৩. খম্ভকতৱগ্গৱণ্ণনা

৫৯৬-৮. খম্ভকতো নাম কটিযং হত্থং ঠপেত্ৱা কতখম্ভো. ওগুণ্ঠিতোতি সসীসং পাৰুতো.

৬০০. উক্কুটিকাযাতি এত্থ উক্কুটিকা ৱুচ্চতি পণ্হিযো উক্খিপিত্ৱা অগ্গপাদেহি ৱা, অগ্গপাদে ৱা উক্খিপিত্ৱা পণ্হীহিযেৱ ৱা ভূমিং ফুসন্তস্স গমনং. কৰণৱচনং পনেত্থ ৱুত্তলক্খণমেৱ.

৬০১. দুস্সপল্লত্থিকাযাতি এত্থ আযোগপল্লত্থিকাপি দুস্সপল্লত্থিকা এৱ.

৬০২. সক্কচ্চন্তি সতিং উপট্ঠপেত্ৱা.

৬০৩. আকিৰন্তেপীতি পিণ্ডপাতং দেন্তেপি. পত্তসঞ্ঞীতি পত্তে সঞ্ঞং কত্ৱা.

৬০৪. সমসূপকো নাম যত্থ ভত্তস্স চতুত্থভাগপ্পমাণো সূপো হোতি. মুগ্গসূপো মাসসূপোতি এত্থ কুলত্থাদীহি কতসূপাপি সঙ্গহং গচ্ছন্তিযেৱাতি মহাপচ্চৰিযং ৱুত্তং. ৰসৰসেতি এত্থ ঠপেত্ৱা দ্ৱে সূপে অৱসেসানি ওলোণীসাকসূপেয্যমচ্ছৰসমংসৰসাদীনি ৰসৰসাতি ৱেদিতব্বানি. তং ৰসৰসং বহুম্পি গণ্হন্তস্স অনাপত্তি.

৬০৫. সমতিত্তিকন্তি সমপুণ্ণং সমভৰিতং. থূপীকতং পিণ্ডপাতং পটিগ্গণ্হাতি, আপত্তি দুক্কটস্সাতি এত্থ থূপীকতো নাম পত্তস্স অন্তোমুখৱট্টিলেখং অতিক্কমিত্ৱা কতো; পত্তে পক্খিত্তো ৰচিতো পূৰিতোতি অত্থো. এৱং কতং অগহেত্ৱা অন্তোমুখৱট্টিলেখাসমপ্পমাণো গহেতব্বো.

তত্থ থূপীকতং নাম ‘‘পঞ্চহি ভোজনেহি কত’’ন্তি অভযত্থেৰো আহ. তিপিটকচূড়নাগত্থেৰো পন ‘‘পিণ্ডপাতো নাম যাগুপি ভত্তম্পি খাদনীযম্পি চুণ্ণপিণ্ডোপি দন্তকট্ঠম্পি দসিকসুত্তম্পী’’তি ইদং সুত্তং ৱত্ৱা দসিকসুত্তম্পি থূপীকতং ন ৱট্টতীতি আহ. তেসং ৱাদং সুত্ৱা ভিক্খূ ৰোহণং গন্ত্ৱা চূড়সুমনত্থেৰং পুচ্ছিংসু – ‘‘ভন্তে থূপীকতপিণ্ডপাতো কেন পৰিচ্ছিন্নো’’তি? তেসঞ্চ থেৰানং ৱাদং আৰোচেসুং. থেৰো সুত্ৱা আহ – ‘‘অহো, চূড়নাগো সাসনতো ভট্ঠো, অহং এতস্স সত্তক্খত্তুং ৱিনযং ৱাচেন্তো ন কদাচি এৱং অৱচং, অযং কুতো লভিত্ৱা এৱং ৱদসী’’তি. ভিক্খূ থেৰং যাচিংসু – ‘‘কথেথ দানি, ভন্তে, কেন পৰিচ্ছিন্নো’’তি? ‘‘যাৱকালিকেনাৱুসো’’তি থেৰো আহ. তস্মা যংকিঞ্চি যাগুভত্তং ৱা ফলাফলং ৱা আমিসজাতিকং সমতিত্তিকমেৱ গহেতব্বং. তঞ্চ খো অধিট্ঠানুপগেন পত্তেন, ইতৰেন পন থূপীকতম্পি ৱট্টতি. যামকালিকসত্তাহকালিকযাৱজীৱিকানি পন অধিট্ঠানুপগপত্তেপি থূপীকতানি ৱট্টন্তি. দ্ৱীসু পত্তেসু ভত্তং গহেত্ৱা একস্মিং পূৰেত্ৱা ৱিহাৰং পেসেতুং ৱট্টতীতি মহাপচ্চৰিযং পন ৱুত্তং. যং পত্তে পক্খিপিযমানং পূৱউচ্ছুখণ্ডফলাফলাদি হেট্ঠা ওৰোহতি, তং থূপীকতং নাম ন হোতি. পূৱৱটংসকং ঠপেত্ৱা পিণ্ডপাতং দেন্তি, থূপীকতমেৱ হোতি. পুপ্ফৱটংসকতক্কোলকটুকফলাদিৱটংসকে পন ঠপেত্ৱা দিন্নং থূপীকতং ন হোতি. ভত্তস্স উপৰি থালকং ৱা পত্তং ৱা ঠপেত্ৱা পূৰেত্ৱা গণ্হাতি, থূপীকতং নাম ন হোতি. কুৰুন্দিযম্পি ৱুত্তং – ‘‘থালকে ৱা পণ্ণে ৱা পক্খিপিত্ৱা তং পত্তমত্থকে ঠপেত্ৱা দেন্তি, পাটেক্কভাজনং ৱট্টতী’’তি.

ইধ অনাপত্তিযং গিলানো ন আগতো, তস্মা গিলানস্সপি থূপীকতং ন ৱট্টতি. সব্বত্থ পন পটিগ্গহেতুমেৱ ন ৱট্টতি. পটিগ্গহিতং পন সুপটিগ্গহিতমেৱ হোতি, পৰিভুঞ্জিতুং ৱট্টতীতি.

ততিযো ৱগ্গো.