৪. পহাৰসিক্খাপদৱণ্ণনা

৪৪৯. চতুত্থে – পহাৰং দেন্তীতি ‘‘আৱুসো পীঠকং পঞ্ঞপেথ, পাদধোৱনং আহৰথা’’তিআদীনি ৱত্ৱা তথা অকৰোন্তানং পহাৰং দেন্তি.

৪৫১. পহাৰং দেতি আপত্তি পাচিত্তিযস্সাতি এত্থ পহৰিতুকামতায পহাৰে দিন্নে সচেপি মৰতি পাচিত্তিযমেৱ. পহাৰেন হত্থো ৱা পাদো ৱা ভিজ্জতি, সীসং ৱা ভিন্নং হোতি, পাচিত্তিযমেৱ. ‘‘যথাযং সঙ্ঘমজ্ঝে ন ৱিৰোচতি, তথা নং কৰোমী’’তি এৱং ৱিৰূপকৰণাধিপ্পাযেন কণ্ণং ৱা নাসং ৱা ছিন্দতি, দুক্কটং.

৪৫২. অনুপসম্পন্নস্সাতি গহট্ঠস্স ৱা পব্বজিতস্স ৱা ইত্থিযা ৱা পুৰিসস্স ৱা অন্তমসো তিৰচ্ছানগতস্সাপি পহাৰং দেতি, দুক্কটং. সচে পন ৰত্তচিত্তো ইত্থিং পহৰতি, সঙ্ঘাদিসেসো.

৪৫৩. কেনচি ৱিহেঠিযমানোতি মনুস্সেন ৱা তিৰচ্ছানগতেন ৱা ৱিহেঠিযমানো. মোক্খাধিপ্পাযোতি ততো অত্তনো মোক্খং পত্থযমানো. পহাৰং দেতীতি কাযকাযপটিবদ্ধনিস্সগ্গিযানং অঞ্ঞতৰেন পহাৰং দেতি, অনাপত্তি. সচেপি অন্তৰামগ্গে চোৰং ৱা পচ্চত্থিকং ৱা ৱিহেঠেতুকামং দিস্ৱা ‘‘উপাসক, এত্থেৱ তিট্ঠ, মা আগমী’’তি ৱত্ৱা ৱচনং অনাদিযিত্ৱা আগচ্ছন্তং ‘‘গচ্ছ ৰে’’তি মুগ্গৰেন ৱা সত্থকেন ৱা পহৰিত্ৱা যাতি, সো চে তেন পহাৰেন মৰতি, অনাপত্তিযেৱ. ৱাড়মিগেসুপি এসেৱ নযো. সেসমেত্থ উত্তানমেৱ. সমুট্ঠানাদীনি পনস্স পঠমপাৰাজিকসদিসানি, ইদং পন দুক্খৱেদনন্তি.

পহাৰসিক্খাপদং চতুত্থং.