠেসু সব্বং উত্তানমেৱ. সব্বানি তিসমুট্ঠানানি চতুত্থং কিৰিযং, সঞ্ঞাৱিমোক্খং, সচিত্তকং, পণ্ণত্তিৱজ্জং, কাযকম্মং, ৱচীকম্মং, তিচিত্তং, তিৱেদনন্তি. পঞ্চমং কিৰিযাকিৰিযং, সঞ্ঞাৱিমোক্খং, সচিত্তকং, পণ্ণত্তিৱজ্জং, কাযকম্মং, ৱচীকম্মং, তিচিত্তং, তিৱেদনন্তি. যঞ্চেত্থ সঙ্ঘেন পৰিচ্ছিন্দিতব্বাতি ৱুত্তং, তস্স উপপৰিক্খিতব্বাতি অত্থো. ছট্ঠং কিৰিযং, সঞ্ঞাৱিমোক্খং, সচিত্তকং, লোকৱজ্জং, কাযকম্মং, ৱচীকম্মং, অকুসলচিত্তং দুক্খৱেদনন্তি. যং পনেত্থ ‘‘পৰিচ্ছিন্দিত্ৱা’’তি ৱুত্তং, তস্স উপপৰিক্খিত্ৱাতি অত্থো.

চতুত্থপঞ্চমছট্ঠসিক্খাপদানি

৭. সত্তমসিক্খাপদৱণ্ণনা

১১৫০. সত্তমে – সব্বং উত্তানমেৱ. ধুৰনিক্খেপসমুট্ঠানং – কিৰিযং, সঞ্ঞাৱিমোক্খং, সচিত্তকং, লোকৱজ্জং, কাযকম্মং, ৱচীকম্মং, অকুসলচিত্তং, দুক্খৱেদনন্তি.

সত্তমসিক্খাপদং.

৮. অট্ঠমসিক্খাপদৱণ্ণনা

১১৫৪. অট্ঠমেপি – সব্বং উত্তানমেৱ. সমুট্ঠানাদীনিপি অনন্তৰসদিসানেৱাতি.

অট্ঠমসিক্খাপদং.

৯. নৱমসিক্খাপদৱণ্ণনা

১১৫৮. নৱমে – সোকাৱাসন্তি সঙ্কেতং কত্ৱা অগচ্ছমানা পুৰিসানং অন্তো সোকং পৱেসেতীতি সোকাৱাসা, তং সোকাৱাসং. তেনেৱাহ – ‘‘সোকাৱাসা নাম পৰেসং দুক্খং উপ্পাদেতী’’তি. অথ ৱা ঘৰং ৱিয ঘৰসামিকা, অযম্পি পুৰিসসমাগমং অলভমানা সোকং আৱিসতি. ইতি যং আৱিসতি, স্ৱাস্সা আৱাসো হোতীতি সোকাৱাসা. তেনাহ – ‘‘সোকং আৱিসতী’’তি. অজানন্তীতি এদিসা অযন্তি অজানমানা. সেসং উত্তানমেৱ. তিসমুট্ঠানং – কিৰিযং, সঞ্ঞাৱিমোক্খং, সচিত্তকং, পণ্ণত্তিৱজ্জং, কাযকম্মং, ৱচীকম্মং, তিচিত্তং, তিৱেদনন্তি.

নৱমসিক্খাপদং.

১০. দসমসিক্খাপদৱণ্ণনা

১১৬৪. দসমে – অনাপুচ্ছাতি অনাপুচ্ছিত্ৱা. ভিক্খুনীহি দ্ৱিক্খত্তুং আপুচ্ছিতব্বং – পব্বজ্জাকালে চ উপসম্পদাকালে চ, ভিক্খূনং পন সকিং আপুচ্ছিতেপি ৱট্টতি.

১১৬৫. অজানন্তীতি মাতাদীনং অত্থিভাৱং অজানন্তী. সেসং উত্তানমেৱ. ইদং অপুব্বসমুট্ঠানসীসং. চতুসমুট্ঠানং – ৱাচতো কাযৱাচতো ৱাচাচিত্ততো কাযৱাচাচিত্ততো চ সমুট্ঠাতি. কথং? অব্ভানকম্মাদীসু কেনচিদেৱ কৰণীযেন খণ্ডসীমাযং নিসিন্না ‘‘পক্কোসথ সিক্খমানং, ইধেৱ নং উপসম্পাদেস্সামা’’তি উপসম্পাদেতি; এৱং ৱাচতো সমুট্ঠাতি. উপস্সযতো পট্ঠায উপসম্পাদেস্সামীতি ৱত্ৱা খণ্ডসীমং গচ্ছন্তিযা কাযৱাচতো সমুট্ঠাতি. দ্ৱীসুপি ঠানেসু পণ্ণত্তিভাৱং জানিত্ৱাৱ ৱীতিক্কমং কৰোন্তিযা ৱাচাচিত্ততো কাযৱাচাচিত্ততো চ সমুট্ঠাতি. অননুজানাপেত্ৱা উপসম্পাদনতো কিৰিযাকিৰিযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, ৱচীকম্মং, তিচিত্তং, তিৱেদনন্তি.

দসমসিক্খাপদং.

