২. উজ্জগ্ঘিকৱগ্গৱণ্ণনা

৫৮৬. উজ্জগ্ঘিকাযাতি মহাহসিতং হসন্তো. ৱুত্তনযেনেৱেত্থ কৰণৱচনং.

৫৮৮. অপ্পসদ্দো অন্তৰঘৰেতি এত্থ কিত্তাৱতা অপ্পসদ্দো হোতি? দ্ৱাদসহত্থে গেহে আদিম্হি সঙ্ঘত্থেৰো, মজ্ঝে দুতিযত্থেৰো, অন্তে ততিযত্থেৰোতি এৱং নিসিন্নেসু সঙ্ঘত্থেৰো দুতিযেন সদ্ধিং মন্তেতি, দুতিযত্থেৰো তস্স সদ্দঞ্চেৱ সুণাতি, কথঞ্চ ৱৱত্থপেতি. ততিযত্থেৰো পন সদ্দমেৱ সুণাতি, কথং ন ৱৱত্থপেতি. এত্তাৱতা অপ্পসদ্দো হোতি. সচে পন ততিযত্থেৰো কথং ৱৱত্থপেতি, মহাসদ্দো নাম হোতি.

৫৯০. কাযং পগ্গহেত্ৱাতি নিচ্চলং কত্ৱা উজুকেন কাযেন সমেন ইৰিযাপথেন গন্তব্বঞ্চেৱ নিসীদিতব্বঞ্চ.

৫৯২. বাহুং পগ্গহেত্ৱাতি নিচ্চলং কত্ৱা.

৫৯৪. সীসং পগ্গহেত্ৱাতি নিচ্চলং উজুং ঠপযিত্ৱা.

দুতিযো ৱগ্গো.