১. পৰিমণ্ডলৱগ্গৱণ্ণনা

যানি সিক্খিতসিক্খেন, সেখিযানীতি তাদিনা;

ভাসিতানি অযং দানি, তেসম্পি ৱণ্ণনাক্কমো.

৫৭৬. তত্থ পৰিমণ্ডলন্তি সমন্ততো মণ্ডলং. নাভিমণ্ডলং জাণুমণ্ডলন্তি উদ্ধং নাভিমণ্ডলং অধো জাণুমণ্ডলং পটিচ্ছাদেন্তেন জাণুমণ্ডলস্স হেট্ঠা জঙ্ঘট্ঠিকতো পট্ঠায অট্ঠঙ্গুলমত্তং নিৱাসনং ওতাৰেত্ৱা নিৱাসেতব্বং, ততো পৰং ওতাৰেন্তস্স দুক্কটন্তি ৱুত্তং. যথা নিসিন্নস্স জাণুমণ্ডলতো হেট্ঠা চতুৰঙ্গুলমত্তং পটিচ্ছন্নং হোতীতি মহাপচ্চৰিযং ৱুত্তং; এৱং নিৱাসেন্তস্স পন নিৱাসনং পমাণিকং ৱট্টতি. তত্ৰিদং পমাণং – দীঘতো মুট্ঠিপঞ্চকং, তিৰিযং অড্ঢতেয্যহত্থং. তাদিসস্স পন অলাভে তিৰিযং দ্ৱিহত্থপমাণম্পি ৱট্টতি জাণুমণ্ডলপটিচ্ছাদনত্থং, নাভিমণ্ডলং পন চীৱৰেনাপি সক্কা পটিচ্ছাদেতুন্তি. তত্থ একপট্টচীৱৰং এৱং নিৱত্থম্পি নিৱত্থট্ঠানে ন তিট্ঠতি, দুপট্টং পন তিট্ঠতি.

ওলম্বেন্তো নিৱাসেতি আপত্তি দুক্কটস্সাতি এত্থ ন কেৱলং পুৰতো চ পচ্ছতো চ ওলম্বেত্ৱা নিৱাসেন্তস্সেৱ দুক্কটং, যে পনঞ্ঞে ‘‘তেন খো পন সমযেন ছব্বগ্গিযা ভিক্খূ গিহিনিৱত্থং নিৱাসেন্তি হত্থিসোণ্ডকং মচ্ছৱালকং চতুক্কণ্ণকং তালৱণ্টকং সতৱলিকং নিৱাসেন্তী’’তিআদিনা (চূড়ৱ. ২৮০) নযেন খন্ধকে নিৱাসনদোসা ৱুত্তা, তথা নিৱাসেন্তস্সাপি দুক্কটমেৱ. তে সব্বে ৱুত্তনযেন পৰিমণ্ডলং নিৱাসেন্তস্স ন হোন্তি. অযমেত্থ সঙ্খেপো, ৱিত্থাৰতো পন তত্থেৱ আৱি ভৱিস্সতি.

অসঞ্চিচ্চাতি পুৰতো ৱা পচ্ছতো ৱা ওলম্বেত্ৱা নিৱাসেস্সামীতি এৱং অসঞ্চিচ্চ; অথ খো পৰিমণ্ডলংযেৱ নিৱাসেস্সামীতি ৱিৰজ্ঝিত্ৱা অপৰিমণ্ডলং নিৱাসেন্তস্স অনাপত্তি. অস্সতিযাতি অঞ্ঞৱিহিতস্সাপি তথা নিৱাসেন্তস্স অনাপত্তি. অজানন্তস্সাতি এত্থ নিৱাসনৱত্তং অজানন্তস্স মোক্খো নত্থি. নিৱাসনৱত্তঞ্হি সাধুকং উগ্গহেতব্বং, তস্স অনুগ্গহণমেৱস্স অনাদৰিযং. তং পন সঞ্চিচ্চ অনুগ্গণ্হন্তস্স যুজ্জতি, তস্মা উগ্গহিতৱত্তোপি যো আৰুড়্হভাৱং ৱা ওৰুড়্হভাৱং ৱা ন জানাতি, তস্স অনাপত্তি. কুৰুন্দিযং পন ‘‘পৰিমণ্ডলং নিৱাসেতুং অজানন্তস্স অনাপত্তী’’তি ৱুত্তং. যো পন সুক্খজঙ্ঘো ৱা মহাপিণ্ডিকমংসো ৱা হোতি, তস্স সাৰুপ্পত্থায জাণুমণ্ডলতো অট্ঠঙ্গুলাধিকম্পি ওতাৰেত্ৱা নিৱাসেতুং ৱট্টতি.

গিলানস্সাতি জঙ্ঘায ৱা পাদে ৱা ৱণো হোতি, উক্খিপিত্ৱা ৱা ওতাৰেত্ৱা ৱা নিৱাসেতুং ৱট্টতি. আপদাসূতি ৱাড়মিগা ৱা চোৰা ৱা অনুবন্ধন্তি, এৱৰূপাসু আপদাসু অনাপত্তি. সেসমেত্থ উত্তানমেৱ.

