৫. কবড়ৱগ্গৱণ্ণনা

৬১৭. অনাহটেতি অনাহৰিতে; মুখদ্ৱাৰং অসম্পাপিতেতি অত্থো.

৬১৮. সব্বং হত্থন্তি সকলহত্থং.

৬১৯. সকবড়েনাতি এত্থ ধম্মং কথেন্তো হৰীতকং ৱা লট্ঠিমধুকং ৱা মুখে পক্খিপিত্ৱা কথেতি. যত্তকেন ৱচনং অপৰিপুণ্ণং ন হোতি, তত্তকে মুখম্হি সন্তে কথেতুং ৱট্টতি.

৬২০. পিণ্ডুক্খেপকন্তি পিণ্ডং উক্খিপিত্ৱা উক্খিপিত্ৱা.

৬২১. কবড়াৱচ্ছেদকন্তি কবড়ং অৱচ্ছিন্দিত্ৱা অৱচ্ছিন্দিত্ৱা.

৬২২. অৱগণ্ডকাৰকন্তি মক্কটো ৱিয গণ্ডে কত্ৱা কত্ৱা.

৬২৩. হত্থনিদ্ধুনকন্তি হত্থং নিদ্ধুনিত্ৱা নিদ্ধুনিত্ৱা.

৬২৪. সিত্থাৱকাৰকন্তি সিত্থানি অৱকিৰিত্ৱা অৱকিৰিত্ৱা.

৬২৫. জিৱ্হানিচ্ছাৰকন্তি জিৱ্হং নিচ্ছাৰেত্ৱা নিচ্ছাৰেত্ৱা.

৬২৬. চপুচপুকাৰকন্তি চপু চপূতি এৱং সদ্দং কত্ৱা কত্ৱা.

পঞ্চমো ৱগ্গো.