১১. একাদসমসিক্খাপদৱণ্ণনা

১১৬৭-৮. একাদসমে – পাৰিৱাসিকছন্দদানেনাতি পাৰিৱাসিযেন ছন্দদানেন. তত্থ চতুব্বিধং পাৰিৱাসিযং – পৰিসপাৰিৱাসিযং, ৰত্তিপাৰিৱাসিযং, ছন্দপাৰিৱাসিযং, অজ্ঝাসযপাৰিৱাসিযন্তি. তত্থ পৰিসপাৰিৱাসিযং নাম ভিক্খূ কেনচিদেৱ কৰণীযেন সন্নিপতিতা হোন্তি, অথ মেঘো ৱা উট্ঠাতি, উস্সাৰণা ৱা কৰিযতি, মনুস্সা ৱা অজ্ঝোত্থৰন্তা আগচ্ছন্তি, ভিক্খূ ‘‘অনোকাসা মযং অঞ্ঞত্ৰ গচ্ছামা’’তি ছন্দং অৱিস্সজ্জেত্ৱাৱ উট্ঠহন্তি. ইদং পৰিসপাৰিৱাসিযং. কিঞ্চাপি পৰিসপাৰিৱাসিযং, ছন্দস্স পন অৱিস্সট্ঠত্তা কম্মং কাতুং ৱট্টতি.

পুন ভিক্খূ ‘‘উপোসথাদীনি কৰিস্সামা’’তি ৰত্তিং সন্নিপতিত্ৱা ‘‘যাৱ সব্বে সন্নিপতন্তি, তাৱ ধম্মং সুণিস্সামা’’তি একং অজ্ঝেসন্তি, তস্মিং ধম্মকথং কথেন্তেযেৱ অৰুণো উগ্গচ্ছতি. সচে ‘‘চাতুদ্দসিকং উপোসথং কৰিস্সামা’’তি নিসিন্না ‘‘পন্নৰসো’’তি কাতুং ৱট্টতি. সচে পন্নৰসিকং কাতুং নিসিন্না পাটিপদে অনুপোসথে উপোসথং কাতুং ন ৱট্টতি, অঞ্ঞং পন সঙ্ঘকিচ্চং কাতুং ৱট্টতি. ইদং ৰত্তিপাৰিৱাসিযং নাম.

পুন ভিক্খূ ‘‘কিঞ্চিদেৱ অব্ভানাদিসঙ্ঘকম্মং কৰিস্সামা’’তি নিসিন্না হোন্তি, তত্ৰেকো নক্খত্তপাঠকো ভিক্খু এৱং ৱদতি – ‘‘অজ্জ নক্খত্তং দাৰুণং, মা ইমং কম্মং কৰোথা’’তি. তে তস্স ৱচনেন ছন্দং ৱিস্সজ্জেত্ৱা তত্থেৱ নিসিন্না হোন্তি. অথঞ্ঞো আগন্ত্ৱা ‘‘নক্খত্তং পটিমানেন্তং অত্থো বালং উপচ্চগা’’তি (জা. ১.১.৪৯) ৱত্ৱা ‘‘কিং নক্খত্তেন কৰোথা’’তি ৱদতি. ইদং ছন্দপাৰিৱাসিযঞ্চেৱ অজ্ঝাসযপাৰিৱাসিযঞ্চ. এতস্মিং পাৰিৱাসিযে পুন ছন্দপাৰিসুদ্ধিং অনানেত্ৱা কম্মং কাতুং ন ৱট্টতি.

ৱুট্ঠিতায পৰিসাযাতি ছন্দং ৱিস্সজ্জেত্ৱা কাযেন ৱা ৱাচায ৱা ছন্দৱিস্সজ্জনমত্তেনেৱ ৱা উট্ঠিতায পৰিসায.

১১৬৯. অনাপত্তি অৱুট্ঠিতায পৰিসাযাতি ছন্দং অৱিস্সজ্জেত্ৱা অৱুট্ঠিতায অনাপত্তি. সেসং উত্তানমেৱ. তিসমুট্ঠানং – কিৰিযং, সঞ্ঞাৱিমোক্খং, সচিত্তকং, পণ্ণত্তিৱজ্জং, কাযকম্মং, ৱচীকম্মং, তিচিত্তং, তিৱেদনন্তি.

একাদসমসিক্খাপদং.

১২. দ্ৱাদসমসিক্খাপদৱণ্ণনা

১১৭০. দ্ৱাদসমে – উপস্সযো ন সম্মতীতি ৱসনোকাসো নপ্পহোতি. সেসং উত্তানমেৱ. সমুট্ঠানাদীনি অনন্তৰসদিসানেৱাতি.

দ্ৱাদসমসিক্খাপদং.

১৩. তেৰসমসিক্খাপদৱণ্ণনা

১১৭৫. তেৰসমে – একং ৱস্সং দ্ৱেতি একন্তৰিকে একস্মিং সংৱচ্ছৰে দ্ৱে ৱুট্ঠাপেতি. সেসং উত্তানমেৱ. সমুট্ঠানাদীনিপি ৱুত্তসদিসানেৱাতি.

তেৰসমসিক্খাপদং.

কুমাৰিভূতৱগ্গো অট্ঠমো.