৬. সুৰুসুৰুৱগ্গৱণ্ণনা

৬২৭. সুৰুসুৰুকাৰকন্তি সুৰুসুৰূতি এৱং সদ্দং কত্ৱা কত্ৱা. দৱোতি পৰিহাসৱচনং; তং যেন কেনচি পৰিযাযেন ‘‘কিং বুদ্ধো, সিলকবুদ্ধো, পটিবুদ্ধো; কিং ধম্মো, গোধম্মো, অজধম্মো; কিং সঙ্ঘো, মিগসঙ্ঘো, পসুসঙ্ঘো’’তিআদিনা নযেন তীণি ৰতনানি আৰব্ভ ন কাতব্বন্তি অত্থো.

৬২৮. হত্থনিল্লেহকন্তি হত্থং নিল্লেহিত্ৱা নিল্লেহিত্ৱা. ভুঞ্জন্তেন হি অঙ্গুলিমত্তম্পি নিল্লেহিতুং ন ৱট্টতি. ঘনযাগুফাণিতপাযাসাদিকে পন অঙ্গুলীহি গহেত্ৱা অঙ্গুলিযো মুখে পৱেসেত্ৱা ভুঞ্জিতুং ৱট্টতি. পত্তনিল্লেহকওট্ঠনিল্লেহকেসুপি এসেৱ নযো. তস্মা একঙ্গুলিযাপি পত্তো ন নিল্লেহিতব্বো, একওট্ঠোপি জিৱ্হায ন নিল্লেহিতব্বো, ওট্ঠমংসেহি এৱ পন গহেত্ৱা অন্তো পৱেসেতুং ৱট্টতি.

৬৩১. কোকনদেতি এৱংনামকে. কোকনদন্তি পদুমং ৱুচ্চতি, সো চ পাসাদো পদুমসণ্ঠানো, তেনস্স কোকনদোত্ৱেৱ নামং অকংসু. ন সামিসেন হত্থেন পানীযথালকন্তি এতং পটিক্কূলৱসেন পটিক্খিত্তং, তস্মা সঙ্ঘিকম্পি পুগ্গলিকম্পি গিহিসন্তকম্পি অত্তনো সন্তকম্পি সঙ্খম্পি সৰাৱম্পি থালকম্পি ন গহেতব্বমেৱ, গণ্হন্তস্স দুক্কটং. সচে পন হত্থস্স একদেসো আমিসমক্খিতো ন হোতি, তেন পদেসেন গহেতুং ৱট্টতি.

৬৩২. উদ্ধৰিত্ৱা ৱাতি সিত্থানি উদকতো উদ্ধৰিত্ৱা একস্মিং ঠানে ৰাসিং কত্ৱা উদকং ছড্ডেতি. ভিন্দিত্ৱা ৱাতি সিত্থানি ভিন্দিত্ৱা উদকগতিকানি কত্ৱা ছড্ডেতি. পটিগ্গহে ৱাতি পটিগ্গহেন পটিচ্ছন্তো নং পটিগ্গহে ছড্ডেতি. নীহৰিত্ৱাতি বহি নীহৰিত্ৱা ছড্ডেতি; এৱং ছড্ডেন্তস্স অনাপত্তি.

৬৩৪. সেতচ্ছত্তন্তি ৱত্থপলিগুণ্ঠিতং পণ্ডৰচ্ছত্তং. কিলঞ্জচ্ছত্তন্তি ৱিলীৱচ্ছত্তং. পণ্ণচ্ছত্তন্তি তালপণ্ণাদীহি যেহি কেহিচি কতং. মণ্ডলবদ্ধং সলাকবদ্ধন্তি ইদং পন তিণ্ণম্পি ছত্তানং পঞ্জৰদস্সনত্থং ৱুত্তং. তানি হি মণ্ডলবদ্ধানি চেৱ হোন্তি সলাকবদ্ধানি চ. যম্পি তত্থজাতকদণ্ডকেন কতং একপণ্ণচ্ছত্তং হোতি, তম্পি ছত্তমেৱ. এতেসু যংকিঞ্চি ছত্তং পাণিম্হি অস্সাতি ছত্তপাণি. সো তং ছত্তং ধাৰযমানো ৱা অংসে ৱা কত্ৱা ঊৰুম্হি ৱা ঠপেত্ৱা যাৱ হত্থেন ন মুচ্চতি, তাৱস্স ধম্মং দেসেতুং ন ৱট্টতি, দেসেন্তস্স ৱুত্তনযেন দুক্কটং. সচে পনস্স অঞ্ঞো ছত্তং ধাৰেতি, ছত্তপাদুকায ৱা ঠিতং হোতি, হত্থতো অপগতমত্তে ছত্তপাণি নাম ন হোতি. তস্স ধম্মং দেসেতুং ৱট্টতি. ধম্মপৰিচ্ছেদো পনেত্থ পদসোধম্মে ৱুত্তনযেনেৱ ৱেদিতব্বো.

৬৩৫. দণ্ডপাণিস্সাতি এত্থ দণ্ডো নাম মজ্ঝিমস্স পুৰিসস্স চতুহত্থপ্পমাণো দণ্ডপাণিভাৱো পনস্স ছত্তপাণিম্হি ৱুত্তনযেনেৱ ৱেদিতব্বো.

৬৩৬. সত্থপাণিম্হিপি এসেৱ নযো. অসিং সন্নহিত্ৱা ঠিতোপি হি সত্থপাণিসঙ্খ্যং ন গচ্ছতি.

৬৩৭. আৱুধপাণিস্সাতি এত্থ কিঞ্চাপি ৱুত্তং – ‘‘আৱুধং নাম চাপো কোদণ্ডো’’তি, অথ খো সব্বাপি ধনুৱিকতি সদ্ধিং সৰৱিকতিযা আৱুধন্তি ৱেদিতব্বং. তস্মা সদ্ধিং ৱা সৰেন ধনুং গহেত্ৱা সুদ্ধধনুং ৱা সুদ্ধসৰং ৱা সজিযধনুং ৱা নিজ্জিযধনুং ৱা গহেত্ৱা ঠিতস্স ৱা নিসিন্নস্স ৱা ধম্মো দেসেতুং ন ৱট্টতি. সচে পনস্স ধনুং কণ্ঠেপি পটিমুক্কং হোতি, যাৱ হত্থেন ন গণ্হাতি, তাৱ ধম্মং দেসেতুং ৱট্টতিযেৱাতি.

ছট্ঠো ৱগ্গো.