পঠমপাৰাজিকসমুট্ঠানং – কিৰিযং, সঞ্ঞাৱিমোক্খং, সচিত্তকং, লোকৱজ্জং, কাযকম্মং, অকুসলচিত্তং, দুক্খৱেদনন্তি. ফুস্সদেৱত্থেৰো ‘‘অচিত্তকং, পণ্ণত্তিৱজ্জং, তিৱেদন’’ন্তি আহ. উপতিস্সত্থেৰো পন ‘‘অনাদৰিযং পটিচ্চা’’তি ৱুত্তত্তা ‘‘লোকৱজ্জং, অকুসলচিত্তং, দুক্খৱেদন’’ন্তি আহ.

৫৭৭. পৰিমণ্ডলং পাৰুপিতব্বন্তি ‘‘তেন খো পন সমযেন ছব্বগ্গিযা ভিক্খূ গিহিপাৰুতং পাৰুপন্তী’’তি (চূড়ৱ. ২৮০) এৱং ৱুত্তং অনেকপ্পকাৰং গিহিপাৰুপনং অপাৰুপিত্ৱা ইধ ৱুত্তনযেনেৱ উভো কণ্ণে সমং কত্ৱা পাৰুপনৱত্তং পূৰেন্তেন পৰিমণ্ডলং পাৰুপিতব্বং. ইমানি চ দ্ৱে সিক্খাপদানি অৱিসেসেন ৱুত্তানি. তস্মা ৱিহাৰেপি অন্তৰঘৰেপি পৰিমণ্ডলমেৱ নিৱাসেতব্বঞ্চ পাৰুপিতব্বঞ্চাতি. সমুট্ঠানাদীনি পঠমসিক্খাপদে ৱুত্তনযেনেৱ ৱেদিতব্বানি সদ্ধিং থেৰৱাদেন.

৫৭৮. কাযং ৱিৱৰিত্ৱাতি জত্তুম্পি উৰম্পি ৱিৱৰিত্ৱা. সুপ্পটিচ্ছন্নেনাতি ন সসীসং পাৰুতেন; অথ খো গণ্ঠিকং পটিমুঞ্চিত্ৱা অনুৱাতন্তেন গীৱং পটিচ্ছাদেত্ৱা উভো কণ্ণে সমং কত্ৱা পটিসংহৰিত্ৱা যাৱ মণিবন্ধং পটিচ্ছাদেত্ৱা অন্তৰঘৰে গন্তব্বং. দুতিযসিক্খাপদে – গলৱাটকতো পট্ঠায সীসং মণিবন্ধতো পট্ঠায হত্থে পিণ্ডিকমংসতো চ পট্ঠায পাদে ৱিৱৰিত্ৱা নিসীদিতব্বং.

৫৭৯. ৱাসূপগতস্সাতি ৱাসত্থায উপগতস্স ৰত্তিভাগে ৱা দিৱসভাগে ৱা কাযং ৱিৱৰিত্ৱাপি নিসীদতো অনাপত্তি.

৫৮০. সুসংৱুতোতি হত্থং ৱা পাদং ৱা অকীড়াপেন্তো; সুৱিনীতোতি অত্থো.

৫৮২. ওক্খিত্তচক্খূতি হেট্ঠা খিত্তচক্খু হুত্ৱা. যুগমত্তং পেক্খমানোতি যুগযুত্তকো হি দন্তো আজানেয্যো যুগমত্তং পেক্খতি, পুৰতো চতুহত্থপ্পমাণং ভূমিভাগং; ইমিনাপি এত্তকং পেক্খন্তেন গন্তব্বং. যো অনাদৰিযং পটিচ্চ তহং তহং ওলোকেন্তোতি যো তংতংদিসাভাগং পাসাদং কূটাগাৰং ৱীথিং ওলোকেন্তো গচ্ছতি, আপত্তি দুক্কটস্স. একস্মিং পন ঠানে ঠত্ৱা হত্থিঅস্সাদিপৰিস্সযাভাৱং ওলোকেতুং ৱট্টতি. নিসীদন্তেনাপি ওক্খিত্তচক্খুনাৱ নিসীদিতব্বং.

৫৮৪. উক্খিত্তকাযাতি উক্খেপেন; ইত্থম্ভূতলক্খণে কৰণৱচনং একতো ৱা উভতো ৱা উক্খিত্তচীৱৰো হুত্ৱাতি অত্থো. অন্তোইন্দখীলতো পট্ঠায ন এৱং গন্তব্বং. নিসিন্নকালে পন ধমকৰণং নীহৰন্তেনাপি চীৱৰং অনুক্খিপিত্ৱাৱ নীহৰিতব্বন্তি.

পঠমো ৱগ্গো.