১০. দসমসিক্খাপদৱণ্ণনা

৮৩৫. দসমে – যংকিঞ্চি নচ্চন্তি নটাদযো ৱা নচ্চন্তু সোণ্ডা ৱা, অন্তমসো মোৰসুৱমক্কটাদযোপি, সব্বম্পেতং নচ্চমেৱ. যংকিঞ্চি গীতন্তি যংকিঞ্চি নটাদীনং ৱা গীতং হোতু, অৰিযানং পৰিনিব্বানকালে ৰতনত্তযগুণূপসংহিতং সাধুকীড়িতগীতং ৱা অসংযতভিক্খূনং ধম্মভাণকগীতং ৱা, সব্বম্পেতং গীতমেৱ. যংকিঞ্চি ৱাদিতন্তি তন্তিবদ্ধাদিৱাদনীযভণ্ডৱাদিতং ৱা হোতু, কুটভেৰিৱাদিতং ৱা, অন্তমসো উদকভেৰিৱাদিতম্পি, সব্বম্পেতং ৱাদিতমেৱ.

৮৩৬. দস্সনায গচ্ছতি আপত্তি দুক্কটস্সাতি পদৱাৰগণনায আপত্তি দুক্কটস্স. যত্থ ঠিতা পস্সতি ৱা সুণাতি ৱাতি একপযোগেন ওলোকেন্তী পস্সতি, তেসংযেৱ গীতৱাদিতং সুণাতি, একমেৱ পাচিত্তিযং. সচে পন একং দিসং ওলোকেত্ৱা নচ্চং পস্সতি, পুন অঞ্ঞতো ওলোকেত্ৱা গাযন্তে পস্সতি অঞ্ঞতো ৱাদেন্তে, পাটেক্কা আপত্তিযো. ভিক্খুনী সযম্পি নচ্চিতুং ৱা গাযিতুং ৱা ৱাদিতুং ৱা ন লভতি, অঞ্ঞে ‘‘নচ্চ, গায, ৱাদেহী’’তি ৱত্তুম্পি ন লভতি. ‘‘চেতিযস্স উপহাৰং দেথ, উপাসকা’’তি ৱত্তুম্পি ‘‘তুম্হাকং চেতিযস্স উপট্ঠানং কৰোমা’’তি ৱুত্তে ‘‘সাধূ’’তি সম্পটিচ্ছিতুম্পি ন লভতি. সব্বত্থ পাচিত্তিযন্তি সব্বঅট্ঠকথাসু ৱুত্তং. ভিক্খুনো দুক্কটং. ‘‘তুম্হাকং চেতিযস্স উপট্ঠানং কৰোমা’’তি ৱুত্তে পন ‘‘উপট্ঠানকৰণং নাম সুন্দৰ’’ন্তি ৱত্তুং ৱট্টতি.

৮৩৭. আৰামে ঠিতাতি আৰামে ঠত্ৱা অন্তৰাৰামে ৱা বহিআৰামে ৱা নচ্চাদীনি পস্সতি ৱা সুণাতি ৱা, অনাপত্তি. সতি কৰণীযেতি সলাকভত্তাদীনং ৱা অত্থায অঞ্ঞেন ৱা কেনচি কৰণীযেন গন্ত্ৱা গতট্ঠানে পস্সতি ৱা সুণাতি ৱা, অনাপত্তি. আপদাসূতি তাদিসেন উপদ্দৱেন উপদ্দুতা সমজ্জট্ঠানং পৱিসতি, এৱং পৱিসিত্ৱা পস্সন্তিযা ৱা সুণন্তিযা ৱা অনাপত্তি. সেসং উত্তানমেৱ.

এড়কলোমসমুট্ঠানং – কিৰিযং, নোসঞ্ঞাৱিমোক্খং, অচিত্তকং, লোকৱজ্জং, কাযকম্মং, অকুসলচিত্তং, তিৱেদনন্তি.

দসমসিক্খাপদং.

লসুণৱগ্গো পঠমো.